كلمات قصيدة اوبر من النبل ونصول النبع مكتوبه كامله
لطمية اوبر من النبل ونصول النبع
#تراث #نعي #مفجع
لذبيح الله الأعظم سيد الشهداء
صلوات الله وسلامه عليه
-----------
اوبر من النبل ونصول النبع
ولبس ثوب من الدمه فوگ الدرع
وگع وام الفخر سچبتله الدمع
وادمت الحره عليه اخدودها
ــــــــــــــــــــــــــــــــــــــ
اختلفت الصوبين حين الي وگع
عن ضهر غوجه وعله الگاع انصرع
البعض گالو ميت واهواه انگطع
وبعض گالو مكر لا ييهودها
ــــــــــــــــــــــــــــــــــــــ
البعض گالو ضعف من فيض الدمه
وبعض گالو طاح من حر الضمه
كثر بيه الگول واعليه انغمه
حيث كل همته بذل مجهودها
ــــــــــــــــــــــــــــــــــــــ
صاح ريسهم الطاغوت النذل
ما تعرفوه مَيت بالضن لو عدل
خل كتيبت خيل تلكد وتحمل
عالحرم وتروع منها اچبودها
ــــــــــــــــــــــــــــــــــــــ
انچانه بيه نفس لو نگدت نبض
تاخذه الغيره وحميته وينتفض
هجمت اعله الطنب لچن عالارض
طاح حاميها او وگع عامودها
ــــــــــــــــــــــــــــــــــــــ
هجت النسوان من شافت الخيل
هجمت اعليهن الف اه او يويل
من سمعهن گام ابن حامي الدخيل
لاچن الگومه ضعيفه اسندوها
ــــــــــــــــــــــــــــــــــــــ
صاح لاچنه الحتف منه گرب
كفر لچن مابكم شيمت عرب
الزلم تچتل وتستافي الطلب
من جبيلتها وتگطع ابنودها
ــــــــــــــــــــــــــــــــــــــ
العرض ينذآل عند ارده الزلم
ينحفظ ينهاب ينعز ينحشم
دونكم شخصي وعوفو من الحرم
هدر دمي اسيوفكم مگصودها
ــــــــــــــــــــــــــــــــــــــ
انه گبلتكم ومن شان الرجال
تحرب اعله امثالها لا عله اطفال
گالو الحگ ينحچه خلو لعيال
نذبح احسين ونجي الفرهودها
ــــــــــــــــــــــــــــــــــــــ
دارو اعله حسين وهوه اعله التراب
نايم وكل مفصل ابجسمه اصواب
اتشجرت بيه الطواغيت الحراب
وحطمت فوگ الرماح اعجودها
------
الشاعر المرحوم عبود غفله