كلمات قصيدة دار الحبيبة باسم الكربلائي مكتوبة كاملة
📜قصيدة : دار الحبيبة
✒️للشاعر : علي السقاي
📌 : الليالي الفاطمية
📅: ليلة 7 ربيع الثاني 1444
🕌: العتبة العلوية المقدسة
🎵 طور : #ماعندي_غيرك #نجمة_سهيل #الشاهد_الرابع
دار الحبيبه عگب ضحكتها مهجوره
ابكل الزوايا اترِكَت للذاكره صوره
أسمَع حچي الناس علي ظل يكسر الخاطِر
وِامْن اَدخل الدار دمِعتي اشتگدَر اتكابِر
دار الحبيبه
▪️▪️▪️▪️▪️
أنا الخايض حُروب اثلاثه واثمانين
رغُم شِدَّتها ما هَزَّتلي طارف عين
لچن هالليله بفراگ ام حسن واحسين
هَزَّتني المصيبه اْو مِردفات البين
فارسها أصبح جَريح اْو مِنلوي سَرجه
حرب المشاعر بِدت وانصابت المُهجه
صرت اَشعُر الضيم حُسامه اعله الگلب شاهِر
وِامْن اَدخل الدار دمِعتي اشتگدَر اتكابِر
دار الحبيبه
▪️▪️▪️▪️▪️
شالت سلوتي اِمْن اِنشالت الزهره
دِفَنت الجَنّه بِيديني ابوسط حفره
چم مرّه البچي مَوَّتني چم مرّه
أبيع الدار لو ما چان اِلي ذكره
رحت ابنعشها اْو تِزاحِم عيني أعباري
گبر الوديعه تمنّيته صُبَح داري
اشلون اَرجع اشلون أحس عالفرگه مو گادِر
وِامْن اَدخل الدار دمِعتي اشتگدَر اتكابِر
دار الحبيبه
▪️▪️▪️▪️▪️
الضلع گدما أخذ مني اْو شغل بالي
صُبَح مثل الضلِع لُـ ام الحسن حالي
اِرجعِت مِنّ الدفن مَحني ابدمع هالي
كِسَرني الباب بس ما جاب آجالي
الباب اِمْن اَشوفه يفزّز دمعة اعيوني
ما چَنّه يدري شنو ابخيـبر يسمّوني
(إلقالع الباب) أنا وابحالتي اشصاير
وِامْن اَدخل الدار دمِعتي اشتگدَر اتكابِر
دار الحبيبه
▪️▪️▪️▪️▪️
حگها الدار لو تتفطّر الجدران
فُگدَت صوت فاطم يقرأ القرآن
الجماد اعليها يبچي اشلون اَبو الوجدان
شعوري بس يعِرفه الخالق الدّيان
محّد مثيلي حِمَل فَگْد الذي احمَلته
فاگد مُحمّد أنا اْو تالي افگدِت بنته
من حگها عيناي تذوب اْو ينعمي الناظِر
وِامْن اَدخل الدار دمِعتي اشتگدَر اتكابِر
دار الحبيبه
▪️▪️▪️▪️▪️
غدت هالدار تبچي اْو تنتحب مثلي
وين الچانت ابهالزاويه اتصلّي
ابصلاة الليل أسمع تندعي اِلأجلي
يرب احفظ علي اِتناجي ابدمع يهلي
تدري ابفگدها علي ابهالدنيا يتغرّب
ابحزني عليها اشكثر دلالي يتعذّب
ايتعبني الفراگ وَاظَل اِلموتتي امناطِر
وِامْن اَدخل الدار دمِعتي اشتگدَر اتكابِر
دار الحبيبه
▪️▪️▪️▪️▪️
الأماكن كلها صارت مُظلمه ابهالدار
اشما أعلِگ شمِع ماشُوفن الأنوار
اْو صِرِت أستغفر الله اِمْن اَنظر الفقّار
لو أمضي الوصيّه ، لو أهِم بالثار
ليث الحرايب أنا اْو تشهد جحافلها
لو مالوصيه اِگلَبِت عاليها سافلها
ما أبقى مقهور وَانا ابكل موزمه القاهِر
وِامْن اَدخل الدار دمِعتي اشتگدَر اتكابِر
دار الحبيبه
▪️▪️▪️▪️▪️
قَسم باللي جعلني فَيْصَل البرزخ
لو ما المصطفى ما للصبر أرضخ
چان الصار غير الصار واتأرّخ
بياض امهندي من دمهم اتلطّخ
گبل القِيامه القِيامه الأولى يم داري
اْو تسبُگ جهنّم عليهم مَحرَگة ناري
يا لَيتني اتراب أخلّي يصرخ الكافِر
وِامْن اَدخل الدار دمِعتي اشتگدَر اتكابِر
دار الحبيبه