كلمات قصيدة لوبيدي يحسين جنت أظل يمك مكتوبه كامله
لطمية لوبيدي يحسين جنت أظل يمك
لوبيدي يحسين چنت أظل يمك
واتوسد وياك واسبح بدمك
يابن أمـي يالحال الأجل بينك وبيني
بصوت الـمصـيبه .... تنـادي الـغـريـبه
ــــــــــــــــــــــــــــــــــــــ
يالچنت عايش بگربي ويالچنت عايشه بگربك
هاك إخذ يحسين گلبي خويه يالمصيوب گلبك
هاك إخذ يحسين عيني يابن ابويه وشوف دربك
گوم إنـهـض إنـظـر حـالـتي
ياضوه عيوني وسلوتي
يـابـن أمـي حـرگوا خـيمتي
من الخطر فريت يمك
خويه إگعد وشوف ..... حال الـفـواطـم
مــتـحـيـره تـصـيـح ..... ويـن الـهـواشـم
مـتصل ونها بـونـتي .... دسـمـع ونـيـني
بــصـوت الـمـصـيـبـه تـنـادي الـغـريـبـه
ــــــــــــــــــــــــــــــــــــــ
من مشيت اودعـتني ومن بعد دمع الموادع
ظلت عيوني على دربك وچنت أظن يحسين ترجع
وساعه لن مـهرك يخويه يصهل وگلبي تگطع
فـريـت إلـه بـالـعـاطـفه
وروحي لصبرها موالفه
وبـهـالـهـمـوم مـكـلـفـه
وسباح دلالي تگطع
هـاك إخـذ گلـبـي .....وانطـيني گلـبك
وانه ابگه بعــداك .... يــرعــانـي ربـك
وياريت يابن أمي الحجر .... صكني بجبيني
بــصـوت الـمـصـيـبـه تـنـادي الـغـريـبـه
ــــــــــــــــــــــــــــــــــــــ
فر دليلي على المعاره والجدم يسبگ خيالي
وگبل گلبي الروح فرت هـايـمـه تدور الوالي
وسمعت صوت المصيبه من النحر يصرخ تعالي
شـوفـي يـزيـنـب حـالتي
راسي إنفصل عن جثتي
وتـكـفـلـي إنـتـي بعيلتي
وصارعي جور الليالي
خل دهـري وعداي ... وجور الـلـيالـي
ومن عگب عيـنـاي ... بـاري اطـفـالـي
أصـبر يخويه والصبر.... حـسـبي ومعيني
بــصـوت الـمـصـيـبـه تـنـادي الـغـريـبـه
ــــــــــــــــــــــــــــــــــــــ
تكفلت يحسين مـنك والمصيبه تكفلتني
صوبك سهم الـمـنيه والـشـمـاته صوبتني
ريت تنظر يابن ابويه للمصيبه الدوهنتني
وتـشـوف بـعـيـون الأثـر
مالومه من جور الدهر
مـابـيـن عـدوان وخـطـر
والـمـصـايب المتني
من طحت يحسين .... سـلـبـنـي دهري
وبـس دمع عـيـناي .... من عيني يجري
يابن أمـي اتـستر دمي ... بچفـوف إديـنـي
بــصـوت الـمـصـيـبـه تـنـادي الـغـريـبـه
ــــــــــــــــــــــــــــــــــــــ
بـعيني أباريلك عيالك يابن أبويه وعنها ادافع
بـين فگدك والمصيبه يـا عـزيز الروح انازغ
بـالـصـبـر طـفـيـت الـبـلگلـب مـو بالمدامع
وسـلـيـت حـزنـي بـدمعتي
وداويت علتي بغربتي
واسـرار سـبـيـي بـمـهـجتني
وبهضيمتهن اطالع
صــوبــك يـحـسـيـن ....سهم الـمـنـيه
ومـاظـل ولـي وياي .... بـالـغـاضـريـه
سـهـم الشماتـه بالگلـب....... هـيج حنيني
بـصـوت الـمـصـيـبـه.... تـنـادي الـغـريـبه
ــــــــــــــــــــــــــــــــــــــ
راح ارد يحسين عـنك للشماته بدمع عيني
مسيت من بعدك غريبه بلا خدر ومسلبيني
باليمين الزم دلـيلي وباليسار أستر جبيني
مـابـيـن عـيـلـه مـسـلبه
واطفال تبچي معذبه
وبـيـن الـخيام الـلاهـبـه
زاد يابن أمي ونيني
مــاظـلت خـيـام .. من عگب عـينك
حرگوها يـحسين .. وفـرت بـنـيـنـك
حاربـت صبري وبـالصـبر .... ثـابت يقيني
بـصـوت الـمـصـيـبـه .... تـنـادي الـغـريـبه
ــــــــــــــــــــــــــــــــــــــ
نـام وتـهـنـى بمـنامك وانـه الـعـيال إكفلتها
وانـه بچفـوف الـمصيبه بـالـمـحامل ركبتها
بالعمى ياريت عيني وريت جثتك ما شفتها
بـجـمـر الـمـصـيبه ترعرعت
چم نايمه بالطف شفت
چم نـار آنـه شـاهـدت
دمـعـة عـيوني طفتها
مـن دمعـي ارويـك ... وأخضب بدمك
واتسلى يـحـسين ... مـن احـن يـمـك
وعلى الـيتامه الـسـاهـره.... خل تظل عيني
بـصـوت الـمـصـيـبـه..... تـنـادي الـغـريـبه
------------
المرحوم الشاعر
عبد علي الخاچي الكربلائي