كلمات قصيدة اسهرن | محمد الجنامي مكتوبه كامله
لطمية اسهرن | محمد الجنامي
قصيدة :- اسهرن .
كلمات :- الشاعر السيد عبد الخالق المحنة .
أداء :- الرادود محمد الجنامي .
-----------
اسهرن واليجيها النوم خل تنعه وتهيج الهم
تـره التغفه عله الناگه تطيح ابناس ماترحم
------------
تطيح التغفـه عـالناگه يجي الحادي يعاقبها
مو شرط ابشتم واسياط تره الچلمه تعذبها
لان الحـادي مـستعـجـل بالف رفسـه يركبها
بناتي وياخواتي الكل
لـحد تغفه فـوگ البل
تـره عين العدو تكتل
نريد انساهر اعله النوگ وانخلي الدرب ماتم
سهرن والتجيهـا النوم خل تنعـه وتهيج الهـم
------------
اريد الـنـوگ تتـگـرب ونـعــوف الـحـادي يتعـده
ايـــد ابـأيـد نـتـلازم وحـــده اتـسنــد الــوحــده
الدمع خل ينزل اعله النوگ حتى بالمشي تهده
والتتعب تصد لحسين
يطير النوم من الـعين
واتكلـه سطرني الـبين
وهيه العاشت اويه حسين ابلايه حسين ماترهم
اسهرن والـجيهـا الـنـوم خـل تنعـه وتهيـج الـهــم
-----------
سكينـه لـزمـي ابإختج رقيـه والـوجـه ذابل
وانــه يـاعمـه خـلينـي امـد ايـدي لبوفاضـل
الشمس تاكل وجه لچن حبلهم بالعظم ياكل
يعمه اختج اشعدها
كأن ميته اشاهدهـا
تصد الراس والدهـا
شفت صفنتها صفنة موت يويلي والدمع من دم
اسهرن والـيجيهــا النـوم خـل تنعــه وتهيج الـهـم
------------
يليله والمسير اهواي ولا نگضي الدرب سكته
تـره ونـج رفس مذبوح وجـرح اعزاز شايلتـه
مـوبس الـجـرح ينشاف انا حتى الالـم شفتـه
يليلـه دمـعتج حمــره
جـرح الاكـبر اشكبـره
مشه عمر الورد عمره
عمت عيني گبل لاصد واشاهد راسخ المهشم
اسـهـرن والـيـجيهـا الـنـوم خــل تنـعـه الــهــم
--------------
يرملـه ابداعت العـريس ام عبدالله حـاچيهـا
تباوع راس ابنها اهواي خاف اتطيح الزميها
اذا راسه بسهـم مرفوع بالله شلون اواسيهـا
عـلــه الـنـاگـه تنـاغـيلــه
يـعبـداللــه تـلــولــيـلــــه
واظن يسمع اشتحچيله
مشه ضامي ورجع مذبوح عزيز وجرح مايلتم
اسهرن واليجيهـا الـنـوم خل تنعه وتهيج الـهـم
-------------
ابـاوع للعليل ايميل مـن احزانـه مـن گيده
تسيل ادماه من نحره بسلاسل گيدوا ايده
ابن ينظر علـه الوالد ابـو ينظر علـه اوليده
يبـاوعلـي ويـزل ينـحب
يـعينـــج اللــه يـــازينب
بعد من اصعب الاصعب
الصبر يـم الصبر هـذه قدرنه وهــذا المحتم
اسهرن واليجيها النوم خل تنعه وتهيج الهم