كلمات قصيدة اگعد يالعباس | مسلم الوائلي مكتوبه كامله
لطمية اگعد يالعباس | مسلم الوائلي
قصيدة: اگعد يالعباس
أداء: مسلم الوائلي
كلمات: علي الأكبر الغرابي
~~~
لمن طحت يا في هلك
جدمي ركض لو گلبي الك
ما گتلي هيج استقبلك
يا أبا الفضل .. يا أبا الفضل
~~
اول مره اتگول واسمع منك هاي
جلمة خويه حسين مشتاگلها هواي
غير الأخو شعنده الأخو
بالشده يلمالك كفو
.. ولا مثلك اختار
يالرايح بلا موعده
ما گلت اخوي الوحده
.. لو عفته يحتار
يالوجهك مطرز الشمس
هاي انه اول مره احس
بالخويه منك انترس
يا أبا الفضل .. يا أبا الفضل
~~
ما لحگت عليك وكلشي برسمك ضاع
جنك ماي الجود متبدي اعله الگاع
لمن اجيت اركض الك
جتالك اگبالي ضحك
.. والتمت الناس
صاحولي يالظهره انكسر
ذنيج يم جرف النهر
.. جفين عباس
جف بكتر جف بكتر
طاحن واشوفك منكسر
وادور الزينب عذر
يا أبا الفضل .. يا أبا الفضل
~~~~
سولف يالعباس تگعد لو ما بيك
مو ثوبي المفروض ينشگ صدري عليك
من شفتك بذاك الوجع
والسهم بعيونك طبع
.. يا بعد العيون
حاولت اجر بيدي السهم
من عينك وگلبي انلجم
.. ما اعرف شلون
لا بيه ارد لا بيه اظل
لا بيك احس گومه وأمل
ومن عينك امبين خجل
يا أبا الفضل .. يا أبا الفضل
~~~~
ما محتاج الماي يالعينك نهرين
اگعد يالعباس واعدل ظهر حسين
ترضاها ارد يا أبا الفضل
للخيمه مو كلي عدل
.. واتوجه عالگاع
مو تدري زينب تنتظر
جيتك احر من الجمر
.. ما تحمل اوداع
بالگوه اجر بخطوتي
وشطوله دربي الخيمتي
وميت لگوك بدمعتي
يا أبا الفضل .. يا أبا الفضل
~~~
خطوه وخطوه عليك اعثر مو بالكيف
واول مره حسين يتوجه اعله السيف
رديت بس بيا وضع
كل اليباوع ينشلع
.. گلبه اعله الحسين
ولو ما عيون اختك تصد
مو عدل يا عباس ارد
.. وتغمض العين
يالنايم اعله العلگمي
نام وعسن نوم الهني
خليت أخيك منحني
يا أبا الفضل .. يا أبا الفضل