كلمات قصيدة يمضموني الحاج باسم الكربلائي مكتوبه كامله
كلمات الشاعر : إيهــاب المـالـكي
---------------
يَمضموني .... وضوة َعيوني
انا بحُبـك صرت حي
انا بـدونك ولا شي
يَمضموني ..
*********************
قبل خلقي ندائك صوتي لباه
حسيناً وا حسيناً وا حسيناه
احس گلبي يتيم من الظعن تاه
يالمثوب عيالك كلها لله
امن ازورك روحي تهمس خلني وياه
اعله شباچك تصد تأشر هنا
يحنيتي .. ونفس ريتي
لگيت ابروحك الفي
انا بـدونك ولا شي
يَمضموني ..
****************
افزعك عالثگال ايصيرن اخفاف
انه الصفر القبل ما انتَ تنضاف
يمنصف وانتَ المعلمني الانصاف
اضمك وانتَ بين ضلوعي تنشاف
لأني ابظهري احسك كلشي ماخاف
ابد ماعلمتني مسح الاچتاف
يـ عنواني .. يـ وجداني
يالاسمك يرعب الغي
انا بـدونك ولا شي
يَمضموني ..
*******************
انا مهدد عرشهم وانه مجروح
نظر عين الطغاة على اسمك يروح
المخوفهم انتَ وانتَ مذبوح
يكتبون اعله اسمك غير مسموح
يـ عطر الله الاشمه ابكربلا ايفوح
احس تنطيني منك للصبر روح
إذا اعوفك .. ولا اشوفك
اظل نبتة بلا ري
انا بـدونك ولا شي
يَمضموني ..
*******************
اذا تنشف دمعتي ابعيني فترة
اجدي ادموع عيني گطرة گطرة
اشوفك نسمة تخطف لمن اقرة
اصيحن بالمجالس نظرة نظرة
حلم دوم امن اجيك ابالي يطرة
تصبح يم ضريحك روحي شجرة
يـ معشوگي .. جمـر شوگي
ازورك وابرد اشوي
انا بـدونك ولا شي
يَمضموني ..
********************
نعيتك ياحبيبي من أول صيار
خيام اهلك تراها شبت ابنار
شمر سلب مضيفك ماهو خطار
تخوصر عالدلال ابجتل الكبار
يأرثي المن ابوي ابالي تذكار
ابخدمتك بالزيارة اموزر اوزار
يـ كل روحي .. دوة جروحي
يـ بلسم ماصرت كي
انا بـدونك ولا شي
يَمضموني ..
****************
لگيت ابمحتواك لكلشي عنوان
چنت ثورة ورسالة لكل الاديان
لگيتك تفدي طفلك لله قربان
وما كان جزائك إلا الاحسان
شفت دور الاخوة ابحربك اشجان
سمعت اعظم حوار ابين الاخوان
وكت موته .. اسمعت صوته
يگلك فدوة يا خي
انا بـدونك ولا شي
يَمضموني ..
***************
لو عايش بدونك چا صرت وين
اصيرن مدري ياهو بدون الحسين
اوصل للحقيقة اخلافك امنين
واتخطى اليضر واعرف الزين
هو انا الحياة اعرفها بـ ثنين
جرح صوتي عليك ودمعة العين
حزن ليلي .. وتفاصيلي
يقصة رحلة الضي
انا بـدونك ولا شي
يَمضموني ..
***************
يمهذبني واعفي مو تقية
مارد عالطياح الماله دية
اعرفه اليتهمني ويحچي بية
نسل من باگ ترچية رقية
انا ربات الكفالةالهاشمية
ذاكَ الخله روحه بچف اخيه
يأعمالي .. يآمالي
لمنّ يطوى السجل طي
انا بـدونك ولا شي
يَمضموني ..