كلمات قصيدة عوف الرياء عين الكامرة اتركها مسلم الوائلي مكتوبه كامله
لطمية عوف الرياء عين الكامرة اتركها مسلم الوائلي
قصيدة: عوف الرياء
أداء: مسلم الوائلي
كلمات: علي الأكبر الغرابي
~
لو رايد تظل مضرب مثل وتصير خادم
تهذيب النفس اول درس بالخدمه لازم
جاي عاشور .. عيش مكسور
وتصير خادم .. وتصير خادم
~~
هيه الفرصه يبن آدم مره وموش مرتين
حلوه بوجهك تشوفه يضحك وجه الحسين
باجر كلشي يتسجل وكلشي بدفترك دين
ولتضيع بهوه الدنيه وتندم بيها بعدين
اترك هواك .. وكل ما وراك
وامشي برضاه موش برضاك
وبكل زمان .. وبكل مكان
تلگه الحسين بر الأمان
رحله من الألم مدري الوهم تخلص حياتك
خاطر تنذكر طول العمر حسينك نجاتك
هاي دستور .. عيش مكسور
وتصير خادم .. وتصير خادم
~~~
افتح گلبك وعقلك واترك كلشي مألوف
ولا تلبس وجه غيرك وجهك خله مكشوف
ولا تتصدر الموقف حته تصير معروف
عين الكامره اتركها عين حسينك اتشوف
عوف الرياء .. عيش العزاء
محد يفيد غير البكاء
ودمعك اكيد .. كلما يزيد
الحزنك يصير ساعي البريد
تلبس لو ردت وتوفقت تاج الخدامه
بگلوب البشر اترك أثر واترك علامه
تاج من نور .. عيش مكسور
وتصير خادم .. وتصير خادم
~~~~
احذر من غرور اسمك ولا تنجر بالأحلام
من تتواضع يرفعك جف حسين كل عام
وخلي الخدمتك موقف موقف جان جسام
وعِشره حسينك يريد مو بس عَشرة ايام
عوف الحياة .. والمغريات
بالخدمه هاي حبل النجاة
اما تكون .. او لا تكون
لو ما تريد غيرك يجون
عيش اول جرح واخر جرح واثبت وجودك
غير المنذبح فوگ الرمح راسه اعلمودك
ليش مغرور .. عيش مكسور
وتصير خادم .. وتصير خادم
~~
باجر كلشي ما تلگه وترجع لأصلك اردود
بس الحلوه لو موتك بنفس هدومك السود
الحلوه جفوفك اتسولف عنك وانت موجود
الحلوه الزهره تحسبلك جم لطمه اعله الخدود
عيش بسلام .. موت بسلام
تدري الحسين مسك الختام
خاطر تصير .. عدهم امير
بالخدمه عيش خادم زغير
لو رايد شمس باجر وامس يمك تسافر
ذوب بخدمتك وبدمعتك اروي المشاعر
صير مأجور .. عيش مكسور
وتصير خادم .. وتصير خادم
~
باجر موسم الخدمه يبدي ويبدي عاشور
باجر فاطمه الزهره بكل مجلس تجي اتزور
باجر بيدها اتسجل وين الگلبه مكسور
وهيه الحلوه لو گالت عنك هذا مأجور
اتخيل وراك .. وتبجي بعزاك
وتاخذ ثواب من جفها ذاك
اتخيل تجيك .. تمسح ايديك
وتحسها جاي ترضه عليك
من هسه استعد واحذر ترد بارد شعورك
ذوب بهالعزه ويه اهل العزه وسجل حضورك
عوف كل دور .. عيش مكسور
وتصير خادم .. وتصير خادم