📩

كلمات لطمية ليل السفر محمد الجنامي

كلمات قصيدة ليل السفر محمد الجنامي مكتوبة كاملة

قصيدة :- ليل السفر
 كلمات :- الشاعر كرار حسين الكربلائي . 
 أداء :- الرادود محمد الجنامي . 
---------- 
ليل السفر گضيته ابصلاتي ودعائي وما غفت عيني
اتوسـلك حبيبي ابضـعنكم اخـذني ولا تخليـني
بويه آنه من المرض نحيله 
بويه لا تـكسـر گـلب عليلـه 
... يــا دوه العــليلـــه ...

-----------

من گلت باجر سفر حيلي هدمته 
الليل كله ما نمت و اعيونك انته 
تحجي وي ام الوفه و حجيك سمعته 
اتكلها عينج عالعليله وتبجي سكته 

بجيت الكـلمتك .. عليه اوصيتك 
عـزيزة ابنـيـتك .. يـضـيء عـيني 
احلفك بالحسن .. اخذني بالضعن 
يعـذبني الـزمن .. يـضـيء عـيني 

وياك اريد اسافر حياتي بدونك معنى ما بيها 
و ابنـيتـك الحـبيـبه عليلـه يـغالـي لا تبـجـيها 
عمري غربه لـو مشـه خليله
بويه لا تـكسـر گـلب عليلـه 
... يــا دوه العــليلـــه ... 

----------

انته ما جارحني كل عمري و حياتي 
اتگـول اعـز مـن الـهوه عنـدي بناتـي 
آنه ادري ابـروحـك اشـكدها غـلاتـي
گلب ليش اتـعوفني و تاخـذ خواتـي 

ابرحيلك و السفر .. يشيبني السهر 
امـوت امـن القهر .. إذا تـــرحـــل 
حـيـاتــي ذابــلـه .. دمعـتي هامـله 
اخـذنـي الكـربـله .. إذا تـــرحـــل 

يتمنه گلبي يرتاح اخذني و غلاتك راحتي يمك 
لمن تنادي باسمي اقل شي اذكرك ابمفاطمة امك 
گلبي خايف سفرتك طويله 
بويه لا تـكسـر گـلب عليلـه 
... يــا دوه العــليلـــه ...

----------

اتهيات للسفر لأرض الغاضريه 
وصحت اصعدن يا سكينه ويارقيه 
اشعجب جفك بويه ما اشر عليه 
من گلتلي ظلي تدري اشصار بيه 

اعله وجهي طيحتي .. واخذت ارويحتي 
دخـيـلك صــحـيتـي .. صــعــب بــعــدك
وگعـت اعـله التـرب .. بجيت امت الگلب 
اشـــمـــن بالــــدرب .. صــعــب بــعــدك

طفله وكسرني وكتي واكفكف دمعتي ابطارف احجابي 
و اتحذر ابكلامي اخافن تجرحك كلمة اعتابي 
احجايه انتي ظلي مو قليله 
بـويـه لا تـكسـر گـلب عليلـه 
... يــا دوه العــليلـــه ...

----------

انته بعدك ما مشيت وگلبي محتار 
اشلون لو صار الغروب وخاليه الدار 
عاد خليلي قميصك يبقه تذكار 
ولو هيه النار ما تتطفه بالنار 

وداعك مو سهل .. ابد ما ينحمل 
دمعـتـي دم تهل .. بــعد عيــنــك
رحيـلك غربـتي .. وجودك فرحتي 
اشيداوي علتي .. بــعد عيــنــك 

انته الحنين اعرفك تگلي تعالي و خاطري اتجبره 
حاجيلي عمي عباس اريده بالضعون محملي ايحضره 
اوياك اخذني الخاطر العقيله 
بـويـه لا تـكسـر گـلب عليلـه 
... يــا دوه العــليلـــه ...

----------

رحتوا وانه اركض وراكم يأهل الضعون 
رحتوا وانه ابجي عليكم وانتوا تبجون 
اعليه ما خفتوا اموتن من تروحون 
بالسلامه أن شاء الله كلكم ترجعون 

الگلب حس بالخطر .. يگول ابهالسفر
يمــوت اشـجم گمر .. يبـــو اليمـــه 
يذبـحون كـل هـلي .. و حرمنه تنولي 
ولا تــــرجـــع الـــي .. يبـــو اليمـــه 

ابعالم خيالي شفتك يذبحوك يسلبوك حتى العمامه 
وبت فاطمه الحبيبه غريبه وگمرها امهشم الهامه 
و الضـعن يرجـع بلا كفـيله 
بويه لا تـكسـر گـلب عليلـه 
... يــا دوه العــليلـــه ...