كلمات قصيدة كربلاء اسمعيني محمد الجنامي مكتوبة كاملة
قصيدة :- كربلاء اسمعيني .
كلمات :- الشاعر كرار حسين الكربلائي .
أداء :- الرادود محمد الجنامي .
🖤🔷🔷🖤
كربلاء اسمعيني ... ما اريد كل بنيني
اخذي ولدي هديه
رجعي حسين اليه
كــــربــــلاء ... كــــربــــلاء
🖤🔷🔷🖤
آنه لو مر طاري اسمي كلها صاحت والنعم
الله خالقني اخلف من علي أربع زلم
اختصت ابفن الشجاعه تهزم وما تنهزم
الطف إذا يبدي بحصاده اتغربل ابروس الزلم
دخيل الله اذا بين زعلها
بنيها تنكث الكاع و اهلها
الشمس ترجع سنه امن اتباوعلها
ماكو خوف بيها أمني ... لا يجون ما يهمني
قـدمـتـهـم بـديـه
رجعي حسين اليه
كــــربــــلاء ... كــــربــــلاء
🖤🔷🔷🖤
رضعتم حب حسيني وعالعشك كبروا سوه
حسين إذا ما يرضه عنهم ما يشمون الهوه
من زغرهم علمتهم عالسيوف و عاللوه
گبل اساميهم تراني حفظتهم نينوه
هناديهم إذا يلمع ضواها
الزلم بس العجاج يظل وراها
ولا تعرف وجههم من كفاها
هم رجال كل مهمه ... والوفاء عدها ذمه
حني يا طف عليه
رجعي حسين اليه
كــــربــــلاء ... كــــربــــلاء
🖤🔷🔷🖤
حلفتهم بالمحنه و بالتعب يوفون الي
كتله جعفر افدي اخيك كلي يمه اتدللي
عون اطلبك كال ابشري خلي راسج يعتلي
و التفتت العون احشمه و هوس ابغيرة علي
صحت يمه العرب كلمتها كلمه
اللزم ظهر الحسين انكله زلمه
عزيز الله يهنياله اليخدمه
يا طفوف امنياتي ... ولدي هاي كل حياتي
بدمع اكتب وصيه
رجعي حسين اليه
كــــربــــلاء ... كــــربــــلاء
🖤🔷🔷🖤
شايله العصابه بيدي و هوست هوسة فخر
كتله يا عباس اريده اسمك احزام الظهر
احسين إذا يعطش يغالي اتبده گدامه نهر
يا گمر و الرايه بيدك دگ وتدها اعله الگمر
اكلك كلمه يمه و اصفن الها
ردت زينب تحجب حتى ظلها
و يبشروني وفه وياها الكفلها
گلبي صاح من حنانه ... بت علي اتظل امانه
ويه أخته الابيه
رجعي حسين اليه
كــــربــــلاء ... كــــربــــلاء
🖤🔷🔷🖤
كربله دمعاتي نزلت ما يرد حسين احس
كربله ايذبحونه ضامي كربله وصي الشمس
كربله وصي الحوافر صدره باجر ينرفس
كربله زينب غريبه كربله شيرد أمس
تحشم اخوتها ما واحد يجيها
و يسلبوها عمت عيني عليها
يجتفوها و حبل يأكل بديها
و آنه اصيح بالمصيبه ... زينباه يا غريبه
نادي يالغاضريه
رجعي حسين اليه
كــــربــــلاء ... كــــربــــلاء