كلمات قصيدة يا صديقي محمد الجنامي مكتوبة كاملة
قصيدة :- يا صديقي .
كلمات :- الشاعر وسام الشويلي .
أداء :- الرادود محمد الجنامي .
🖤💛💛🖤
بشر عاشت وهم يا صديقي
عمر خلص عشك مو حقيقي
انصحك و التزم يامن كلت وين الصدك
تره الحب النقي والمنطقي وكل عشك
للــحــســيــن ... للــحــســيــن
🖤💛💛🖤
اسولف يا صديقي و الحديث اهواي
ضميري البيه يحجي مو مجرد رأي
شفت بعض البشر مبداها رايج جاي
مشوا خلف السراب وما رضوا بالماي
بعضهم يرفض ايحاور
بعضهم مضطرب حاير
بعضهم خائن و غادر ... درب شيطان
و يگلك آنه درب الله
ولكن بس ذبح شغله
و اگلك صلى ما صلى ... الى الخسران
يحبونه اشعجب هذا قاتل
و يكرهون الذي رحمه شايل
آنه ابهيجي بشر ما أعترف لو تنطبك
تره الحب النقي والمنطقي وكل عشك
للــحــســيــن ... للــحــســيــن
🖤💛💛🖤
اكو ضايع اخذرك تتبع ممشاه
و اكو طايح يريد يطيحك وياه
صديقي وداعتك هيه الحقيقه اهنا
حسين وماكو غيره ايوصلك لله
تعال ابوابه مفتوحه
تطلبه وينطي من روحه
وحكه يترك اجروحه ... ويعالج بيك
اكول الضيعه اشيلكه
بدونه المدنيه مختنكه
الحسين اخيامه محتركه ... وسكن منطيك
اليشبهه دورت ما لكيته
و اعرفه اليدعي وما هويته
اذا غيره احب فترة زمن هم نفترك
تره الحب النقي والمنطقي وكل عشك
للــحــســيــن ... للــحــســيــن
🖤💛💛🖤
عشت آنه و شفت واتمعنت بالناس
و دخلت ابكل تجرد عالم الاحساس
ردت أهل العشك اوضعهم ابمقياس
الجميع اتساقطوا يم حضرة العباس
لكيته ابموقف الخوه
عرفته ابساعة النخوه
اشحلاته من ايده يتروه ... النهر و الماي
عجيبه اقتنعوا ابغيره
چفوفه الخلقت الغيره
حسيني بكل تعابيره ... صفاته اهواي
وفي وكله صدق وي حبيبه
شفت جفه نهر يجري طيبه
نهر يروي البشر وابكل زمن فرعه يطك
تره الحب النقي والمنطقي وكل عشك
للــحــســيــن ... للــحــســيــن
🖤💛💛🖤
كلب واحد تره بداخلنه مو كلبين
ومنو اليستاهله بهالدنيا غير حسين
تعال و هسه قرر و اترك البعدين
تره الزين ابحياته ايدور اعله الزين
شكلك لو خل كلبك
تحبه والله اليحبك
بوجوده تشعر بدربك ... امان و خير
حبيبك مو بشر عادي
حبيبك مهجة الهادي
اتبعه اشما مشه ابوادي ... واعوف الغير
نعم بالمختصر ماكو غيره
إذا شح الزمن يبقى خيره
على جروحك دوه ويفزع هوه من تختنك
تره الحب النقي والمنطقي وكل عشك
للــحــســيــن ... للــحــســيــن
🖤💛💛🖤
احبه اليبقى خالد و الزمان ايروح
احبه السكت الدنيه ابنحر مذبوح
نعم شبه لهم فوك الترب مـطروح
و اشوفه اعله السمه رايه كرامه تلوح
لكيته اعله العرش صاعد
عرفته اعله السمه قائد
شهيد و عالظلم شاهد ... يظل حسين
سليب و لبس المله
كرامه ومارضه ابذله
كتاب و مرسل و قبله ... نشوفه العين
الشمس يمه اجت كلها غيبي
تناديه السمه يا حبيبي
و ازيدنك علم كلبه الهوه بسمه يدك
تره الحب النقي والمنطقي وكل عشك
للــحــســيــن ... للــحــســيــن
🖤💛💛🖤
تعال و خل اسولفلك على عاشور
بأبو اليمه العطش صاير جمر تنور
سهم يعگب سهم لمن وگع معذور
وحيد وبالخيم صيحة بنات خدور
اويلي ابساعة المقتل
يعاين زينب اعله التل
تحشم و الشمر حول ... يگص بالراس
اشتسوي الذبحوا ابن امها
اجوها و حركوا اخيمها
الف وسفه الشمر يمها ... عگب عباس
اشكثر غالي الاخو ابدمها يمشي
بحيث اتحملت لجله كلشي
خيم نادت خيم صوت ارتفع وكت الحرك
تره الحب النقي والمنطقي وكل عشك
للــحــســيــن ... للــحــســيــن