كلمات قصيدة مو بس أخوة تلبي النخوة باسم الكربلائي مكتوبه كامله
القصيدة: مو بس اخوة
الشاعر: جابر الكاظمي
اصدار: انها تقول
***
مو بس إخوه...اتلبي النخوه
إخوه و أولاد و أنصار
هذا الثاير... واكِف حاير
يا فارس منهم يختار
🔸🔸🔸🔸🔸
ما تطفه الحرب الملتهبه
دوران الميدان ايدور
بين الحق و بين الباطل
بين الظلمه و بين النور
و حسين أعلن هاي الثوره
ضد الباطل ضد الجور
فزعت كل أهله و أنصاره
اتريد اويه المظلوم اتثور
كلها اصطفت...بيه احتفت
و استلت بيض الأشفار
مهجة حيدر...فكره اتحير
يا فارس منهم يختار
🔸🔸🔸🔸🔸
صاح المظلوم آنه الأول
أدخل سوح الإستعداد
و لو ضحيت ابروحي
و دمي تتقدم بعدي الأولاد
من بعد الأولاد إخواني
اتواصل درب الإستشهاد
والأنصار آخر من يبرز
و ايقاوم جيش إبن ازياد
صاحوا كلهم ...صرخات إلهم
رددها إلسان الأحرار
صفوه و تهتف ... و انته التعرف
يا فارس منهم يختار
🔸🔸🔸🔸🔸
من كل جانب صوت ايصّدح
احنه الصفوه البايعناك
عفنه اديار و مال و دنيه
و جينه ابلهفة شوق اوياك
كلما تطلب كِلنه بأمرك
بس هالمطلب خالفناك
ما نقبل تتقدم إنته قبل
إدمانه اتضحي إدماك
الصوب أنصاره ... ايدير أنظاره
نظرة مذهول و محتار
يتأملهم ... و يصد إلهم
يا فارس منهم يختار
🔸🔸🔸🔸🔸
ابنظرة حاير ظل يتأمل
صفوه و كلها اعزاز اعليه
ايقدم عابس لو جون أول
لو إبن اليقين ايضحيه
لو يعرض أسلم لو شوذب
للموت و بيده ايوديه
لو قائدهـم ظنوة ظاهر
للحرب ايسلمه و ينطيه
ايصد ابعابس ... ابنظرة يائس
و لإبن القين ايدير أنظار
ايصب العبره ... و حاير فكره
يا فارس منهم يختار
🔸🔸🔸🔸🔸
أول هجمه الصارت بالطف
خمسين أهوت عالتربان
و حسين ايشاهد أنصاره
ظلت بضعه امن الفرسان
صارت تبرز واحد واحد
و الموت ايخيط أجفان
اهناك و لن خلصت أنصاره
و ايشاهد بس الأبدان
ايصب ادموعه ... حاني اضلوعه
ينظر لجسوم الأبرار
حاير إلمن ... أكـثر يحزن
يا فارس منهم يختار
🔸🔸🔸🔸🔸
اتوزعوا كل صنديد ابمصرع
ماتوا أحرار و أكرام
هاشم صاحوا إلنه الجوله
ضرغام ايحفز ضرغام
العباس و عبد الله و جعفر
عثمان و عون و جسام
و الأكبر بالغيره اتسلح
و ابجفه ايلوح الصمصام
اتريد اتحارب ... صفوة غالب
برزت فتيان الكرار
حالة اتحير ...ظل ايفكر
يا فارس منهم يختار
🔸🔸🔸🔸🔸
أول فارس عقب أنصاره
عالأكبر شارت يمناه
ضحه بأهله الناس القلبه
إبنه اليملك لب إحشاه
طاح إقبال اعيونه الأكبر
من اجروحه اتسيل إدماه
جفّن جسمه ابثوب
الحسره و ابقلب الوالد مثواه
ابدمع أحزانه ... ايشوف إخوانه
اعيون إلهم تتجادح نار
قلبه اتأثر ... عقب الأكبر
يا فارس منهم يختار