كلمات قصيدة بين المشرعة وزينب مرتضى حرب مكتوبه كامله
لطمية بين المشرعة وزينب مرتضى حرب
بين المشرعه وزينب روحي بحيرة صارت
من صاح الگمر خويه يا خويا منهن التفت
صوت الأخو لصوت الأخت روحي بحيرة صارت
ـــــــــــــــــــــــــــــــــــــــــــــ
ذيچ الحيره تفرهد حيلي وين امشي واتبع يا صوت
لمن صارت چلمة خويه اثگل من سكرات الموت
خايف ارد صوب الخيم ويموت اخوي لوحده
وخايف اروحن للنهر والگه الخيم متفرهدهه
يا صوت چتفني وبقت بالحيره روحي مگيده
حسيت هذا فراك اخو وخايف يشوفونه العده
خطوات الدرب صوته اخذن حيلي كله
وخلصت الدرب حاير من اوصل شگله
ما اعرف شلون اوصلت
لياخويه منهن التفت
روحـي بـحـيـره صـارت
ـــــــــــــــــــــــــــــــــــــ
امشي واتخيل ملگانه وجدمي تعثر بالچفين
چفوفه المتعود يفتحهن كلما يسمع صوت حسين
شو مختلف طبع الگمر من للملگه ما فاتح حضن
چي ما عرفني من اوصلت ضل ياكل بگلبي الحزن
گتله انه الحسين وبچه گلي السهموكض الجفن
خويه اگعد اختك تنتضر وگليبه لطولك يحن
عنك اخرتني اختك يا كافل حمله
تتنطر مخليهه من ارجع شگلها
واعذرني خاف تأخرت
ليا خويه منهن التفت
روحـي بـحـيـره صـارت
ــــــــــــــــــــــــــــــــــــــــــــ
اول مره اصفن بعيونه شگد بيهن دم بس حلوات
ما غير كشختهن موته والنور البيهن ما مات
ما اجمل عيونك گلت رغم الدمه ورغم السهم
چلمه انتفض بيه الوعي من بين كل هذا الألم
باقي بجمالك من متت وجفونك المتروسه دم
الموت شو ما غيرك يالغيرت وجه الخيم
گوم بداعت الخوه شوف الينه صاير
ما اگدر اضل وحدي بهاي الغربة حاير
وانه بسبب موتك حرت
ليا خويه منهن التفت
روحـي بـحـيـره صـارت
ـــــــــــــــــــــــــــــــــــــــ
شلون مچان الكافل ينسد وارجع للخيمه بلياه
لو مازينب تتنطرنه چان احضنته ومت وياه
يا حيل ارد صوب الخيم محتاره اسولف يا عذر
وشلون اضل واگف عدل من الگه زينب تنتضر
ضل ينعبر حته العطش بس طيحتك الماتنعبر
هوه اليفارك هيچ اخو معذور اذا رد منكسر
فراك الكافل يبين مو بس بالملامح
من ارجع جرح فگده حته بضلي واضح
بطول الخيم من اوگفت
ليا خويه منهن التفت
روحـي بـحـيـره صـارت
ــــــــــــــــــــــــــــــــــــــــــــ
رديت امشي بدون الكافل كلما ابعد عنه اندار
گتله بفرگك ياضي عيني تتگرب لخيامي النار
من ارجعت محني الضهر بعد الدرب بين علي
مرات عالسيف انتچي ومرات اضل افرك بدي
ما بقت راية هاشمي عن الشمس تكسرلي في
اله ابچي عيني بفرگتك ويطيح عالخد الصبي
من كل مصرع بحيره ارجع بيدي گلبي
بس من مصرع الكافل صار شطوله دربي
لا گلب لا حيل ارجعت
ليا خويه منهن التفت
روحـي بـحـيـره صـارت
ـــــــــــــــــــــــــــــــــــــــــ
خليت الدم اعله عيونه خاف يشوف شراح يصير
ما قصر ومن ابقه بوحدي ما اريده يحس بالتقصير
من انولي بين العده ما اريده يدري بحالتي
اني اعرف اطباع الكفو الخلص حياته بخدمتي
لو شافني بهذا الوضع دم راسي بلل لحيتي
ينذبح مرتين الگمر لو شاف بالطف غربتي
عفتها عيونه مسدوده خاف يصدلي بيهن
من انذب وخيامي كله تهد عليهن
وضليت بالحيره ومتت
ليا خويه منهن التفت
روحـي بـحـيـره صـارت
ـــــــــــــــــــــــــــــــــــــــــــــ
القصيـدة : بــيــن الــمــشـرعـه وزيـنـب
اداء الـرادود : مـرتـضـى حـرب
كلـمات : عـبـاس كـريـم
الكـاتبـه : فـاطـم حـرب