كلمات قصيدة اليوم زينب بالطفوف شحالها - الحاج جاسم النويني مكتوبه كامله
لطمية اليوم زينب بالطفوف شحاله - الحاج جاسم النويني
قصيدة : اليوم زينب بالطفوف
الشاعر : ابراهيم حسون الهنداوي
الرادود : الحاج جاسم النويني
----------
اليوم زينب بالطفوف شحالها
ابحر من دم غاب عنها هلالها
🔹🔹🔹🔹🔹🔹
غاب عنها هلالها بسادي الظلام
وحجب عنها مصابها نور الايام
اخيام عزها واليبارون الخيام
بالمعارة مطرحة على رمالها
🔹🔹🔹🔹🔹🔹
حايرة والگلب من عدها انجسم
للحرم والّلي يبارون الحرم
تريد تشبح عينها رفت علم
تريد اخو التنخاه ويتنخالها
🔹🔹🔹🔹🔹🔹
گطعت الظنه وجرت منها الدموع
وتشب نيران الگلب بين الضلوع
حرم واطفال اعلى اهاليها تلوع
من يحاميها ويرد انغالها
🔹🔹🔹🔹🔹🔹
استگطعت وانخطف من عدها اللون
اشلون اجت والعز يباريها شلون
حايطة اخوتها بضعنها والعيون
تهاب تشرح لليمر خيالها
🔹🔹🔹🔹🔹🔹
وين عنها الچانت لعزها ذخر
وبخدرها الريح يعثر من يمر
عن خدرها شلون ياخذها الصبر
وزينب اعلى الدرب تتربالها
🔹🔹🔹🔹🔹🔹
مشت ماتدري الوجه تنطيه لوين
ووالهه ومن دم حمر تهمل العين
تصيح وينك عن خواتك يا حسين
گوم رد الخيل يا خيالها
🔹🔹🔹🔹🔹🔹
يا عجب صوت التسمعه ولا تهيد
وانت غوث الغايث بساعة الضيج
گوم بخيامك ترى صار الحريج
وانولت بيها الحرم واطفالها
🔹🔹🔹🔹🔹🔹
الحرم فرت خوف وتلوع الايتام
هايمه وفرهود صاحو بالخيام
مخدراتك تنولي وعينك تنام
ونالها ذل وهظم ما نالها
🔹🔹🔹🔹🔹🔹
بحومة الميدان مر بيها الجدم
وشافت اخوتها على الغبرة خذم
چتل خلصت منها ما واحد سلم
بيه تلوذ وتشتكيله حالها
🔹🔹🔹🔹🔹🔹
تلوذ بيه وتشتكي عنده الحال
وتذكر الجور الذي نال العيال
بينها وبين النشامة الموت حال
ومادرة عليهم ذهلها وهالها
🔹🔹🔹🔹🔹🔹
هالها البيهم جرة وشافته العين
ابدور عالغبرة ضحايه مطرحين
والعزيز حسين مكطوع الوتين
وشابچه عليه السمر وانبالها
🔹🔹🔹🔹🔹🔹
حيّته وگالت گضيت الي العليك
يالولي وما خيبت رجواي بيك
لجدك وعودك الهادي ضاخريك
وبيك ما خابت اليوم امالها
🔹🔹🔹🔹🔹🔹
خل تگر عينك وخل تغفه رغد
ولا تگول الحرم واليها انفگد
اني اختك وانا بت ذاك الاسد
المنه تتراجف گلوب ابطالها
🔹🔹🔹🔹🔹🔹
مثل ما راسي رفعته بخوتك
ودون دين الله ضخيت بمهجتك
بالابا لاعداك نوگف وگفتك
ووجل باطلها ومخازي افعالها
🔹🔹🔹🔹🔹🔹
وحيد بالميدان ناصر ما الك
وللنصر والغانمة چفك ملك
جدك ببر الرسالة حملك
وثگل جمها تگوم منها جبالها
🔹🔹🔹🔹🔹🔹
يدري بشخصك وتر مالك جذع
وصدرك لبر الرسالة متسع
يظل نور الدين من دمك يشع
يستمر وعليه تسير جيالها
🔹🔹🔹🔹🔹🔹
اثبتت وحدة الباري بوحدتك
وشيدت دين الهدى بدم رگبتك
شلون وگفة مجد عالي وگفتك
الدهر ينفه ومايشوف انفالها