كلمات قصيدة الله خلقني لدمعتي سيد سلام الحسيني مكتوبه كامله
لطمية الله خلقني لدمعتي سيد سلام الحسيني
ﷲ خلقني لدمعتي
ودموعي حاصل فطرتي
لحزن الزهرة انتمائي
يهل المحرم و انظره
ثوب المرمّل تنشره
بده يعني فرض عزائي
بإحساسي اشوف حال الزچيه بأول صباح
بچفها القميص يجري دمعها وعالي النياح
تشمه بحنان وماتلكه بي بس عطر الجراح
عطر الدماء الي جرت من الشالهم بأحضانه
عطر الدموع الهامله بوداعه وي صيوانه
ودموعه للأكبر لمن اتمدد وياه بطوله
من عنده گام و شاهدوه اينشف الدمع بردانه
حسين آه حسين آه
ـــــــــــــــــــــــــــــــــــــــــــــــــــــــــــــــــ
دمعي وحزن گلبي طاعه
ماريد اضيعلي ساعه
بشهر كل ساعة بي منيه
أبجي و أدك اعله راسي
و بالمأتم أوكف مواسي
لحزن المهدي والزچيه
الزهرة تصيح كل دمعة منها حسرتها نار
جدك غريب يامهدي فزَّع وأطلبله ثار
استوحدوه وحرگوا خيامه بـ حَر النهار
حسين أسلبوها أعمامته من راح عنه عضيده
حاول يگوم لزينبه وأنثنت عالكاع ايده
عالصار بيه بكربله وإلي جره بعياله
معذور ابنه لو اجه الكون كله أيبيده
حسين آه حسين آه
ـــــــــــــــــــــــــــــــــــــــــــــــــــــــــــــــــ
بشهر انكساري و مصابي
اتهل دمعتي وي شرابي
أجه شهر الضمة محرم
نار العطش كبره بيهم
ماخله مبسم عليهم
وكضه كل زهره بالمخيم
لو گطرة ماي بوسط المخيم صوت العيال
بصمته الحسين وعينه تراقب موت الدلال
بگلبه يجول لضيعة عيالة چم أحتمال
مابين نارين الدهر خله الحسين بحيره
لو يكتل اعياله الضمه لو يمشي راعي الغيره
فراگ العضيد شسوه بي غرّب بريته انفاسه
يمه كعد خالي الظهر وناظره الغربه تديره
حسين آه حسين آه
ـــــــــــــــــــــــــــــــــــــــــــــــــــــــــــــــــ
بعشرة ليالي النِعِّده
لحسين اجه بساعه وحده
وكسر ظهر الزمن مصابه
صبره و ضمته و غربته
بالحومه جالت نظرته
گضه كلمن اجه بركابه
اصحابه و اخو القاسم والكبر وابن الرباب
ايطيحه مصاب وايركضه وسط الحومه مصاب
بتعبه و ضماه عالرمضة سوه وسادة تراب
وي صارمه يسولف غده هاي اختي اجت توميلي
راح اتچي اعليك و ردت اتساعدني و اتچيلي
ما همه من كام و وكع رد و يعاتب حيله
ينباد حيل ام الخدر لو ما گمت ياحيلي
حسين آه حسين آه
ـــــــــــــــــــــــــــــــــــــــــــــــــــــــــــــــــ
- الله خلقني لدمعتي
الرادود | السيد سلام الحسيني
الشاعر | السيد انور الموسوي