كلمات قصيدة حيره بنص غربه | مسلم الوائلي مكتوبه كامله
لطمية حيره بنص غربه | مسلم الوائلي
قصيدة: حيره بنص غربه
أداء: مسلم الوائلي
كلمات: عباس طالب السعيدي
~~~~
حيره بنص غربه احتارينه
حيهم وين اليسبگ عينه
~~~
بالهيمه مثل حسين طشرنه ديره
وينه اليطيح اگبال زينب حصيره
ادلال المضيف اتطيح فشله جبيره
مو طاحن بنيات شيخ العشيره
مو كل واحد يعطش يعني يريد الماي الماهوه
زينب كلما تعطش تشرب وجه العباس وتروه
جف بلا خنصر ضلينه
حيهم وين اليسبگ عينه
~~
صاحت رقيه اتهون هاي الطلابه
بس كون اشم حسين گبل الخرابه
من گتله هاي النوگ گوملنه بابه
ما جلبت وياي غير الترابه
كلمن رد لدياره وگبل المغرب رجعت شمس الله
واحنه الهاي الساعه اندور عن تابوت لعبد الله
طحنه دموع وما ردينه
حيهم وين اليسبگ عينه
~
طاحت علينه اشكال ما بيها زينه
بس المطر ما طاح بالطف علينه
عالوجه گمنه انطيح ونغطي عينه
جي بالركض يا ناس مجتوفه ادينه
صعبه الطيحه اگبال الوادم من اتطيح العلويه
ساعتها اتمنيت اشجم عباس امخلفه البدويه
عباس هوايه اتمنينه
حيهم وين اليسبگ عينه
~~~
تعبن بنات ام عون جم مره طاحن
جنهن قميص حسين بالهيمه ضاعن
مثل النفس بالماي بالگوه راحن
جنهن دمع جناز ما يستراحن
لو ما بالطف مات العباس ومگطوعات اجفوفه
جا ظل زينب صوت اتحول محد غير الله يشوفه
كلشي اتغير وي جفينه
حيهم وين اليسبگ عينه
~
مطلوبه ثار الشام نوگ وسبايه
ما عدنه ثار يطيح مثل العبايه
ما رفرفت رايات بالشده هايه
والله منهد عباس ما شفنه رايه
صوت من اخر بزره لهاشم لم الحيل المتبدي
صاح الثار امربع يرجع من عدهم وانه المهدي
صحنه ادخيلك يا مهدينه
حيهم وين اليسبگ عينه