كلمات قصيدة سر خلودك باسم الكربلائي مكتوبة كاملة
📜:سر خلودك
✒️:ناظم الحاشي
***
سِر خِلودَك مِن قيودك
ما يگدر السَجّان
يحجِب ضوه القُرآن
▪️▪️▪️▪️▪️
سجانك يگدَر ياموسى
عن جسمك منع الانفاس
لكن لا ما يگدر يمنع
ضي افكارك عن الناس
لاء حسين ابدمك تجري
وإبصبر حسينك تنقاس
يالراسك من كِثر الغيره
شايلته چفوف العباس
وإنته غِيره من ضميره
حاربتو كِل شيطان
يحجب ضوه القُرآن
▪️▪️▪️▪️▪️
من جابوك السجن البصره
ماهزّو بيك الايمان
يا أوّل مسجون إنشوفك
من عنده ايخاف السجّان
خايف منك وانته إسلاحك
سِجّاده وتربه إوقرآن
يعرف بلسانك من يدعي
حد السيف إيصير إلسان
رَب سمائَك من دُعائك
حارب جميع إنسان
يحجِب ضوه القُرآن
▪️▪️▪️▪️▪️
ليش إتخاف إتگِلّه الوادِم
من موسى وگلبك موجوع
گلهم موسى إيطَيْح السَبعه
لوطاحت من عينه إدموع
من موسى الكاظم خلصوني
من شافك چفّك مرفوع
ماتدرون إبعمّه إشسَوّه
يوم الطف إبچَف مگطوع
وَحدَه رَدهه إبكِل عَدِدهه
من راد إبِن سُفيان
يحجب ضوه القرآن
▪️▪️▪️▪️▪️
ضَعْن الجابَك من البصره
شايل ضدك چان أحقاد
بيدَك وبرجليك وراسك
خَلّو ياموسى الاصفاد
چَنّك مِثْل الاسرى الراحو
للشام إبلا ماي وزاد
ظلمه إومن طَبّيت إبنورك
شَعّت وإتباهت بغداد
وإنته بيها طَب نبيها
والبيها حاكِم كان
يحجب ضوه القرآن
▪️▪️▪️▪️▪️
من جابوك السجن السِندي
هذا الغدّار الملعون
خَلّاك بأظلم طاموره
من گالو موسى المسجون
صوتك ناده الرب بدموعك
وأملاك الباري إينادون
ياربي إلعن كلمن يرضه
بأفعال الحاقِد هارون
نِدري قَدرَك طاعَةْ أمرَك
والخالفك خَسران
يحجب ضوه القران
▪️▪️▪️▪️▪️
سِجنو من سجنوك العِتره
من ياسين الحَد القائِم
إوچَن حيدر مسجون إبگبره
وإنسِجنَت وَي سِجنَك فاطِم
سَمّوك إوضَنّو يخفونه
موتك وإيبَرّون الظالِم
ملعون اليدري إومايشهَد
مات إبسِم هارون الكاظِم
وِ اليِريدك إيده بيدك
والينشُر الأضغان
يحجب ضوه القران
▪️▪️▪️▪️▪️
أيام إتلاثه إمخلّينك
شِمّاتك جِدّام العين
سَوَّو بيك إسوايَة جَدّك
من داست صدره الرجلين
إنتو إثنين إودمنه إيحبكُم
وأوّل مرّه إنحِب إثنين
من إنشوف إحسين إنشوفك
إولو زِرناك إنزور إحسين
ماكو مِنكُم هذا حبكُم
والحُب بِلا بُرهان
يحجب ضوه القران
▪️▪️▪️▪️▪️
گَضّيت أيامَك بالغُربه
من غُربه الغُربه إبدنياك
وإيضنونَك وَحدَك لكن
يالكاظِم چان الله إوياك
سَمّوك إوضَنّو ينهونَك
بس كعبه الخالق خَلّاك
مو بَس اليمشي إبرجلينه
حتّى اليزحف يتعنّاك
ما نِعوفَك مِن نِطوفَك
نِتحدّه كل طغيان
يحجب ضوه القران