كلمات لطمية لا تبجين | مسلم الوائلي

 كلمات قصيدة لا تبچين | مسلم الوائلي مكتوبه كامله

لطمية  لا تبچين | مسلم الوائلي

قصيدة: لا تبجين 

 أداء: مسلم الوائلي 

 كلمات: حسن الترابي 

~

حسين .. حسين .. حسين .. حسين

~~

وصلنه الكربله والليل خيم عالگلب توه 

سير يمي اخوي حسين شلونج گلي يم خوه 

گتله بخير كون ابخير طولك يا ابو المروه 

ابتسم بس طاحت دموعه عليمن گتله ما تسوه 

خويه ليش .. 

خاطر تطيح دموع من احجايه 

خويه ليش .. 

گلي يخو العلويه شنهو الغايه 

خويه ليش ..

شلعان گلب اختك بده من هايه 

البعيونك .. يحسين غير السانك 

البعيونك .. ضميتهن بردانك 

~~

گعد بالخيمه يتحسر عصر گلبي وعصرت ايده 

شبگته وگتله يبن امي عليمن شنهو التريده 

وگف جنه برمح مشيول لزم گلبه وحجه بهيده 

باجر والحجي اتكسر ودار عيونه لوليده 

حيلي راح ..

ما جنها تگضي بخير هاي الليله 

حيلي راح .. 

يودعني جنه يريد وانه اشكيله 

حيلي راح ..

گد ما بجيت عيوني فوگ الشيله 

شد راسي .. بحجايه منه وحاير 

شد راسي .. بالله كريم الباجر 

~

بده يسولف واجه العباس وگتله اتفضل مشكر 

سلم ونحنه اعله حسين باسه بجفه والمنحر 

وحجه حسين ووصل للماي انهظم عباس وتغير 

سكتنه وغيض جاس العين وطگ عرج الزلم وحتر 

بغيضه گام ..

وگعدته گوه وگتله خويه احجولي 

بغيضه گام ..

من اولها يهلي ليش ما گلتولي 

بغيضه گام ..

زعلانه زينبكم وحل سوولي 

زعلانه .. موش انه التبات بزعل 

زعلانه .. يحسين باجر وين اضل 

~

عصر جف اعله جف واندار وبين ظهره الي مكسور

وصاني ابناته وگال باجر عالذبح مجبور

باجر خيل تسحگ خيل فوگ حسينج بعاشر 

وصوت ضلوعي لخيامج يوصل وانه اون معذور 

للخيمه .. 

خيل التجي باجر صعب ملگاهن

للخيمه ..

دمي بحوافرهن يجي وياهن 

للخيمه .. 

ارد اعتني وضلوع اخيج ماهن 

يا زينب .. مو هينه بس شبيدي

يا زينب .. يذبحون حته وليدي 

~~~

بجه ووصاني بيتامه ونعه روحه گبل يومه 

مسح راسي ومسح نحره وبدت تتغير ارسومه 

يزينب باجر اتحشمين اخوتج عالترب نومه 

يعثرج مستحه اركاضج وعزيزج سلبوا هدومه 

لا تجين .. 

جوه الزلم والخيل بالطف باجر

لا تجين .. 

راسي برمح وضلوع مني بحافر 

لا تجين ..

شما تلتفت عينج بكبر العاشر 

لميني .. ودوري التراب عليه 

لميني .. ما ضال بس شويه