نقدم لكم مجموعة من قصائد ولطميات الشاعر محمد هادي العقابي
ضعن گلبي رحل
ضعن گلبي رحل.. وبامل.. روحي تنتضر
واصد اعله الدرب.. بالغرب.. مايسوه العمر
دمعتي بعيني.. عليهم سؤالي
وحيده بحزني.. اعيش الليالي
دمعتي بعيني
.........................
مشو كلهم وانه جروحي. بعددهم بالگلب صارن
اخلص الليل اون وانحب. وياجرح اليطيبه الون
العمر ياناس اله حوبه. المصايب كلهن التمن
بوداع حسين ماارتاح. طول العمر راح احزن
طلع شيب الهجر.. والكبر.. مايرحم ابد
انه ام الاربعه.. ملوعه.. وماعندي ولد
تسولف روحي.. يدنيا شبكالي
وحيده بحزني.. اعيش الليالي
دمعتي بعيني
........................
الضعن من سار اخذ روحي. وعالفركه انه مجبوره
مو بس بيتي اضلم صار. المدينه بعيني مهجوره
نور العين جان حسين. اعيش ابفيه مسروره
الزمن هسه قسه وياي. بالغربه لعب دوره
جرح گلبي بجرح.. مايصح.. ليه كل دوه
رماني بجم سهم.. والألم.. حارمني الهوه
تضيك انفاسي.. اعله ولدي الغوالي
وحيده بحزني.. اعيش الليالي
دمعتي بعيني
....................
هسه يدير وجهه حسين. وينظر دمعتي ونوحي
واكسر خاطره لو شاف. اسولف وحدي ويروحي
هسه يكلي يم عباس. فراكج زيد اجروحي
وحجيت انه بگلب متعوب. يروحي ويالضعن روحي
جره بعيني الدمع.. جن شمع.. من نار الصبر
يقاموس الحزن.. مااضن.. تفسرلي الهجر
صور لحبابي.. دوم اعله بالي
وحيده بحزني.. اعيش الليالي
دمعتي بعيني
..........................
بيني وبين روحي هواي. اكول شلون عافوني
كلت اكسر خواطرهم بهدمهم امسح اعيوني
وخذت عبدالله اناغيله. احبه هواي يدروني
كلشي البيه بالتوديع. يصيح وياكم اخذوني
اضل بغربتي.. اوحشتي.. ديره بلا ضوه
تمنيت شكثر.. وبصبر.. امشي النينوى
جرح بجفوني.. بالدم بجالي
وحيده بحزني.. اعيش الليالي
دمعتي بعيني
........................
صحت من گلبي يايمه. والله اليعلم بحالي
وسمعني حسين من ناديت. اجاني ودمعته تلالي
العليله تضل امانه وياج. بنت حسينج الغالي
وصبريهه بعلي الاكبر. يرد وياخذج تالي
مشو واني طحت.. وايست.. ماضن نلتقي
يليله امن العمر.. وانتضر.. للزهره ارتقي
بعدهم عمري.. ابد ماحلالي
وحيده بحزني.. اعيش الليالي
دمعتي بعيني
محمد هادي العقابي
علي الاكبر (شور)
شاغل فكري شمعت عمري
لونك احس مو مثل امس وجهك ذبل
..................
علي يبني ونضر عيني شيصير وياك
ابوك آنه وعِلم گلبي وشفت عيناك
دخبرني الحزن بيّن على محياك
يروح حسين ما اكدر على فركاك
فراكك تدري يكسر ضهري
حملك حمل من انسئل راح الامل
.................
اشوفنك تصد عينك على الخيمات
بعدنه بخير والحره بأمان تبات
اخياتك يالاكبر ذني مهيوبات
تره عمتك بعدنه تعاشر الحسرات
دينك رايد مثلك واحد
إحمي الخدر النه النصر ربك جعل
................
كلام هواي يابويه وصعب يالزين
لجن خليني اخبرك بالتشوفه العين
تروحون وعليّ تفزع تره الصوبين
يضل وحيد بين اعدآ ابوك حسين
موت الناصر يوم العاشر
كل صحبتي وحته اخوتي اه الكفل
................
يبويه مصاب من عنده يّشيب الراس
تشوفه عيوني وبصدري تموت انفاس
وّحكك ياعلي يبني فلا ينقاس
تطيح اجفوفه كدامي البطل عباس
وسهم بعينه ومطبرينه
حزام الضهر يم النهر ومشي بعجل
................
تضل زينب وحيده وبويه كلنه انموت
وتهل عبرات عالخوه ودمع مبخوت
تصيح اعلينه لاكن مانرد الصوت
اطيح آنه وسهم نص كلبي يبني يفوت
ويسلبوني ويذبحوني
وخيل الغدر فوك الصدر هذا الاجل
..................
يالاكبر هذا يومك ما اله تأجيل
وشوفن كل كتر دمك يضل ايسيل
عليك اني صبح يابويه جسمي انحيل
اجيك المصرعك وجدامي بيه تميل
يّطول دربي تشلع كلبي
فراك الولد هوه الاشد عند الاهل.
محمد هادي العقابي.
الوداع يخواني
الوداع يخواني
...................
هاي آخر ليله نلتم بالخيام.. اه واويلاه لو طر الصبح
اني مامجروحه منكم مستحيل.. بس عليكم رايحه هواي انجرح
حسين خويه ادنه يم اختك تعال.. خل اشم نحرك الباجر ينذبح
كربله يخواني يرادلهه حيل.. وبعد كافل للعقيله مايصح
الوداع يخواني
الوداع يخواني
....................
باجر الديرت غرب تمشي الضعون .. وكلهه تتحزم عليي واني مره
وين ادير عيوني ياعباسي وين.. زينب خلافك تضل محيره
باجر امن اخيامي اشوفن بس رماد .. وگلبي مثل اخيامي ناره موجره
خويه اتمنه العمه من مستحاي .. ولااشوفن زلمه
صدلي بناضره
الوداع يخواني
الوداع يخواني
......................
ياهو بسمي ايصيح لو طبينه سوك.. والنسه البلقافله عدهن أهل
افلانه بت افلان ذوله اهلج اجوج.. وانه اضلن لاكفيل ولاامل
الماي من عيني يشح من النحيب .. وعل يتامه يسكن بگلي الوجل
ليل كلهه الدنيه بعيوني تصير.. الباجر اوياي الزمن حضر زعل
الوداع يخواني
الوداع يخواني
.....................
الزلم يرادلهه زلمه من تعيل.. ياخذ الحك منهم وماينكسر
خويه واني حرمه ماطالعلي صوت.. وخاف يطلع صوتي كدام الشمر
يابو فاضل خويه وبعينك تشوف.. زينب ام الخدر وبلايه خدر
والله دنيا وزينب بلايه الكفيل.. بيدي الحبال واطر درب اليسر
الوداع يخواني
الوداع يخواني
.....................
خويه درب الشام يالكافل طويل.. وروسكم برماح كدام الضعن
منين مادير الوجه كتال اخوي.. يحدي بينه وغايته الأصعب وطن
جم خرابه وراح أمر بيهن وابات.. خويه لجمات السبي ماينسن
آل هاشم انتم احمات الدخيل.. بياوكت نسوانكم يتغربن
الوداع يخواني
الوداع يخواني
.....................
اني من بيت اللذي يملك حصير.. ماخذيني القصر سفاك الدمه
راح اطب ديوان ناس ابلا ضمير.. واسمع ايشتمون ابوي وفاطمه
راح احجي وكلهه تسكت لو حجيت.. ينطق اعله الساني حماي الحمه
تنتهي بوداعكم عندي الحيات.. وعالصبر روحي تضل ملازمه
الوداع يخواني
الوداع يخواني
محمد هادي العقابي
خادم الك
خادم الك.. انته وهلك
يالبيدك ايدور الفلك
يحسين حيرت الناس محد يعرف اسرارك
....................
سلطان افلاك الله انته وارضه
اتمنه صدري اعليك اكسره وارضه
المهم انته الترضه مو انه ارضه
ناذر نذر.. طول العمر
يحسين الك لطم الصدر
يالعيشتني بنص خير وترست عيوني انوارك
.......................
اتمنه منك قربي أكثر ودني
هنيالي گلبك لو يحبني ودني
بكيفك أوين تريد حاضر ودني
انته الهوه.. وگلبي ارتوه
بحبك يضامي نينوى
الشور شورك والراي يالماترد خطارك
....................
ياسر وجود الكون انته واصله
گلبي بمحبتك صار مية واصله
ادري اليحبك انته تعشك واصله
بنضرة ولي.. منك الي
يااغله ناسي وكل وهلي
حاضر عزائك كل حين ويه الخدم اتشارك
....................
غير اسمك اعله الساني ابد مارده
وجف ايدي بي الطم الك مارده
عمري وبدون الخدمه لا ماريده
اتشكرك.. وبمحضرك
خليتني اخدم منبرك
من اتعنه مجلس منصوب متعني يعني الدارك
.........................
متروسه ايدي بخدمتك من فضلك
من گلبي احبك والگلب من فض لك
من طينتك مخلوق انه من فضلك
هذا الگلب.. وضعه صعب
وثنين مايعرف يحب
حبيتك انه يحسين وحب القداسه مبارك
.....................
گلبي بمحبتك كل محرم يرهه
يمك خدمتي وردت گلبك يرهه
اخذ ايدي بيدك للمجالس يرهه
خاف انحسب.. امن أهل الذنب
وعاصي بسجلّك انكتب
تسامحني اريدك مولاي.. ومعروفه انته اخبارك
محمد هادي العقابي
شايل يا الم
شايل يا الم.... وعينك تبجي دم
صدرك بي جمر.... من نار الخيم
...............
هذا شهر أحزانك انته يابو صالح وانته ادره
ماكو بالناس اليشبهك دمعته اعله حسين حمره
هواي متعوب وتشاهد راس فوك الرمح يقره
وعينه تنضر على عياله و وشل امن النزف نحره
تمشي بكل درب.... حزنك بالكلب
خلصت العمر.... عايش بالغرب
....................
هل الهلال وتشرفه وشايل بروحك اذيته
اه ياعاشر محرم من يجيك شلون جيته
بالدمه جدك يمهدي خضبو شيبت لحيته
بكربله وذرو جسمه وطشرو كل اهل بيته
وشدو بالحبل.... كل طفله وطفل
وزينب والخدر....مسبيه بهزل
...................
جرحك شكبره ومصابك ماكو مثله ولاشبيهه
تشوف زينب حرمه ضلت والزلم فزعت عليهه
والشمر والله هضمهه وسوطه بيده ومعتنيهه
ونسبت عمتك يمهدي وبلحبل شدو اديهه
وتصد للنهر.... من كد الخطر
بدموع اليسر.... تحشم بالكمر
...................
امن السهر ذبلت اعيونك بيك وين الزمن يحدي
شعرك ابيض مثل گلبك ونخطف لونك يمهدي
كربله جرح الهواشم لايطيب ولايعدي
ونته من تزوره تندب اه يمصابك يجدي
شتحمل ياجرح.... حسينك منذبح
تكابر بالصبر.... وبعيك رمح
.................
الحزن عاف الدنيه كلهه وصار يالمهدي بدليلك
غبت وانت بعز شبابك وعله حسين انهدم حيلك
الدنيه بعيونك خرابه وبيهه زينب تشتكيلك
وصوت عمتك من تسمعه بلمدامع تكضي ليلك
حزنان وتون.... امن اسياط المتن
بيك اشجم كسر.... ومسهر الجفن
......................
يمته ترتاح بحياتك ياامامي وتطفه نارك
وتمسح ادموع الهواشم. عالضلم تشهر فقارك
تنتضر للثار انته وحنه كلنله بنتضارك
هواي ندعيلك يمهدي عجل اللهمَ ثارك
بس انته الامل.... والمدمع همل
كل يوم اليمر...... ندعي بالعجل
محمد هادي العقابي
من الركض
من الركض جدمي عثر
كوه اوصلت يم النهر
يجري دمه شفت الكمر
وسهم العده بعينه انكسر
.....................
ملتمه هل ناس
كلها اعله عباس
الكيته طايح شلت راسه ابين اديه
كتله انه الحسين
مايفتح العين
الدم عله عيونه جمد ميشوف اخيه
بدمعتي.. بكسرتي.. خويه انهض يابو فاظل انه وحدي
كوم ياعباس الي.. عاين غربتي
صحتله. كلتله. طاح دمعي والشماته تشوف دمعي
طيحتك كسرة ظهر.. ياكافل اختي
گلبي تعب حيلي انهدم
يمه احتضر من الألم
طاح الاخو كل جسمه دم
وسهم العده بعينه انكسر
.....................
انضر للعيون
كلهم يصدون
واحد اياشر الواحد عله نحري
حاجيته انه بصوت
يمخوف الموت
اكعد وخل ارفع ايدي العله ضهري
هضيمه.. يخويه.. الزلم تولي الماله اخو والله هضيمه
واني توليني الزلم.. لو رحت عني
مصيبه.. جبيره.. يوصل اطراف الخيم بالسحك دمي
وحته ثوبي لو طحت.. ينسلب مني
نحري تره متاني ذبح
بجسمي جرح فوك الجرح
وانضر اله بگلبه الرمح
وسهم العده بعينه انكسر
..........................
مايحجي وياي
وانه اسمع اعداي
حسين ماعنده اخو ضل ضهره خالي
صحت امن الألام
ايام ايام
والله صعبه ايموت ابو فاضل اكبالي
اشوفه. وجفوفه. القبلتهن بالمهد حرموني منهن
الصعدن زينب عله.. الناكه اكطعوهن .
اريدن. احضنه. وخفت تلجم صدره الحنيّن شبكتي
امن السهام الي بوسط.. گلبه رموهن
ماينحمل بي كل كتر
طعنة رمح طبرة شمر
تجوي شمس حر الضهر
وسهم العده بعينه انكسر
....................
راح الاخو راح
وگلبي بحزن صاح
الناس غربه ولاتخلي حسين حاير
كدامي تنشاف
كل هاي الالاف
تحضرت لحسينك اتدوسه بحوافر
اختنه.. تنطرك.. شلون ارجع الهه ياحارس خدرهه
زينب بموتك تموت .. وانته داري
خيامك.. يكافل.. بس اسد عيني يحركوهن عليهه
واللهب يعله وتفر.. وسط الصحاري
خيل وزلم تفزع تره
وزينب يبو فاضل مره
ماكام اخوي امن الثره
وسهم العده بعينه انكسر
.................
مخنوكه الانفاس
اه اعله عباس
كمر ماينشاف وجهه من جروحه
موذرينه عالكاع
لمخوف السباع
بين ادي وبحضني اخوي اطلعت روحه
نهايه.. حزينه.. راح مني حزام ضهري وابو الغيره
بيش ارجع للخيم.. زينب شگلهه
مشيتي.. تبين.. طيحت العباس كسرتنه الجبيره
راح ابو فاضل بعد.. مايرجع الهه
هذا الخبر ماينحمل
عالمشرعه طاح النفل
ميت نزف من النبل
وسهم العده بعينه انكسر
محمد هادي العقابي
ضمي الشمع يم الولد
ضمي الشمع يم الولد
وحضري الجفن لبنج بعد
لاما اهم .. صار الحلم.. عندي الشهاده
ايفرح الگلب.. هذا الدرب.. أجمل عباده
يمه
......................
اني ادري الفرگه صعبه.. والحياة بدوني غربه
تحملي هواي المواقف يلحنينه
عنج امشي ياكسرتج.. لاتصديلي بدمعتج
شدي عزم ابنج لون اتودعينه
كل ثانيه.. اعليه تمر.. محسوبه من هل ساعه
ياوالده.. عمي اُمر.. واني عليه الطاعه
وبن الاخو. بوكت الشدد.. العمه يصير ذراعه
ودعيني يمه بلا دمع
تربات عمه ابنج سبع
ماانكسر.. طبعي جمر.. زايد عناده
ايفرح الگلب.. هذا الدرب.. أجمل عباده
يمه
........................
يمه لو ذبحوا شبابي.. لاتشمين بثيابي
مااريدن ينحني ضهرج عليه
گوي حيلج يالگويه.. هذا يومي والمنيه
ويفتخر كلمن تموته الغاضريه
كل البشر فوك الأرض.. المستشهد ايحسدونه
وبنج شهيد وفرحته .. حسين اليغمض عيونه
ابياض الوجه بالتضحيه.. يم الفخر ممنونه
وتباهي بيه للأبد
هل شبل من ذاك الاسد
وكت المحن.. ابن الحسن.. حقق مراده
ايفرح الگلب.. هذا الدرب.. أجمل عباده
يمه
....................
يمه عندي وياج كلمه.. خاف ارد طايح ييمه
تخيلي رديت بثيابي الجديده
مني لتكطعين ضنه.. شوفي دمي وكولي حنه
ينلجم گلبج عليه ما اريده
جاسم انه.. وبيمنتي.. سيفي وتجيج أفعاله
من كل نحر يشرب دمه روس الزلم تحلاله
لمن اطب وكت الحرب تترادم الخياله
باجر اعيدنه الزمن
وانزل بصولات الحسن
ماانهزم.. موت الزلم.. مو علوساده
ايفرح الگلب.. هذا الدرب.. أجمل عباده
يمه
.....................
راح اعوفج يالحبيبه.. حزمي گلبج للمصيبه
ال هاشم يمه ماتطلع سلامه
اني واحد من عشيره.. ومنحري المذبح مصيره
فتخري ببنج يفدي كل دمه العمامه
راية نصر.. طول الدهر.. مخطوط اسمي اعليهه
بسيفه نزل.. مثل الكمر.. كل كربله محليهه
الموقف يضل.. عايش ابد.. والزينه من يمحيهه
واكتب بسيفي نينوه
اترابج ضمه ومني ارتوه
لاما برد.. گلبي بعد.. أعلن حداده
ايفرح الگلب.. هذا الدرب.. أجمل عباده
يمه
.........................
يمه ودعيني بتأني.. شبعي شوف شويه مني
هاي بيني وبينج النضره الاخيره
ماتشوفيني بحياتج.. والله يايمه وغلاتج
اعليج گلبي مثل گلبج كله حيره
كسر الگلب.. أصعب امر.. لو راح منك غالي
موت الولد.. عالوالده.. يهضمهه ابد للتالي
واني احن.. الشوفتج.. يا جنتي وامالي
وداع الجسد ويه الگلب
ياهو اليحمله شكد صعب
شموعج طفت.. روحج خلت.. من السعاده
ايفرح الگلب.. هذا الدرب.. أجمل عباده
يمه
محمد هادي العقابي
موعد الاحرار
موعد الاحرار.. باجر ايصير اللقاء اويه المنايه
موعد الاحرار.. بكربله تبدي الحياة امن النهايه
يخيمتنه ونطوفك
نموت ومانعوفك
...................
الاهل عفناهم احنه.. يئغله من اهلنه
عمرنه بنصرتك نقطف ثماره
تجاره الدنيه بيهه.. بعد مانشتريهه
ينبضات الگلب حبك تجاره
نتنفسك يحسين.. ياهوه الريه العذب
وبصمنه بالجفين.. والله غيرك مانحب
المايعرف الحب الصدك.. غريب ايعيش
ياامان الناس.. ماكو بالدنيه امان بلاوجودك
ياامان الناس.. الله خالق كاعه والبيهه اعله مودك
اجيناك الطفوفك
نموت وما نعوفك
......................
عليك الباري صله.. وجودك رحمة الله
انخلقنه انصار الك يابو الشفاعه
حلمنه وكل املنه.. نشوفك راضي عنه
نصيح بمحضرك سمعاً وطاعه
يحسين الك انصار.. اعلينه تشهد نينوى
ماعدنه كل اعذار.. مايمر بيك الهوه
سبعينك بوكت الشدد.. غضب بركان
تمشي هل ايام.. والوحيد الخاسر الماشافه گلبك
تمشي هل ايام.. والله هنياله اليضل دوم اعله دربك
تنفسنه بحروفك
نموت وما نعوفك
...................
المنايه نعتنيهه.. ركض نركض عليهه
ولايرمش جفن عين اليحبك
الخدمتك كلش نكدر.. انتوذر ونتطشر
ايتضمد كل جرح لمن نندبك
واحدنه ثكل اجبال.. ماتهزه العاصفه
يامصنع الابطال.. علمتنه اعله الوفه
مانخلف وياك الوعد.. ينور العين
اليموت ايعيش.. انته غيرت الطبيعه وكلهه تشهد
اليموت ايعيش.. من تسد عينه بجفوفك ذكره يخلد
يمن سالم نشوفك
نموت وما نعوفك
......................
اجينه ايرف علمنه .. شنريد وانته يمنه
صرت وسط الگلب تسري بدمانه
قسم بالله وخيامك.. تطيح اركاب امامك
ولاينزل شبر واحد لوانه
جيش العده سبعين.. هل الوف محيره
أحياء بس ميتين.. دنيه خسرو وآخره
اصحابك احنه وبس الك.. يرفعة راس
ياحسين وياك.. كلشي واضح والأمل كله بطفوفك
ياحسين وياك.. احله ساعات العمر لمن نشوفك
نقبلهه جفوفك
نموت وما نعوفك
.......................
خبر جانه وسمعنه.. وبله عمايم طلعنه
حزينه ام الخدر كالو عليهه
للخيام اعتنينه.. نطمنهه بحجينه
وعرضناهه المواقف بين اديهه
هوسنه بالحك دوم.. مانطيح وننكسر
يا زلمه هذا اليوم.. يوصل احدود الخدر
من دمنه تربت كربله.. تصير اخضاب
لآخر الانفاس.. احنه انصار وخدم ونته ابونه
لآخر الانفاس.. مانزل عن هل درب لو كطعونه
علينه انته خوفك
نموت وما نعوفك
محمد هادي العقابي
يبني والموت الخذاك
يبني والموت الخذاك.. دمعي ماينشف وراك
يمذبوح يعبد الله
عايف احضان الرباب.. ونايم بحضن التراب
يمذبوح يعبد الله
........................
اناغيلك ييمه ومنخطف لونك
يالعطشان امك تنشد شلونك
وديتك ردت بميه يزكونك
جاليش بسهم سدوهن عيونك
شح عله شفاك الفرات.. ونته زينه الهل حياة
يمذبوح يعبد الله
عايف امك للعذاب.. ونايم بحضن التراب
يمذبوح يعبد الله
......................
يعبد الله ييمه ابيش تتعوظ
من شفتك طحت مابيه حيل انهض
كماطك مثل گلبك يالولد ابيض
وصاير كله دم منين ماينكض
يبني اسمع مني صوت .. لاتخليني وتموت
يمذبوح يعبد الله
نحرك بدمك خضاب.. ونايم بحضن التراب
يمذبوح يعبد الله
....................
اشم نحرك اريد شلون اشمنه
وعاين يجري دمك يالولد منه
يبو عطر الحلو يلشوفتك جنه
تعال بحضني نام بنومك اتهنه
بحضني اصيحلك تعال.. تجوي يوليدي الرمال
يمذبوح يعبد الله
امك اني وراسي شاب.. ونايم بحضن التراب
يمذبوح يعبد الله
........................
مهدك بالدمع هزيته واتلوه
خالي مثل حضني يالجنت سلوه
ذبل غصنك وبلكي بدمعي تتروه
صوابك حار يابو ضحكت الحلوه
ذبحوا الضحكه بسهم.. وزرعو بگلبي الألم
يمذبوح يعبد الله
ضامي جبدك يبني ذاب.. ونايم بحضن التراب
يمذبوح يعبد الله
.....................
خذت گلبي يعبد الله وخذت حيلي
اناغيلك ييمه وماتناغيلي
لتكول امي كامت ماتلوليلي
ماانساك ياتعبي وسهر ليلي
گلبي ماخلص حنان.. ومنك احرمني الزمان
يمذبوح يعبد الله
يمرد ابروحي المصاب.. ونايم بحضن التراب
يمذبوح يعبد الله
......................
سابع خيمه بالطف تسمع اونيني
ونسوان الخيم ركضت تعزيني
غيابك يبني طفه النور البعيني
الذبح نحرك يغالي ذابح اسنيني
يبني من حان الوداع.. من حياتي كلشي ضاع
يمذبوح يعبد الله
موتوا حلم الشباب.. ونايم بحضن التراب
يمذبوح يعبد الله
محمد هادي العقابي
كل عذاب الدنيا
كل عذاب الدنيا بين عيوني
واهلي ماردو عليّ عافوني
...............
بالغرب ضليت انوح امن الالم
فاطمه آنه العليله ودمعي دم
حسبت وياهم اكعد بالخيم
بدمعتي وهم الگلب خلوني
...............
هل محرم وانه هل بيه الحزن
والدمع ماخله عين ولاجفن
عالاهل ليلي اخلصه وبس اون
من مشو بفراكهم اذوني
.............
احسب ايام السفرهم وانتضر
كاعده وكبالي كعدت الصبر
اخلاف ابوي حسين مايسوه العمر
والحزن غيّر ارسومي ولوني
................
كمت اصد للدار مابيهه ضوه
ويجوي گلبي من يهب حته الهوه
راحو اهلي الجانو العلتي دوه
عني بعدو وادري ماينسوني
.................
عله الباب انضر ودلالي انمرد
علي الاكبر جنه مايرجع بعد
آنه ابوي حسين منطيني وعد
كال اوديلج علي امن اضعوني
.................
كل حلم ماضل بعد واتأمله
ولا صبر ينفع اويه الراحو هله
اهلي كلهم ماخذتهم كربله
وهذا حالي وعذبتني اضنوني
محمد هادي العقابي
خدام اجينه
خدام اجينه بدمعة العين
وعندك دمعنه ينحسب دين
هذا العهد عدلين ميتين
ماعدنه غيرك والله يحسين
......................
حسين حبك بالگلب هوه الجمعنه
وبس عزائك ياابو الاكبر يلمنه
برحمتك وبكل سنه تجمع شملنه
مجلسك ندعي الله لايحرمنه منه
ننصب عزائك وسط الگلوب
غالي وتضل بس انته محبوب
نبقه بخدمتك طول السنين
ماعدنه غيرك والله يحسين
.......................
احنه عشاكك وحك دمعت رقيه
وتشهد النه كربله والكاضميه
ياحسين ونقسم بحامي الحميه
مانعوف امصيبتك حد المنيه
نمشي اعله دربك لآخر أنفاس
حامينه جف البطل عباس
لوما خدمتك نمشي لاوين
ماعدنه غيرك والله يحسين
........................
عشنه غربه ودوم نتخيل غربتك
ياامان الدنيه خلينه بخدمتك
نشكر الله بكل گلب صارت محبتك
بيدك الأرواح ترزقهه بدمعتك
ترزقنه دمعه وگلب مكسور
وتشد حزمنه بشهر عاشور
وبكل سنه من المعزين
ماعدنه غيرك والله يحسين
..........................
والله هنياله اليجلب بالخدامه
ايعيش طول العمر هيبه وعالي هامه
خدمتك يحسين مابيهه ندامه
خادمك وجهه ابيض ابيوم القيامه
انته الشفيع بيوم الحساب
والخادم تحط بيده الكتاب
نحجيها كلمه وماهي اثنين
ماعدنه غيرك والله يحسين
............................
نحجي من الگلب يمك ياولينه
بس خدمتك سيدي لاكت علينه
انحبك وغيرك ابد لاما هوينه
والنجاة اوياك يااوسع سفينه
بالدنيه شفنه أشكال وهواي
ومثلك ابد ماشفنه مولاي
واضح طريقك سيدي وزين
ماعدنه غيرك والله يحسين
محمد هادي العقابي