كلمات قصيدة هل محرم محمد الجنامي مكتوبة كاملة
قصيدة :- هل محرم [ استوديو ]
كلمات :- الشاعر كرار حسين الكربلائي .
أداء :- الرادود محمد الجنامي .
💚🥀🥀🥀💚
هل مـحرم يـعـاشـق مـحـرم
قلبك و قلبي بالخدمه مغرم
يالله خل نلبس اسود على حسين
سر دمعنه هو السر الاعظم
تتهيأ الـخـدم .. بتـبدل الـعـلـم
بالحضره نلتقي وبكربله يبدي المنه
موكبنه ينصب .. يجمعنه هالدرب
لمتنه خدمته و بخيمته الزهره تلمنه
نسد ابواب الارزاق رزق خدمتنه احله
نعوف المال و الحال نشوف انت اغله
نمل من كلشي مولاي طريقك ما نمله
خدمتك جنه الخادم .. حـبـيـبـي
يا سيد الحب عشقتك
بين المشاعر رسمتك
حلوه الحياة بخدمتك .. يا أبا عبد الله
💚🥀🥀🥀💚
اتعب و قمه الراحة تعبك
احلى كلماتي كلمة احبك
دنيتي بوجهي لو سدت الباب
يا حسين انت تفتحلي قلبك
مـولاي أبـو علـي .. انـت المـلاذ إلـي
صاحب فضل صرت ما ينسي فضلك عليه
كـافـانـي بالـزغـر .. امـدللـني بالكـبر
غرقني خيرك ومن رحمتك تارس اديه
احبك حب مساكين بدونك روحي تذبل
بخدمتك كلبي يرتاح و تصير أيامي أجمل
علي خل تزعل الناس المهم لا أنت تزعل
أهم شي عندي مرضاك .. حـبـيـبـي
كل العمر اخذه مني
عندي المهم ترضى عني
هذا الأمل و التمني .. يا أبا عبد الله
💚🥀🥀🥀💚
يا ملك انه ملكك و اطيعك
لو ابيع العمر كله ما ابيعك
ابجي كلما شفت طلفي عطشان
اذكر شلون بجيت لرضيعك
ارزقني خدمتك .. ارزقني حركتك
ارزقني كل وقت الطم الك وابجي المصابك
بجيني عالخيم .. بجيني عالحرم
بجيني عالسبي و عيشني جمره من عذابك
جمالك فوك الرماح اذكره و روحي تتعب
اريد ابجي على عباس اريد ابجي على زينب
اريد ابجي لرقيه لقلبها عليك شيب
اريد أكثر تبجيني .. حـبـيـبـي
يا صاحب الشيبه الخضيبه
أختك مشت بعدك غريبه
عيشني كل هاي المصيبه .. يا أبا عبد الله