كلمات قصيدة تمهل ايها الليل الرادود باسم الكربلائي مكتوبه كامله
لطمية تمهل ايها الليل الرادود باسم الكربلائي
اعله مهلك يليلي...أودّع خليلي
تمر بالثواني...رماح بدليلي
حبيب و حبيبه ...وداع و مصيبه
رماح بدليلي
***
عله مهلك يليلي بالله لا تگصر
فجر باجر يليلي خله يتأخر
نريد إنشوف باجر نسلك ابيا بر
عله انحور الهواشم تنظر الخدر
دموع و نياحه ...بعد ما كو راحه
اليودع حبيبه ...يظل وي جراحه
منيته قريبه ...وداع و مصيبه
رماح بدليلي
***
يليلي كل خيمنه اليوم مر بيها
كل وحده تون لوداع واليها
إبدي امن الرباب إسمع نواعيها
طفل عطشان عدها و ينظر اعليها
يليلي إنظر إلها ...دموعك تهلها
إذا ما ترّوه ... اشيسكت طفلها
تره جف حليبه ...وداع و مصيبه
رماح بدليلي
***
تعال و شوف رمله و اسمع الونه
حلمها امن العمر بس جفها يتحنّه
تعب ذيج السنين اشحصلت منه
و اسيوف العده باجر يقطعنه
يمحبوبي باجر ...تزفك عساكر
تطفي شموعك ...رماح و بواتر
جفوفك خضيبه ...وداع و مصيبه
رماح بدليلي
***
يليلي إنظر وداع الأكبر و ليله
دشوف اوداعهم و امعاتب الليله
تظل ساعه تعاتب ساعه تشكيله
تصيح و مره تسكت مره تحجيله
سهرت الليالي ...حملت الجرالي
حسبت المشيبي ...توافي يغالي
ليالي العصيبه ...وداع و مصيبه
رماح بدليلي
***
يليل العاشر بممشاي تابعني
و شوف اشلون أبو فاضل يودعني
أريد أنحب إگباله و خله يسمعني
و أحلفه بدم أبونه لا يضيعني
إهو الدگ لي صدره ...أبد ما أعذره
بوعوده و كلامه ...يليلي أذكره
أصّبح غريبه ...وداع و مصيبه
رماح بدليلي
***
أريد أوصل كفيلي و أنتحب يمه
أعرفنه غيور و يحترگ دمه
أگله إشلون من يطيح أبو اليمه
عله زينب تشوف الناس ملتمه
يراعي الحميه ...أروحن سبيه
يضربوني خويه ...و أشاگف بيديه
أسيره و سليبه ...وداع و مصيبه
رماح بدليلي
***
بعد لحسين خلي انروح يا ليلي
تصيح اوياي أريدك لو صحت ويلي
ها يحسين إجيتك إگعد احجيلي
أريد أبجي اعله صدرك و انت تبجيلي
أبويه الفگدته ...بعدهي جمرته
جنت من أذكره ...تصبرني انته
تغيب المغيبه ...وداع و مصيبه
رماح بدليلي
***
يبت أمي العزيزه لا تأذيني
لا تعذبين گلبي البيه يكفيني
أوصيج ابوصيتي خويه سمعيني
إذا جن ليل باجر ما تشوفيني
عدوي اعله صدري ...يحز سيفه نحري
مهم عندي خدرج ...يزينب اصبري
مصابج عجيبه ...وداع و مصيبه
رماح بدليلي
***
للشاعر : السيد عبد الخالق المحنة