كلمات قصيدة كل ما أشوفك الرادود باسم الكربلائي مكتوبه كامله
لطمية كل ما أشوفك الرادود باسم الكربلائي
كلما اشوفك بالطيف ㅤㅤلازم تهب نسمه صيف
من نومتي تصحيني
ما ادري يلغالي شصار ㅤㅤلا هدهد يجيب اخبار
وانه الهجر ماذيني
وانه الهجر ماذيني
ـــــــــــــــــــــــــــــــــــــــــ
يلنايم بعيني حزن ㅤ ㅤبالصدفة يغمضلي چفن
واصرخ مثل گلب الجرحتة
ناحن حمامات السفر ㅤㅤوبناظري جمره ومطر
ليله بالف ليل السهرته
ارجع ولو ساعة ردت ㅤㅤ خاطر اگلك من رحت
چم خاطري بخاطر كسرته
يابو الوفه يل مبتعد ㅤㅤ تترك عليله وما ترد
ولا گلبك يحن على بنته
بلا شيصبرني عليك ㅤㅤ لا اندل واوصل ليك
وبغربتي مخليني
ضليت ادور تذكار ㅤ ㅤولا هدهد يجيب اخبار
وانه الهجر ماذيني
وانه الهجر ماذيني
ـــــــــــــــــــــــــــــــــــــــــــــــــــ
ضل يدوي بضلوعي لهب ㅤㅤتتناثر بدموعي عتب
والورگه عل وّن علمته
اتعذب بجرحي ملح ㅤㅤكل ساعه اعدل وانذبح
چم ذبجه بغيابك شفته
مشتاگه ابوسك بالنحر ㅤㅤبوسة طفل گلبة انكسر
موته وعلى صدرك ردته
أمشي وادقق بالنظر ㅤㅤلجدماك تبين اثر
طحت على وجهي وقبلتها
من ينترس وجهي تراب ㅤازحف وانام على الباب
حر الهوه يغطيني
اطفي الجمر واشعل نار ㅤㅤولا هدهد يجيب اخبار
وانه الهجر ماذيني
وانه الهجر ماذيني
ــــــــــــــــــــــــــــــــــــــــــــــــــــ
افتر وادور كل كتب ㅤㅤلازم اله ذكرى وعطر
اذكر گبل منا يجينا
هنا اذكره لمن سجد ㅤㅤهنا مشه وهنا گعد
هنا گلي يبنيتي الحنينه
اهنا شبگني بلهفته ㅤㅤللحين احس بقبلته
وتشابگن عيني ويعينه
أهنا نشد عن صحتي ㅤㅤيفرح ابويه بضحكتي
گاودني ولزينب مشينه
راح واخذ كلشي وياه ㅤㅤضلت مدامع فرگاه
تجرحني وتواسيني
تاليها ما رد للدار ㅤㅤلا هدهد يجيب اخبار
وانه الهجر ماذيني
وانه الهجر ماذيني
ــــــــــــــــــــــــــــــــــــــــــــــ
تحت التراب انظر هدم ㅤㅤبي ريحة الخوه اشم
هذا لعلي أكبر عرفته
الزمته من طرف وطرف ㅤㅤچنه علي گبالي وگف
ناديته يا خويه وشبگته
مرات امسكة من الردن ㅤㅤامشي مع الاكبر اظن
عفيه اخويه اليلزم اخته
يثگل قميصك يا علي ㅤㅤتراب ومدامع يمتلي
طين امتله بس ما غسلته
خوفي على عطره يروح ㅤㅤمن شمته ترد الروح
من المرض يشفيني
حكم الدهر والاقدار ㅤㅤلا هدهد يجيب اخبار
وانه الهجر ماذيني
وانه الهجر ماذيني
ــــــــــــــــــــــــــــــــــــــــــــــــــــــــــــــــــ
انظر مهد مابي ضوه ㅤㅤخالي ويهز بي الهوه
گلبي انجفل مثل الحمامه
وتراول بمهده سهم ㅤㅤحتى الوساده بيها دم
سترك يرب من هل علامة
ناغيته ويصب مدمعي ㅤㅤوبلا شعور وبلا وعي
عبدالله ترجع بالسلامة
شتگله امه تذكرت ㅤㅤنام الحبيب وما نمت
چانت تناغي بأبتسامة
اتذكر امه شتگول ㅤㅤنام الولد دللول
غالي واعز من عيني
راح وصحت يا ستار ㅤㅤولا هدهد يجيب اخبار
وانه الهجر ماذيني
وانه الهجر ماذيني
ــــــــــــــــــــــــــــــــــــــــــــــــــــــــــــــــــ
كل ما يجي وكت الظهر ㅤㅤيمي احس يصهي المهر
وينادي يا عالم هضيمه
واركض واباوع للسمه ㅤㅤلون احمر ويمطر دمه
حتى الهوه خايف نسيمة
ها يلمهر گلي شحصل ㅤㅤگلي بقيتي بلا اهل
زينب تره ما عدها خيمه
خصم الكلام تيسرت ㅤㅤوضلوع ابوچ تكسرت
يعني انت من هسه يتيمه
ضليت ادگ على الراس ㅤㅤلا والدي ولا عباس
حادي الحزن يحديني
شوف الزمن من يندار ㅤㅤلا هدهد يجيب اخبار
وانه الهجر ماذيني
وانه الهجر ماذيني
ــــــــــــــــــــــــــــــــــــــــــــــــــــــــــــــــــ
ضليت اعاين علدرب ㅤㅤمهضومه ومكسورة گلب
لن صوت ابن حذلم اسمعه
ام بنين تعنته ㅤㅤواني ركضت وي صيحته
جاوب دليلي لا تصدعه
گلي هلچ راحو چتل ㅤㅤوالوالد بلايا غسل
مرمي ولا واحد يشيعة
گلي وبعد غير الذبح ㅤㅤالف وسبعمية جرح
جسمك توزع من يجمعه
ما شفنه غيره مچتول ㅤㅤعاري وتسحگه الخيول
وينادي من يرويني
والعليه صارت طشار ㅤㅤلا هدهد يجيب اخبار
وانه الهجر ماذيني
وانه الهجر ماذيني
ــــــــــــــــــــــــــــــــــــــــــــــــــــــــــــــــــ
#اداء الملا باسم الكربلائي
#كلمات السيد عبد الخالف المحنه
اسم القصيدة كل ما اشوفك بالطيف