لطميات نسائية مكتوبة جديد محرم 2024 اكثر من قصيدة

 لطميات نسائية مكتوبة جديده محرم 2024 اكثر من قصيدة مكتوبة كاملة

فزاعيه للوصول لكربلاء

وصلو كربلا. والخيم نصبوها

وخيمة زينب المهظومه يبنوها

وصلو كربلا واتعثر حصانه

كال حسين هاي الارض منوانه

نزلو يالهواشم  ابنو صيوانه

ابنوها الخيم. والحره نزلوها

وصلو كربلا والحره نادتهم

يخواني وهلي وبهظم ندبتهم

ردونه لاهلنه بساع طلبتهم

هاي ارض الغدر والشوم تدروها

لاتبنون هاي الخيم يبن امي

بيها يزيد نوحي يالولي وهمي

انه خايفه عليكم يبعد اسمي

وهاي العايله خاف تطشروها

هاي العايله خافن تضيع النوب

خويه حسين يلي بالشدد مندوب

ادري بالزمان يدورلي مكلوب

روحي خافت  عليكم  دطمنوها 

هايه كربلا المعروف غدرتها

وهاي عثرتك بانت علامتها

لايحسين لاتبقه بثنيتها

ردوها الضعون ارجاك ردوها

يالبيك الحميه انخاك ياعباس

انه خايفه من جمع.هاي الناس

ردنه للوطن صاحت يبو النوماس

هاي العده ماترحم تعرفوها

ام زينب السعداوي

لطميه للهلال 

هل الاهلال  يزينب هل الاهلال

والدمع سال يزينب والدمع سال

وياج هلينه الدموع

يخت مكسور الضلوع

هل الاهلال  يزينب هل الاهلال 

***

الج رايات الحزن شالتها الاحباب

اه ياجرح الحسين البينه ماطاب

وحك جفين الكفيل وداحي الباب

وياج يازينب نصيح

اه يمصاب الذبيح

دمعي همال يزينب دمعي همال

هل الاهلال  يزينب  هل الاهلال

***

نار دلالي اسعرت من عاينيته

هلت دموعي عليج  وعاتبيته

كتله ليش حسين بالطف حيريته

يوم شفته بالسمه

اسمعت ونت فاطمه

تفجع الحال يزينب تفجع الحال

هل الاهلال  يزينب  هل الاهلال 

****   

فجع كلبج وانفجع كلب الزجيه

وانرسمت بعيني صور للغاضريه

شفت بيه زينب تصيح اشهالرزيه

الدنيا صارت مظلمه

ولون يشبه للدمه

صرخت عيال يزينب صرخت عيال

هل  الاهلال  يزينب هل الاهلال 

**

جني اسمع صرخه وبصف النهر

بعيني اشوف عالنهر طاح الكمر

وانتي اتصيحين ياغدر الدهر

واكفه عله المشرعه

اه ياذيج الفاجعه

تشده البال يزينب تشده البال

هل الاهلال  يزينب هل الاهلال 

*

نصبت الاحباب ماتم يالحزينه

كل محب لمصيبتج جر بونينه

نبجي لجساد البكت بطف رهينه

يااهلال  الفاجعه

حسين ضل بمصرعه

فوك الارمال يزينب فوك الارمال

هل الاهلال  يزينب  هل الاهلال 

***

ام زينب كربلاء

لطمية لهلال محرم الحرام (حزن بالگلب خيم) 

حزن بالگلب خيم 

اجه هلالك محرم 

منك لوني مخطوف 

بيك مصايب انشوف 

نبدي ادموع وانلم 

حزن بالگلب خيم 

✿※❥※❥✦

تسيل ادموم اهلنه عالوطيه 

وتتفرهد خيمنه بلا جنيه 

عطاشه بكربله ماكو آميه 

نترك ذيچ الحيود 

نمشي بگلب ممرود 

صدر حسين بحوافر تهشم 

✿※❥※❥✦

بحوافر خيل صدره يرضرضونه

وخنصر ايده اخيي يگطعونه 

يذبحون الولي ويشتمونه 

ابد ما عدهم احسان 

طحنه ابين عدوان 

من اشوفن حالته اگليبي ايتألم 

✿※❥※❥✦

يتألم اگليبي اعليه وينوح 

مالي حيل اشوفنه المذبوح 

دمه ابلا سبب عالگاع مسفوح 

اعليه ادموعي اسيل 

عفته بغير تغسيل 

ومن ضرب العده متني توسم 

✿※❥※❥✦

ضهدني فراگك وضربات المتون 

واطفالك ياخويه لمن يبچون 

بحرور وشمس گلي شيحملون 

بطل حيلي عليهم 

الزمن ما رحم بيهم 

وليش رقيه ازغيره وتيتم 

✿※❥※❥✦

زغيرات البنات يظلن اشلون 

عگب عين الابو مدميه العيون 

مذبوح وتشوفه شلون مطعون 

تون وتهدم الحيل 

تفز مانامت الليل 

وعاشر يوم نهاره صبح اظلم 

✿※❥※❥✦

تمت والحمدلله ✍️ خادمة أم أبيها الشاعرة أم علي الحلفي

قصيدة للانصار

شيخ الانصار حبيب ابن مظاهر

حيهم يصيح اميري حسين حاير 

حيهم يصيح يزلم المرجله

حسين سيدنه غريب بكربله

يشوف دمعات اخيته هامله

ليله مانام ابواليمه يساهر

شيخ الانصار حبيب ابن مظاهر

ليله مانام وعيونه مساهره

يفكر بزينب التبگه حايره

بيش ابن ضاهر يجبر خاطره

گله يوم الزلم يامولاي باجر

شيخ الانصار حبيب ابن مضاهر

هله بشيخ المرجله وشيخ الزلم

جهز جيوشه وشد بيهم عزم

وكال للحومه تعنو بالهمم

اليوم اجاكم يابطال العدو غادر

شيخ الأنصار حبيب ابن مظاهر

ياحبيب الزود من افعالك

صحبتك وانت الفخر يحلالك

ارجال حربيه ونعم يرجالك

اجو للميدان ماكسرولي خاطر

شيخ الأنصار حبيب ابن مظاهر

هله بيكم ياانصار ابو علي

حيهم يصيح بالحومه هلي

الليوم بالميدان هالحق يعتلي

والنعم صاحو وهذا السيف قاهر

شيخ الأنصار حبيب ابن مظاهر

#بقلم_الشاعرات 

#الشاعرة_نورس_الحلفي

#الشاعرة_ام_علي_الأماره 

قصيدة للمسير {اخوانك الاربعة}

يمه اسلـــــملك اخوانك الاربعة

بسيف كون انحورهم متگطـعة

موتو لعيون الحسين 

عفيه بيكم يالبنين 

انه اودعكم وحيل اموجعه

❥❥❥❥ـــــــــــــ❁❁ـــــــــــــ❥❥❥❥

يمه اسلملك اخوتك هالمسيه 

كلهم يموتون برض الغاضريه 

مذبحين الخاطر اوليد الزجيه

موتو لعيون الحسين

عفيه بيكم يالبنين

وانته كون تموت يم المشرعه

❥❥❥❥ـــــــــــــ❁❁ـــــــــــــ❥❥❥❥

فدوة للعطشان طيحو عالثره 

ماتعوضني حرگتي بمنحره 

من تموتون أمشي أصيح المعذره

موتو لعيون الحسين

عفيه بيكم يالبنين

المعذره من حسين جثته امكطعه

❥❥❥❥ـــــــــــــ❁❁ـــــــــــــ❥❥❥❥

احزام صيروا للاخو اه يالولد

انتوا ليه اليوم يا اجمل سند

سوئ اريدنكم ولا اوصي بعد

موتو لعيون الحسين

عفيه بيكم يالبنين

انه اودعكم ييمه اموجعه

❥❥❥❥ـــــــــــــ❁❁ـــــــــــــ❥❥❥❥

اموجع ادليلي ييمه من الجفه

نوركم من بيتي هالليله طفه

جرحي بجفاكم ولا هاد و شفه

موتو لعيون الحسين

عفيه بيكم يالبنين

اه ياناري بدليلي املسعه

❥❥❥❥ـــــــــــــ❁❁ـــــــــــــ❥❥❥❥

اخر وصيتي عله زينب بت علي

ابد مااااااريدنها تبقئ بلا ولي

يمها ضلوا يمها ها ياكل هلي

موتو لعيون الحسين

عفيه بيكم يالبنين

بسيف اريد اركابكم متگطعه

❥❥❥❥ـــــــــــــ❁❁ـــــــــــــ❥❥❥❥

#للشاعرة غدير الحساني

من ديوان نحر الرسالة ج4

لطمية عاشوريه مربعه 

ــــــــــــــــــــــــــ 

جيت الكربلاه بس تدمع العين 

العباس انوحن لو الحسين 

ــــــــــــــــــــــــــ 

جيت الكربلاه وضيعت اخوتي 

وياهم يربي طلبت موتي 

عليهم صارخه ومرفوع صوتي حكها من البجه لو تعمه هل عين 

ــــــــــــــــــــــــــ 

هل عاشور يا يمه شجرالي 

المن التفت ما ضلي والي 

يا حال الهضم يا يمه حالي 

راحو كل هلي وكلبي نارين 

ــــــــــــــــــــــــــ 

خوان الدهر فرك بل احباب 

وينك يا علي تحضر هل امصاب 

اولادك غدو نومه بل اتراب 

ومنين الصبر يا يمه امنين 

ــــــــــــــــــــــــــ 

ابجي عله اهل لو حرك الخيام 

اطفالي اصبحو يا ناس ايتام 

ابو فاضل يا يمه النه ما دام 

نايم عل نهر لا يسره او يمين 

ــــــــــــــــــــــــــ 

لشبان كلبي بس يودهم 

ما كملو عمر نومه كبرهم 

يا شده ورد يا ناس جنهم 

ما شافو عرس ويلا امضلمين 

ــــــــــــــــــــــــــ 

ريت امي تجي لهاي المصايب بكيت امحيره ومالي حبايب 

ما بين الضلم وكليبي ذايب 

عني اهل الوفه صارو بعيدين 

ــــــــــــــــــــــــــ 

يم زينب الحره اشكي حالي 

سلام ابعث اله ودمعي هالي 

بحق عباس انخه عل جرالي 

تكتب ام علي يا طول السنين 

ــــــــــــــــــــــــــ

المله ام علي السعدي

قصيده للهلال [جريمة قتل]

عاشور لمن تهل **تراويني جرح وطفل 

يامعظم امصيبتك **بيها جريمة قتل

❥❥❥❥ـــــــــــــ❁❁ـــــــــــــ❥❥❥❥

ماينسكت هاي الجريمه اعليها 

يهلال شهرك بالحزن چاويها

گدام زينب ينذبح واليها 

وتشوف نحر ودمه **وضلوعك متهشمه 

يسحگ اعليها النذل**بيها جريمة قتل 

❥❥❥❥ـــــــــــــ❁❁ـــــــــــــ❥❥❥❥

عاشور من تهل أظل محزونه

وشيخ الهواشم غمضاها عيونه 

رحت النهر خاطر اطلبه بعونه 

واخجلت شفت السهم **ومغطي عينه بعلم 

ميت ومني خجل**بيها جريمة قتل

❥❥❥❥ـــــــــــــ❁❁ـــــــــــــ❥❥❥❥

وحسين اشوف مسلبات هدومه 

وتمارس الحومه من وگع بدمومه

من طاح رأسه تيهيت ارسومه 

اركض واصيحن عليه **بلكي يأشر بديه 

يتضيع المنچتل** بيها جريمة قتل

❥❥❥❥ـــــــــــــ❁❁ـــــــــــــ❥❥❥❥

يهلال كل هذا وبعد فجعونه 

شنو ذنب عبدالله ويجتلونه 

وبحضن الحسين بسهم يرمونه 

وامه تشوفه برمح** ومتنام ليل وصبح 

شيشيل عني الحمل**بيها جريمة قتل 

❥❥❥❥ـــــــــــــ❁❁ـــــــــــــ❥❥❥❥

وتبدي المصايب من حرگ هالخيمات 

ولليسر ينگادن تره العلويات 

وبقصر ابن مرجانه طبن وسفات 

خبرو عباس النشم **زينب أبين الزلم 

لكل فعل ردة فعل **بيها جريمة قتل 

الشاعره رسل الابراهيمي

فزاعية للهلال ( يلچم اضلوعي اهلاله)

الله يساعد امك من يهل عاشور

تذكر هامتك لو نحرك المنحور

نار امصيبتك صاحت بگلبي تفور

ثلث تيام نعشك بالحرب مشمور

( نزلة الفزاعية )

هاذه الشهر كلما يهل

يلچم اضلوعي اهلاله

كلما يهل يعميني

ويفجعني ويبچيني

والكربله يوديني

واذكر حسين وحاله

اگعد بنص الحومه

ومصوبه ومهضومه

اذكر حسين ويومه

من داسته الخياله

ركضت الخيل وداسته

ولچمن اصوابه وطبرته

انوب اروح الخيمته

واذكر ونين اعياله

ضلت اعياله امطشره

والنار شبت مسعره

واگصد لسبع الگنطره

بدموعي الهماله

انوب اروحن للنهر

اشبع مصايب هالشهر

عباس عالهامه انطبر

وحسين محد شاله

وحسين ضل بمصرعه

الطم اگبال المشرعه

امتون الحنين امگطعه

وهد عالحرم چتاله

كساع چتاله ويهد

مابيه حيل الطم جهد

عاشور اگله لاترد

ويرد عليه اشماله

----

شاعرة اهل البيت 

ام هجران العمارچية

موشح لعلي الاكبر عليه السلام (( وين ينباع الصبر ))

وين ينباع الصبر دلوني

گلبي مهضوم وتهل عيوني

ماتنام العين وادموعي تهل

ردت الاكبر للخيم يرجع عدل

ياحسافه ايطيح ضامي وينچنل

خاب رجواي وگطعت ضنوني

وين ينباع الصبر دلوني

خاب رجواي وگطع ضني بعد

من شفت راسه تهشم وانمرد

لاضخر هاليوم عندي ولاسند

فجعوا حسين العده وفجعوني

وين ينباع الصبر دلوني

فجعوا العدوان گلبي وگلب ابوه

هشموا راس العزيز وطبروه

راد شربت ماي لاچن ماسگوه

كون لاحوا هامتي وصابوني

وين ينباع الصبر دلوني

كون صابوني ولاصابوا علي

يفجع الدلال صيوانه خلي

بالعمر والروح والدنيه شلي

ومااواطن فرگته اتعرفوني

وين ينباع الصبر دلوني

مااواطن غيبته ولافرگته

امطبر ومچتول جابوه اخوته

زينب تنوح وتون اتلگته

هاي هيه اتصيح ضيعتوني

وين ينباع الصبر دلوني

هاي هيه انصيح يهل المرجله

گلبي ياضيم وقهر يتحمله

باچر اعليه ايتهدد حرمله

بين خولي والشمر عفتوني

وين ينباع الصبر دلوني

لاصبر باچر يضل ولا دلال 

ليش نايم ياعلي الاكبر تعال

تقبل يچتفون زينب بالحبال

بالسياط وبالعصي يضربوني

وين ينباع الصبر دلوني

✍️شاعرة اهل البيت 

ام هجران العمارچية

لطميه العلي الاكبر (ع)(اليوم منك أيست) 

ياعلي الاكبر يماي عيونـي 

ليش منك يالولد حرموني

الــيوم مـنـك  أيست

ريت وي موتك متت

ياعلي الاكبر يماي  اعيوني

ــــــــــــــــــــــــــــــــــــ

اليوم حرموني العده من شوفتك

ريـــــت يبني رحـــت ويه روحتك

ولا اشـــوفنها  السهام الــــصابتك

بحسره يايمه صحت

ريت وي موتك متت

ياعلي الاكبر  يماي  عيوني 

ــــــــــــــــــــــــــــــــــــ

بحسره انـوح اعليك يبني ياعلي

بعد عينك يالولد منـهـو الـــــي

بطيحتك هل طاح يمه محملي

ضيم من بعدك شفت 

ريت وي موتك متت

ياعلي الاكبر يماي عيوني 

ــــــــــــــــــــــــــــــــــــ

شفت من بعدك ييمه  النايبه

اعليك هاي الروح ظلت ذايبه

والنوايب بالگلب هل  صايبه

اوياك يالغالــي ردت

ريت وي موتك متت

ياعلي الاكبر يماي عيوني 

ــــــــــــــــــــــــــــــــــــ

اتمنى كون اوياك موتتنه سوه

ولا اعيش ولا اشـم عذب الهوه

گلبي بجمر  الحزن  يمه انچوه

مـنــي يوليدي رحت

ريت وي موتك متت

ياعلي الاكبر يماي عيوني 

ــــــــــــــــــــــــــــــــــــــــ

رحت مني وگلبي يوليدي انشلع

ودمعي علوجنات يـــايمه انطبع 

حين راسك علرمح يبني انرفع

حيـل  يمه   اتکـدرت 

ريـت وي موتك متت

ياعلي الاكبر يماي عيوني 

ــــــــــــــــــــــــــــــــــــــــ

تــــمت بعون الله تعالى 

 بقــــ✍🏻لم خـادمة السيده رقيه عليها  السلام

*الشـــاعره سهام علــــــي المـــالكــي*

قصيده للأمام الحسين عليه السلام( عشگته أبجنون )

عشگته أبجنون ... حبيبي حسين 

❥━──➸➽❥💔❥━──➸➽❥💔

ما أريدن روحي ... لون تعشگ غيرك 

إنه يكبر عمري ... منك ومن خيرك 

يا لغز وأبعيني ... دمعتي تفسيرك 

يلي رافع صيتي ... لاچن إنه أزغيرك 

يدمع العيون ... حبيبي حسين

❥━──➸➽❥💔❥━──➸➽❥💔

يا حزن أيامي ... يا لحن آهاتي 

يا كلام أجروحي ... يا ألم وناتي 

عايش أنته أبعيني ... عايش أنته أبذاتي

يا حسين بأسمك ... تعتلي صيحاتي 

يا أول حنون ... حبيبي حسين

❥━──➸➽❥💔❥━──➸➽❥💔

خاسر الي عافك ... فايز الي حبك 

شكو خير ورحمه ... كل هذن أبدربك 

دومك أتمد أيدك ... رغم أنه متعبك 

موطن الكل خادم ... أحله موطن گلبك

أمير الشجون ... حبيبي حسين

❥━──➸➽❥💔❥━──➸➽❥💔

غالي حبك غالي ... يا أمير أسنيني 

من كرم ماعونك ... أشبع أمخليني 

ياهو مثلك مالك ... عبدك أمعليني 

سد عيوني الغيرك ... لجلك أفتح عيني

بس ألك أكون ... حبيبي حسين

❥━──➸➽❥💔❥━──➸➽❥💔

يالمحبتك جنه ... سيدي يلغالي

وأبخدمتك شامخ ... يبگه راسي عالي

سيدي ما عوفك ... أنته كل أمالي

بالأدروب الضلمه ... نورك الضوالي

يالگلبك حنون ... حبيبي حسين

❥━──➸➽❥💔❥━──➸➽❥💔

*لخادمة الأمام الحسين 《ع》*

*الشاعرة ✍️ نشوان الكناني*

من ديوان جراحات الطف الجزء السادس

ماشيه بعزوه اخوها ورافعه الراس

بيها خصله حيدره والهيبه عباس 

   وثقت طف كربله

  راكظه بذاك  الفله

 هاي زينب هاي زينب

==============

في بلاد الشام .خلت لها برهان المجد

من حجت وكفت بعزه ولخصم لها سجد

انتي هيبه وعالمه.شخصج لهاي انوجد

رفعه اعلان وحرب

 وصلتهن بلدرب

هاي زينب هاي زينب

〰️〰️〰️〰️

 بكل بلد خلت قضيه اخت عباس الكفيل

 وثقت كل  المواقف 

ولشمس الها تميل

هاي تربيه علي  ولكمر الها ضلليل

 رفعه اعلان وحرب

وصلتهن بلدرب

 ها ي زينب هاي زينب

〰️〰️〰️

كل  جدم .لها.العقيله خلت اثار وحكم

 شامخه وتمشي بعزمها بكل بلد خلت علم

 رغم ذاك الشافته تسلت بحركه الم

 رفعه اعلان وحرب

 وصلتهن بلدرب

 هاي زينب هاي زينب

〰️〰️〰️〰️

لا تزعلون ابو فاضل لا تكلوله سبيه

هاي زينب بت علي حامي الحميه

اعلام موقفها اصبحت بلغاضريه

 رفعه علان وحرب

 وصلتهن بلدرب

هاي زينب هاي زينب

✍🏻بقلم خادمه البتول المله ولشاعره ام نادين المحمداويه ملكه الحسجه الجنوبيه




حجم الخط
+
16
-
تباعد السطور
+
2
-