كلمات قصيدة جهز الخيم يا عباس محمد باقر الخاقاني مكتوبه كامله
لطمية جهز الخيم يا عباس محمد باقر الخاقاني
جهز الخيم يعباس ،، طبينا ديرة كربلا
وابعدها عن عين الناس ،، بيوت الخدر والعايلة
__
شيخ الهواشم ،، عاف المدينة ،، وجاب الدرب حسرة وآه
وكلما تگرب ،، للطف يكسره ،، حال النساء الوياه
بثاني محرم ،، من حط رحاله ،، محد اجه وتلگاه
گطعوا طريقه ،، ورادوه يبايع ،، لو تحرگ الخيمه اعداه
بالحومه يفتر سيدي ،، ويدري العدا يطلبونه
ويبچي ويضم دمع الهضم ،، كلما يصد لظعونه
صاح الغدر بيهم ساس ،، وبيها الخيانة مأصّله
وابعدها عن عين الناس ،، بيوت الخدر والعايلة
__
نشف دمعته ،، ونادى لعضيده ،، گوم ابني لأختك صيوان
هنا يابوفاضل ،، انصب خيامك ،، ودگ رأيتك عالبيبان
جاري أمس چان ،، جدي وضريحه ،، واليوم اجاور عدوان
وطمّن خواتك ،، شما كثرت الگوم ،، عدهن ترى حزام إخوان
هنا ياگمر عين العطش ،، صلفة وتريد چفوفك
وآنا على زودك متكل ،، يبن الوصي ومعروفك
حد الخدر ماينداس ،، دام إنت حي ياكافله
وابعدها عن عين الناس ،، بيوت الخدر والعايلة
__
فك المحامل ،، ونزل خواتك ،، بيدك يبن حامي الجار
وانصب خيمهن ،، ياخويه بيدك ،، وابني لعقيلاتك دار
عاشن عمرهن ،، دايم خدرهن ،،بغيرتك يبن الكرار
هنا نوّخ العيس ،، بالغاضرية ،، وهنا محط رحلك صار
يا أبا الفضل دگ رايتك ،، وخلها ترف فوگاهن
وبسدك يخاف الهوا ،، مايعبر من حذاهن
خلها ترف فوگ الراس ،، راية عفاف مدللـة
وابعدها عن عين الناس ،، بيوت الخدر والعايلة
__
يا خويه أوصيك ،، من تبني الاخيام ،، يم خيمتك خليني
ولا تنسى عباس ،، حط خيمة أم عون ،، بينك يخويه وبيني
ماتگدر تعيش ،، إلا على صوتي ،، وتگعد تحت في عيني
وتبعتني لهنا ،، ويانور عيناي ،، لو رادت تناديني
وتحملت ضيم السفر ،، كله لسواد عيوني
اگضي آنا وأولادي ولا ،، تتگدر أم ظعوني
طمنها يا ابو النوماس ،، وطيح على چفها وقبّله
وابعدها عن عين الناس ،، بيوت الخدر والعايلة
__
مأمنه العقيلة ،، وكافل خدرها ،، مگابلها مصباح وليل
ياريته لوچان ،، يمها ويشاهد ،، طلعتها مابين الخيل
تجمع ظعنها ،، واللي بعمرها ،، مابيه للمراكض حيل
راحت خيمها ،، البانيهن إلها ،، والماله اخو يشوف الويل
صاح أبو اليمه وانهدم ،، عباس ياحيل أيدي
ذاك الفرات الينكسر ،، بيه ظهري ألك يعضيدي
إنت الدرع وإنت الطاس ،، البيهن عيوني مكحله
وابعدها عن عين الناس ،، بيوت الخدر والعايلة
➖➖➖
{جروح: أحمد الهلباوي}