لطميات مكتوبة ليلة الدفنه - دفن الاجساد الطاهرة اكثر من قصيدة
#تراث
لدفن الأجساد الطاهرة
عمه يا علي السجاد صاحت زينب الكبرى
لبن امي حصل دفان يو لا ظل على
الغبره
ــــــــــــــــــــــــــــــــــــــ
عمه يا علي السجاد .. لخويه ما حصل دفان
يدفن جثة ابن أمي .. وعلى الزهره يسوّي احسان
ما شفنه يظل ميت .. ثلث تيام على التربان
ما واحــد تـدناله
وعن حر الشمس شاله
عفت الولي بهالحالة
اخته ولاج گلبي عليه .. وگلب الأخت شيصبره
ــــــــــــــــــــــــــــــــــــــ
يعمه عادة المچتول .. يدفنو ما يظل مرمي
وخوي على الثرى عفته .. مطروح وكثر همي
مهو ابن أمي وچنت بحما .. عمت عيني على ابن أمي
رحت ميسره وعفته
وبگت فوگ الثره جثته
ما يدري اشجره على اخته
فگد وليانها وعزها .. وشماته ومبعد المسره
ــــــــــــــــــــــــــــــــــــــ
يعمه الله يساعدني .. حگي لو كثر ونّي
يعمه حسين ابوك يريد .. حفظ العايله مني
وانت من الظهر للساع .. يا عمه غبت عني
غبت عني ودليلي انعاب
وصحت وين ابن اخويه غاب
يعمه الغيبتك أسباب
وهسا جيتني تعبان .. چنك جاي من سفره
ــــــــــــــــــــــــــــــــــــــ
يعمه من الظهر للساع ..گلي چنت غايب وين
سمعها وهاجت احزانه .. ودِمه سالت دموع العين
ناداها غبت عنچ .. رحت يم جسم ابوي حسين
رحت الوالدي شفته
ثلث تيام فــارگته
يعمه ودفنت جثته
ورضيع البالسهم مفطوم .. وسدته على صدره
ــــــــــــــــــــــــــــــــــــــ
واخبرچ بعد يا عمه .. دفنت انصار ابوي حسين
كلها وكل اهل بيته .. وعساچ انشاء الله تأمنين
وزينب سمعته وصاحت .. علي الأكبر دفنته وين
تدري بوالده يحبه
شباب وفرگته صعبه
يگلها ونمرد گلبه
علي الأكبر يعمه صار .. يم حسين أبو گبره
ــــــــــــــــــــــــــــــــــــــ
وزينب سمعته اوصاحت .. انشدك يا علي نشده
يعمه عادة الميت .. يصير على الترب خده
شلون ادفنت ابوك حسين .. يعمه وراس ما عنده
سمع عمته وهل دمعه
وثگل عمه ولزم ضلعه
ويگلها واختلف وضعه
يعمه بدال خد حسين .. صار على الترب نحره
ــــــــــــــــــــــــــــــــــــــ
إلتوت وتحسرت زينب .. وصاحت والدمع يجري
عمه يا علي السجاد .. ضاج من الهضم صدري
انشدك عن ابو فاضل .. اخوي اللي كفل خدري
شلعت السهم من عينه
دفنت وياه چفينه
يعمه الجود چاوينه
اجيت وما جبت وياك .. جوده ورايته الخضره
ــــــــــــــــــــــــــــــــــــــ
عن راية بدر هاشم .. وجوده لا تنشديني
يعمه بعلتي وصواب .. حامي الظعن خليني
شفت عينه وچفينه .. بعيني ولا عمت عيني
ومع ضعفي وعظم گيدي
ادفنت حامي الظعن بيدي
وصحت يا حسرتي زيدي
وزادت حسرتي لاچن .. يعمه اشتنفع الحسره
ــــــــــــــــــــــــــــــــــــــ
يعمه اشتنفع الحسرات .. والون والدمع شيفيد
انتي ميسره وآنه .. ابتليت ابجامعه وبگيد
يعمه وبعد ما ندري .. من عدنه العدو شيريد
گولي انذبح والينه
ليش الگوم تسبينه
اشكثر وصه النبي بينه
احفظوا عترتي بعدي .. وهذي حالة العتره
-------
الشاعر المرحوم مُعين السباك
حيره بوية شلون ادفنك
دفن الاجساد الطاهرة
حيره بوية شلون ادفنك
هـو انـته شباقي منك
راح المك بالحصيره
مصيبتي والله چبيره
……………………………
ريت يا بويه المنـيـه وياكـم اخذتني سويه
ولا اشوفن هالمنـاظر صعبـه يا بويه عليه
عالترب كلكم اضاحي مگـطعين اعله الوطيه
انته واخواني وعمامي والانصار اهل الحميه
بويه متـخالط لحمكم
گـلي شدفن راح منكم
حيرتي يابويه حيره
مصيبتي والله چبيره
……………………………
مو مرض بس الهلكني هدني بويه الي شفته
واني ازحف يم جثثكم شفت اخوي وما عرفته
علي الاكبر ذاك طوله وكل جماله الي وصفته
قطعة قطعة امگطعينه وصل صارة علي جثته
اليشبه الهادي بخصاله
منمـرد بالطف جماله
چـنه لا مو هوه غيره
مصيبتي والله چبيره
……………………………
ويا هضيمتنا عله جاسم يا فجيعتنا بمصابه
بعده شاب وحلو عمره تالي ذبحوه ابشبابه
ابن اخيك بويه صاير وصله وصله اعله الترابه
اه يا عريس هاشـم گـلبي طـراه بعـذابه
توه قاسمنا صبح شاب
شلون ادير اعليه التراب
هذا عريس العشيره
مصيبتي والله چبيره
……………………………
يا كسرنا ويا هضمنا عالنهر عدنـا مصيبه
لعمي ابو فاضل بكائي وگـلبي ميبـطل نحيبه
شفته بويه وريت ما شوف جـثته ذيچ السليبه
بويه مثلك نـاهبينه وعاري والجثه خضيبه
منمرد جسمه وبلا راس
يا هضيمتنا عله عباس
چان ينزف لخته غيره
مصيبتي والله چبيره
……………………………
بويه من جيت ارد ادفنك ما عرفت اشلون ادفنك
بالسيوف امگـطعينك انت موش احسيني چنك
گـمت ادور بالتـرايـب كـل عضو مفصول منك
گـوه لمـيـتـك يبويه الخـيل ليش ايطـشرنك
راح ادفنك وي سهامك
حيل مطحونه عظامك
وحرگتك شمس الظهيره
مصيبتي والله چبيره
……………………………
ردت اهيل اترابك اعليك ولنه صوت يصيح نحرك
يا علي وســد رضيعي وجبته خليته عله صدرك
بس يبويه بصدره حافر ماطلع من گـلبه اخبرك
طفلك ابلا راس مثلك عـظم الله براسه اجرك
منذبح مثلك خطيه
وداسته هم اعوجيه
دمعي دم الكم اديره
مصيبتي والله چبيره
----------
الشاعر عقيل الحسناوي..
الدفن
تدفني وحدك جاي. چا زينب وين
اتوسد نحري اعله الگاع.وين الخدين
طمني الراس شلونه
فاتحهن بعده اعيونه
وين الخدين
++++++++++
مني اشباقي وجيت اتدفنه
بين السلبوهن والضاع
بس اسمي واثار اجروحي
وباقي اشويه امن الاضلاع
اتمنيتك لو جايب زيب
وياك اتلمني امن الگاع
واشتم عطر الخوه ابچفها
ويخلص دفني بساع بساع
مشتاگتلي ومشتاگ.تحضرني اليوم
يم جسمي ساعه زمان.تگعد وتگوم
المسبي ومضروبه امتونه
فاتحهن بعده اعيونه
وين الخدين
++++++++
كل مييت خوانه اتحضره
هيچ الوارد عند الناس
صح ناشف دم البعروگي
بس باقي بشرياني احساس
عطشان الچلمة ياخويه
واليحچيها امفرع الراس
روح العمك جيب اچفوفه
وهيل اترابي ابچف عباس
ما تعبك بالتشييع.اولا تعب اچتاف
وحدك تحملني بساع.اوصالي اخفاف
جسمي اشويه اتلمونه
فاتحهن بعده اعيونه
وين الخدين
++++++++
والحفره اشتلچم بجروحي
ملچومات جروحي اهواي
للقبله اشلون اتوجهني
انطبگت يسراي ويمناي
لا خد يتوسد عالغبره
شتمدد متهشمه اعضاي
عن صدري بس شيل اسهامه
من تدفن عبد الله وياي
من گتلك يالسجاد ادفني وروح
واسمعتك من ونيت ونت مجروح
گتلي المثلي ايضربونه
فاتحهن بعده اعيونه
وين الخدين
++++++++++
لا تسئلني شلون ايتامك
او وضع الراس برمحه شلون
ما فارگ عين ابنياته
ليهسه امفتّح لعيون
يتلافت كل ساع الزينب
لو جوها بسوط ايضربون
من ارجع شيقنّع سكنه
تسمع والدها المدفون
تنظر بعدك موجود.برمحك مرفوع
واشدافن منه اتگول.دافن لضلوع
المثلك ياهو ايدفنونه
فاتحهن بعده اعيونه
وين الخدين
++++++++
مشغوله ام عون اعله اغيابي
راح ارجع والمحنه اتزود
من تعرف من دفنك راجع
ومن تسئل عن راعي الجود
مو كل عباسچ واريته
من عنده ادفنت الموجود
احچيلچ عالصار بحاله
يم گبره امن الشام انعود
والدافن مثلي احباب. وابلا تغسيل
حيل ايريد المبچاه وشضل بالحيل
ابنك يتغير لونه
فاتحهن بعده اعيونه
وين الخدين
--------
ثائر الربيعي
#ليلة_دفن_الاجساد_الطاهرة
آه منج كربلا ... آه منج كربلا
****.
طاح قرآن وبكت تبجي السمه اعليه من دمه
ونزل جبريل بجروحــه يعزي بالهم فاطمـه
وصاح عزريل بحسرته ويلي يا حامي الحمه
والملايك بالدمــع حضرت تقيم الجزع
وصاح فطرس بالملا آه منج كربلا
****.
الــذكر فوك الثره والفاتحه فوك الرمـــــح
حسره من تقره بألم وبخاطرك ذاك الجرح
توسد بحرّ الشمس ياويلي قــــرآن الصبح
والذكر فوك الثره اوراقه مطّشره
وما كو واحد رتلّه آه منج كربلا
****.
لن خيول العشره كصدت صوبه شكت مصحفه
سحكت بذيج الظلامــه وزين كلش تعرفــه
من مكان النحر صارت بالحوافر تحرفـــــه
سالفه وما اظن صدك مصحف الله ينسحك
ويبقى عاري بالفلا آه منج كربلا
############
عمدوا اعليه بالسحك جي من صدك هو الذكر
تكطّــــع بذيج المسيه بخيلهم واصبح وذر
رادوا بهــاي الفجيعه دين طـــــــــه يندثر
حسين يدرونه الذكر كطّعوه بالطف وذر
الدين بحسين اعتله آه منج كربلا
****.
بلا دفن وبلا غسل ابن الفحل فــوك الثره
وجسمه متوذر يويلي اوصاله كلها مطشره
اوراقه تتمزق حــــواسر وبدمــــاه معفره
بلا دفن ظل بالعره محد بحالـــه دره
ياهو يمه وتسأله آه منج كربلا
****.
تغيّر بذيج الشمس روح القدس مــا ينعرف
كل حجر بيه هالدمه من السبط يوم النزف
طاح وتطشر امامي وكل جرح يسواله طف
آه يا ذيج المحن شلون ينلم بالدفن
بيا كلب من تعدله آه منج كربلا
****.
لخادم ال محمد(ع)
الشاعر حيدر كاظم الساري
وين ياهاشم فخر عدنانها
وين ياهاشم فخر عدنانها
ما تجي تدفن غريب اوطانها
**.
وين ابو طالب يجي بهذا الامـــــــر
يشوف بحسينه شعمل سيف الشمر
مــــــا يجي لحسين يحفرله الكبر
لــــــــو يلم اوصاله اللي بميدانها
***.
ليوث هاشم بيها مضروب المثل
ليش ظل ثلاثه ابنها اعله الرمــل
حمزه ذاك الما خضع يوم الاسـل
ليش مـــا يحضر لعد جثمانهــــا
***.
صــح مثل عباس والجـف انكطع
جعفر هناك بحسرته يهـل دمـــع
ينادي بويه عليك دلالـــي انشلـع
ريت ع الشاطي ويشوف مجانها
#########$$$
زلام عبد المطلب مـــــــا قصرت
رواحهم لحسين كلهــــا تسابكت
لكن ويا حيف جثمــــــــانه بكت
وحيده ويلي والوحش سلوانها
***.
طه وين يشوف روحه بكربله
شلون متوذر بكه بذاك الفلـــه
على جثمـــانه كعد وتأمـــــــله
ماكدر يدفن عطر قرآنهــــــــا
***.
حسينكم من طاح عرش الله ارتجف
بالارض حلت براكــــــــين وخسف
كلهــــــا جن تنادي وين ال بالنجف
ما يجي يدفنه مثل سلمانهـــــــــــــا
*.
ونسألكم الدعاء والتوفيق
لخادم ال محمد(ع)..
----------
الشاعر حيدر كاظم الساري
لمه هنا يدفان عالرمضه ولينه
لمه هنا يدفان عالرمضه ولينه
###########
تطشر فوك ال تراب كد ما داسته الخيل
واشتم حافر الخيل ريحة عنبر وهيل
يعني داست حسين... يعني شكد شبع بين
تطشر بالميادين..... نازل بسمه ترتيل
النازل بسمه قران.... بالحر شامرينه
##############
تصور زلمه مطروح وعليه كومه سيوف
من كد ضرب السيوف لجرحه ما يصح روف
وسيوف التطبره....... مــــا واحد يعبره
الا بسيفه وذره...... توذر بارض الطفوف
من طبرة العدوان...... تدري مـــــوذرينه
################
حيره شلون يحسين جسمك صاير اوصال
لو تنظر لل وصال طشّت فوك الرمـــــــال
شما تسحك الرمله....... منه تلكه وصلــــــه
يادفـــــــــــان بلله...... شلون تشاهد الحال
موزع على الميدان......عــــــــالرمضه رهينه
################
حصيرة يجمع الجان بيده يلم الاكوان
تناثر فوك الاكوان مثل اوراق قــــــرآن
يارب والله حيره....... هالنعمه الچبيره
تنلم بحصيره......... مطشر على التربان
للأكوان ربان........ بحسره مجمعينه
##################
يا دفــــــان وحسين منه رضو ظلوع
منظر منه دلال كل احبابه مشلوع
بصدره الف طعنه..... يعني شتلگه منه
والخنصر فجعنه...... من حسين مگطوع
چف الكله احسان..... بالطف گاطعينه
################
ونسألكم الدعاء لتعجيل الفرج
لخادم الامام الحسين عليه السلام
الشاعر حيدر كاظم الساري
خويه اجيتك بس اجيتك مايله
خويه اجيتك بس اجيتك مايله
ارد اسولفلك سوالف عايله
يل عفت بيدي ضعن وبهيمه
خلي اشوف شلون جرحك حامله
طالعه اعيوني وبالحومه ادورك
طالعه وگلبي يدليني بعطرك
مشه بييه الگلب
يل فوگ الترب
گلبي يعطشلك محَّنه وخوه
تعبانه اجيتك امشي بالكوه
من بعدك صرت لا اخو لا حماي
وانشدك يابو فاضل هجرك شسوه
جيتك... طفي نار الي بعباتي
جيتك...شوفتك من امنياتي
شگد نومك صعب
يالفوگ الترب
طلعت من الخيم اشكيلك احوالي
لچن طيحت چفوفك ماجت ابالي
اريدن اوصل لعندك وعرفك وين
ضلمه عيوني بس صورتك اكبالي
طايحه.... جدامي تعثر يالنخيتك
طايحه....خويه اكعد اني اجيتك
دمعاتي تصب
يالفوگ الترب
اشوف ارسوم وجهك خويه مشتاگه
يالوجهك كمر ويفيض بشواگه
كسرت بطيحتك ياخويه ضهر حسين
مو تدري بفرگتك خويه حراگه
خويهه... خيامي مشتاگه لأمانك
خويهه... گوم فييلي بحنانك
بالحومه غرب
يالفوگ الترب
---------
الميرزا ناجي الصيمري
هلبت تجيبولي حصيره
يا بني أسد.... هلبت تجيبولي حصيره
يا بني أسد.... رايد الم شيخ العشيره
يا بني أسد.... حار الرمل وحسين عاري
يا بني أسد.... ما ينحمل حر الضهيره
و ماي جيبولي ابرد منحره
وارش گبره بلكي اجبر خاطره
جسمة صاير سالفه بحلگ الشمس
هذا ثالث يوم مرمي اعله الثره
مدري المه مدري اغطيه حسين فوك الترب عاري
ومثل ضيعة خنصر ايده ضاع يا وادم قراري
هنانه ياشلعان الگلوب الرمل ماخذ لون نحره
ما اكو وادم تنغر اعليه وحاره شمس الضهاري
((آه... ليت امي لم تلدني))
........................................................
يا بني أسد... بجفوفه باقي تسع اصابع
يا بني أسد.... من جفه خنصر جنه ضايع
يا بني أسد..... عينوني بالتربان ادوره
يا بني أسد..... بي محبس أخضر حيل لامع
گلبي ما يقنع اهل فوگة الترب
موش بس ايدي رجف حتى الگلب
استوحدتني أفكاري من شفته طريح
حسين ما يرهم يضل وسط الغرب
اطول من الرمح خلكه بكثر ما شايل محنه
جسمه مطروح اعله غبره وراسه فوگ يعاين النه
گلبي مثل شفافه مفطور من كثر حزن النعاوي
وگلبي وما ينطيني يا ناس اشلون ابوي بأيدي ادفنه
...........................................................
يا بني أسد... خلوني احط جفوفي حدره
يا بني أسد.... مرضوض من الخيل صدره
يا بني أسد.... وحشة الجنازه بدون الصياح
يا بني أسد...... غير اليموت اهله تحضره
من تحفرون الگبر وسعوا بعد
بحضن ابوه يندفن هذا أصغر ولد
خاف يستغرب لئن بعده طفل
صدر ابوه المنكسر يصبح مهد
سلبوا مني راحت البال وادم السلبوا عباته
وراسه لسه برمح مرفوع وحسرة الماي بلهاته
شده بال عيوني الحسين من شمر ماخذ مجانه
عكب عينه عيون الاجناب كامت تباري بناته
..........................................................
يا بني أسد..... هاي المصيبه التاخذ الروح
يا بني أسد..... من الگفه ابن الزهره مذبوح
يا بني أسد..... متروس صدره سهام وحجار
يا بني أسد..... حسين العزيز بهيمة مطروح
يوسدون راسه الميت بحيطة وحذر
اشلون يتوسد الي بطرگ النحر
نريد راس حسين ما ردنه فصل
خاطر ندفنه ونشيل بلا أثر
ارد اندهه وحاير اشلون خاف ينشدني اعله زينب
واني گوه مصبر الروح مره اسكت مره انحب
بيدي خله الحبل اثار وخاف حس بجرح ايدي
گادني التفكير للماي واعلة گلبه الجان يلهب
..........................................................
يا بني أسد......سوه الغراب بگلبي عِلة
يا بني أسد...... ليش الدفن بالترب خَله
يا بني أسد..... تمنيت ابوي بحضني ادفنه
يا بني أسد.....ولا بيدي فوگة الترب أهله
حسين فاتحته عله النوگ الهزل
وشلون تلطم مره مجتوفه بحبل
للسبات الليل والراحه انخلق
واحنه نگضي الليل مدمعنه يهل
اليرد من الدفنه متعوب الناس غير تكوي حيله
وأهله تتلكاه بالثغيب الشيخ فاتحته ثجيله
تراب ابوي بثوبي نيشان اشلون من تشوفه زينب
الليله يمكن زينب تموت هاي بالله اشلون ليله
...........................................................
مرتضى عامر الشمري
رباطات ليوم دفن الأجساد الطاهره
عـبـاس اليـتامه عـگـبـك بحيره......
وين انطي الوجه بعدك يبو الغيره....
ريـض مـن تـنـزّل عـمـك شـويــه......
عـمـه يـاعـلـي لملـمـهـه چـفـيـنـه.....
والـفـاگـد أخـو مـيـنام كـل لـيـله.....
يالتسمع بـچـيـنه دگ على الهامه....
حسين بچـتـلـته عـطـشوا ايتامه...
يبطال الصـفا الهامـات طـبـروهه....
عگبه الروح لا تـهـجـع تخلوهـه.....
يسـباع الحـرب عـبـاس نـادانه......
صـعـبه الـيـفـگد بـأيـام خـوانـه....
ام عـون الحنينه اليوم عينوهه.....
بذبح اهل الفضل ياناس واسوهه....
يـادفـان اخـيـي بـسـاع دلـيـنـي....
مامـتعوده يـا هـالناس يجـفيني......
وين اهل اللطم چا هاي ساعتهه......
=================
خويدم آل محمد
ظلم ماينحمل بالغاضريه
ظلم ماينحمل بالغاضريه
سبيه مچتفه تلوذ بسبيه
ــــــــــــــــــــــــــــــــــــــ
تكتل ونة المشتاگ
وجروح الغريب اوسع
اگل للروح راح حسين
مصيبه الروح ماتقتع
اظل اتنطّرك للموت
اتاني وادري ماترجع
كون يردلي بس عباس
فصلكم آخذه مربع
اعرفنك كفو يحسين ونعومك
تمنيته يخويه اليوم مو يومك
وسفه اعله التراب مخضبه رسومك
ويترهدن عليه السلبّ هدومك
واتمنه تصد عينك عليه
سبيه مچتفه تلوذ بسبيه
ــــــــــــــــــــــــــــــــــــــ
ناگه تون على مصابي
هاي الوادم شبيها
والله من اصيحن آه
يموت الي سمع بيها
وهاي الناس عميه گلوب
ماچن جاي احاچيها
هيه الدنيه بعد حسين
تغيرت كل معانيها
عشت عمر الدلال وآنه معروفه
وتاليها اسيرة بحبل مچتوفه
مريت اعله بيتي بديرة الكوفه
يهنيال اليمر بي يوم ويشوفه
للكوفه انسبيت وهاي هيه
سبيه مچتفه تلوذ بسبيه
ــــــــــــــــــــــــــــــــــــــ
بقصر الظالم وعيني
ولا كفت بواچيها
گاع بلايه حيدر بور
نشفت كل سواجيها
كبل چنت آنه اشوف الناس
الهامه ابابي تحنيها
مثلي وبت امام الكون
هسه حبال بيديها
الماعدهم ذمم بالدف تلگوني
عشت يمهم ولاچنهم يعرفوني
اميرتهم ومسبيّه يسموني
وحچي الماينسمع ياخويه سموني
بالكوفه انحنت چم هاشمية
سبيه مچتفه تلوذ بسبيه
ــــــــــــــــــــــــــــــــــــــ
رقيه تنام باحضاني
وسكنه اللايذه بكتري
ومن حال الرباب احاه
ياخويه انكسر ظهري
لو سمعت بواچي اطفال
تصد لوين ماتدري
مصايب هاي كلها تهون
بس مو عالترب خدري
حميده تحوم يمي ودمعه تجريها
هاي الديره مسلم يوم مر بيها
تدور وين طوعه وتنشد اعليها
ولو تذكار من مسلم يواسيها
هذا الحال ياحامي الحميه
سبيه مچتفه تلوذ بسبيه
ــــــــــــــــــــــــــــــــــــــ
خرابه بلا ستر لاباب
ولا نگدر نچن وأنام
خويه الگاع بس تراب
وين تروح ها الأيتام
عندي من الخيم نيشان
وگماط الرضيع حزاّم
هذا وگمت احسب حساب
باجر لو رحت للشام
راسك عالرمح عالي ويصد لينه
وي غربه يخويه حبال بيدينه
مو حمل المصايب خويه تدرينه
ايتامك رعبهم سوط حادينه
خويه شلون اذا راحت رقيه
سبيه مچتفه تلوذ بسبيه
--------
علي طعمه البطاط
دفنته وكلبي من الآه مشلوع
دفنته وكلبي من الآه مشلوع
بجيت وبلللت كبره امن الادموع
ابوي ابوي.. لوعني ياناس
ابوي ابوي..جثه بلاراس
دفنته
ــــــــــــــــــــــــــــــــــــــ
كمت اوصل الجسمه وارد
مره اقترب مره ابتعد
مالي كلب عالدفنه
فوك الجسد صفيت ادي
خاطر اسوي النحره في
بلكت يفز اتمنه
مايرجع الشابع ذبح
وضحكاته بايگهه الرمح
واخيولهم أذنه
احظنه لو أضل متمدد اوياه
أصيحن ياعلي لو واحسيناه
ابوي ابوي..ياوردة الياس
ابوي ابوي..جثه بلاراس
دفنته
ــــــــــــــــــــــــــــــــــــــ
رحت اركض اعله المشرعه
وجيت وعباتي امنكعه
اعصرله مي بنحره
بالطف أدورلي خشب
تابوت اسوي للذهب
خاطر اشيله الكبره
واكف واصد الجثته
من الجدم حد ركبته
الجثه صارت حمره
بالهيمه لكيت اضلوعه طشار
ونحره امنين مااندار يندار
ابوي ابوي.. بالخيل ينداس
ابوي ابوي..جثه بلاراس
ــــــــــــــــــــــــــــــــــــــ
عشرين عمري وي خمس
وكبران يادنيه احس
كبرني فكد الغالي
الماعنده ابو يشبع قهر
عيسى يضل طول الدهر
ماعنده فَي للتالي
السجاد آنه المنسبي
امجتف رحت وي زينبي
والطير ون الحالي
عجيبه الدنيه ليش اتفرق الاحباب
اعز ناسي وهلي نامو بالاتراب
ابوي ابوي...بيا ابو ينقاس
ابوي ابوي..جثه بلاراس
ــــــــــــــــــــــــــــــــــــــ
مات الجنت اتنفسه
نحره بديت اتلمسه
واتخيل آنه اعيونه
اشبيهه الضماير ميته
عالترب كلبو جثته
ومن ركبته ايذبحونه
باكو اثيابه الطاهره
وبالسيف كطعو خنصره
ليش الله ميخافونه
هم شفتو بشر مذبوح عطشان
تره الماي ابلاش انوزعه مجان
ابوي ابوي.. ضلموه الارجاس
ابوي ابوي.جثه بلاراس
ــــــــــــــــــــــــــــــــــــــ
شلته بحصيره او مونعش
يابس لكيته أمن العطش
وحسيته جن يهمسلي
الصوت من نحره طلع
بس صوته بي لوعه اووجع
تدرون ابوي اشكلي
كلي يوارث عصمتي
عالقبله وسد جثتي
وابصدري نوم طفلي
عبدالله طفل من وحشته ايخاف
من الدنيه مات وكلشي ماشاف
ابوي ابوي..اغله أمن الأنفاس
ابوي ابوي..جثه بلاراس
دفنته
--------------
محمد الجماسي
سولفلي يالدافن هلك واخوانك
سولفلي يالدافن هلك واخوانك
لميت ابوك شلون ياهـــو العانك
ــــــــــــــــــــ ــــــــــــــــــــ
مسبي مشيت شلون وانت ابلا روح
عفيه وگلب عايش يدگ بس اجروح
طحن الصدر شفته او وريد المذبوح
بصوت العطش گمت وطحت بمجانك
ــــــــــــــــــــ ــــــــــــــــــــ
عاري الجسد شمخلي بيك افراگه
گالو عليك الگيد حافر ســــــــــاگه
وگالولي شدوك اعله بطن النـــاگه
وشفت السياط الصعّدن نسوانك
ــــــــــــــــــــ ــــــــــــــــــــ
بالشمس عاري شلون ابوك تعوفه
اشحاجيتها وماطاحت المجتوفه
وامنيلك حيل اوصلت للكــــــوفه
بمجلس ابن مرجانه تالي ازمانك
ــــــــــــــــــــ ــــــــــــــــــــ
من ضرب راس حسين بيك شسوه
امن الگيد لو من سب علي تتــــلوه
ومن راد يضرب زينب اشـــگد دوّه
نيران بيك وهاي اشد نيرانك
ــــــــــــــــــــ ــــــــــــــــــــ
من رحت ياهو العفته يم عماتك
غربه وجثيــــــره بهالبلد شماتك
كربله ابعيـــده وياثگل خطواتك
واليوم ثالث عالرمل وليانك
ــــــــــــــــــــ ــــــــــــــــــــ
بيا حيل رايح يابو رحـــــــل المنهوب
ومو گلب حال حسينك ايگطع اگلوب
عالوجه شفته شلون ابيّـــــك مگلوب
واشگال من شمّيت نحره السانك
ــــــــــــــــــــ ــــــــــــــــــــ
اوصال جسمه تارســــه گاع الطف
وحدك اشلمهن ليك تركض تزحف
والبالحوافر سيدي ايلوحه الجف
وذيج الحصيره اشخلت امن الوانك
ــــــــــــــــــــ ــــــــــــــــــــ
شلون ادفنت ذخرك علي عد رجليه
وعبد الله شـــــافك والدك حاير بيه
يبني اعله صدري اوليدي گلّك خليه
مگطوع شريانه ويبس شريانك
ــــــــــــــــــــ ــــــــــــــــــــ
عمك امگطّع وحّـــــــــدك نزّلتــــه
سولفت ويّـــــــــاه عالسبي عاتبته
جم ونّه ون من گتله مسبيه اخته
بذاك الوكت ياهو الردت دفانك
ــــــــــــــــــــ ــــــــــــــــــــ
علي محسن الزيادي
ياهو اليدفنه الماعنده دفانه
ياهو اليدفنه الماعنده دفانه
ضل اعله الثرى و أكبال عدوانه
حسين بكربله ضل عاري علتربان
و أعياله أنسبت و بهزل نسوانه
السبوا نسوانه ياهو يدفنه ياهو
عادات العرب بلسلف معروفه
ليموت أهله تحضره و تشوفه
يتچفن وراها و يندفن بثغيب
بس حسين أهله أنسبت للكوفه
عاري علغبره. و أهله بنوگ هزَل
ثلث تيام باقي أعله الترب ضامي
محد دافنه و بلحومه ضل دامي
ليش حسين يبقه بلا دفن علـ گاع
حامي أخيام أخته ما أله حامي
ياهو اليدفنه. البيده أخوان يدفن
رد بيها العليل و منكسر ضهره
زين العابدين ألدمعته حمره
ياهو يعيني اعله الدفن يا ناس
سبعين جثه ذني عل غبره
ياهو اليعينه. اليدفن بيده أهله
أنطوني حصيره حسين ما ينلم
شما أجمع أبوي يضيع من الدم
لميته و أريدن باريه تشيلة
بس راسه بعيد و هاذا أكبر هَم
و راسه ماهوة شلون نوسده هسة
-------------
علي حسين الخفاجي
بالطف دفنت عيوني الثنين
بالطف دفنت عيوني الثنين
وسلّم عليچ هواي الحسين
يا عمه وبكلامه
وصاني باليتامه
عيوني الثنين
..
من امس ما نمت ليلي و جفن ما لاگه جفن
وهالتراب الفوگ وجهي بقه من تراب الدفن
شلته بيدي وشفت صدره الخيل طاحنته طحن
عمه من سهم البالچبده والدي لسه يون
لميته بيدي لم الدموع
ساعه الم چبده وساعه الضلوع
المتهشمه عضامه
وصاني باليتامه
عيوني الثنين
..
حسين ابوي وما عرفته مملي طعنات وطبر
من اشيلن كتر بيدي يطيح من ايدي كتر
بالرمل متروس نحره وچان رمل الطف جمر
بكل جرح الگالي نبله بكل عظم الگه كسر
عالرمل نايم والرمل حار
مدفون جسمه بنبل وحجار
الفوگ الرمل منامه
وصاني باليتامه
عيوني الثنين
..
من النحر وياي يحچي وخذت روحي حچايته
يا علي عبد الله خلي فوگ صدري نومته
منذبح عطشان مثلي ومثلي ذبلت شفته
يرتوي يابويه گلبي من اشمن ريحته
ملچوم يحچي من النحر چان
عبد الله ليش يموت عطشان
البچاه حرگ خيامه
وصاني باليتامه
عيوني الثنين
…
انه ابچيله وبچالي وگال غربه غربتك
بويه شو رديت وحدك وين زينب عمتك
ليش ايدك دمه تنزف ليش تنزف رگبتك
ليش محني وفوگ راسك ليش ما هي اعمامتك
گتله يبويه بغربه الضعون
واسياطهم ما خلت متون
بمتني بقت علامه
وصاني عاليتامه
عيوني الاثنين
…
گبل ما هيلن ترابه حچه ونزلت دمعتي
بويه سلملي اعله زينب ريحة امي وشمعتي
بوسلي بنيتي سُكينه وشم رقيه ابنيتي
هواي مشتاگ لبناتي فراگهن فت مهجتي
رد لخواتك كافي الوداع
الليل اجاهن ارجع بساع
چان الحچي ختامه
وصاني باليتامه
عيوني الثنين
…
خادم الحسين ( عليه السلام)
كرار حسين الكربلائي
( ابو كميل )
نعي دفن الاجساد الطاهرة
السيده زينب مع مولاي الحسين
روحي فداهما
يخويه حسين كلي شلون لموك
مابدوا اميه عليك وارووك
ثلث تيام وسط الشمس خلوك
جروحك يبسن ومامش اميه
مع العباس روحي فداه
صدك عباس تتركني علئ بختك
بين اجناب اروحن وانه اختك
اعرفك ماترد من ضيمي صحتك
بلكي اتكوم موضربوا رقيه
--------------
مولاتي ليلى مع مولاي الاكبر
روحي فداهما
يبعد امك يماخذ هاي العيون
بلاراسك يلاكبر ليش مدفون
تره امك راح تمشي بذيج الضعون
بين ارجاس واحبال اب أديه
------------
مولاتي رملة مع مولاي القاسم
روحي فداهما
كبر ابني اعرفه وعندي الجواب
امبين كبر جاسم بي عطر شاب
اكله انهض ييمه بريتي عطاب
دم بجفاك موحنه بديه
------------
مولاتي الرباب ومولاي الرضيع
روحي فداهما
دللول الكبر عبد الله ذبحوك
اهزن بلكبر حسبالي كاروك
مامفطوم ليش بسهم فطموك
حليبك در يبعد امك عليه
-----------------
مولاتي سكينه ومولاي الحسين
روحي فداهما
يبويه شلون جوه الترب تنحط
وانه السوط سوه بظهري الف خط
يركظوني واصيح احسين وافحط
لحد ماماتت الصرخات بيه
مع مولاي العباس روحي فداه
يعمي شلون تدخل هاي بلراس
جوه الكاع تنطم وانت عباس
تره عكبك بقينه ابين الارجاس
وشتموا عمتي وصاحوا سبيه
------------
بشار السامي
نعي مايخص دفن الاجساد
بعدما ذهب الامام زين العابدين روحي فداه ل دفن الاجساد الطاهره تفقدته عمته الحوراء زينب صلوات الله عليها وصارت تبحث عنه ولم تجده. وبعدما عاد الامام زين العابدين نادته عمته زينب صلوات الله عليهما بلسان الحال…
طـــــــــالـــــع ويــــــن يـــالــــباجـي امــن اهلنه
يـــعـــمــه أخــــــــلاف عــــينــــك يــــاهو النــه
علـــيــــك انــــخــــاف هـــــــذا الــــــوكـــت منه
يعــــــمـه مــــــــادريـــتـــي آنـــه چـــنـت ويــن
اخــــافــــــن لـو گـــلتــــلــــچ مـــــا تـــگـدرين
واخــــــــافــــنـچ يعــــــمـتــــــنـــــه تمـــــوتين
چـــــنت ادفـــــن يعـــــمـه ابـــــاجـي الـحــســين
زينب نــشـــدتـــه وگــــــالـــتــ يـعــــــــــــمه
شـنــــــــهي اللــــــــي شـــــــفـت يـم ابو اليـمه
صـــدلــــهـــــا اوبـــچـــه او مـــارد عــلــيـهــــا
إخــــــتــنـگ مـــــا گـــــدر زيـنــب يـــحـاچــيـهـا
يعـــــــــمـــه أشـــــلون اوصـــفــلچ الــــحــالـه
وكـــــلام اللـــــي ســــــمـعت ابـــــوي گــــالـه
وهـــــــو مـــــذبـــــوح ينــشد عــــلى اعـيــالـه
گـــــــــاللـهـــــا يـــــعـمــــه ودمـعـتـه تـسـيل
دفـنــــــتـــه بــــلا چـــــــفـن وبـــغـيـر تغسـيل
ولهــــســـــه امــن الســـحگ دم مـنـحره ايـسـيل
وگــــــــال الطــــــفـــل بويه اويـــــاي خــلـيـه
اريــــــدن مـــــن عـــــزيزي اشـبـع شـبـگ بـيـه
ويـعــــــمــه مـــــن رحـــــت يـــم الـشـريــعـه
إنكـــسر گـــلبي اعـــله ابـو إچـفـوف الگـطـيـعـه
يعــــــــمـه ابـــــدفــنــتــه آنــه تـــحـيـرت بيـه
يعــــمــه اشــــلــون اشــيلـــه أوبـيــش اخـلـيـه
حــــــرت يـــــاراي عـــــمــي ويــــاه اســـويـه
وهـــو ابـنـــومـــتـه وزحـــت الـثـــره اعـلـــيـه
وشـســـولــفـلـــچ يــعـــمـه عــــن الاكــــــبـر
اشــــــد كـــــل حـــــال اخـــيـي صــايــر اوذر
وشـــــــلـــــت جــــســـــام ياعـــمــه بــديـه
ودفـــنـتـــه او يـــالــــبگوا كــلــهم ســـــويـه
خـــــذت حيــــــلـي يــــعـمـه الــــغـاضـــريه
خـــــــــذت مـــــنــي هــلــي بــيـوم ومـسيه
------------------
نسألكم الدعاء
السيد حسين الياسري