كلمات قصيدة وداعة الله || ملا مجتبى الكعبي مكتوبه كامله
لطمية وداعت الله || ملا مجتبى الكعبي
حسين خويه وداعة الله رايحه يـعيوني
انته فوگ الرمضه وآنه عالهزل أخذوني
_
ياعزيز اختك اعوفك هذا مو تعويدي
روحتي يبن امي گوه وداعتك يعضيدي
من رخت أيدك يخويه الحبل صار بأيدي
ومـن دليلك بالمثلث يلـولي حرموني
_
امس بخيامك مچاني امعززه ومحشومه
ومن طحت حرگوه يخويه واطلعت للحومه
واصعدت عالتل واندبك شايطه ومضيومه
گوم يبن امي لخواتك والحگ اعله اضعوني
_
انچان عرج الساده بعده يدگ ياوالينه
وتسمع الصايح يخويه گوم والحگ لينه
تاهت امن ايدي رقيه وعاتكه واسكينه
رد يبو اليمه اعله صوتي گبل لا يسبوني
_
للفله امـن الحـرگ هجت والخيول اعيالك
خيمه خيمه ادخل واطلّع بالبگه امن اطفالك
كـون تنظـر حـالـي تبچي وينكسر دلالك
وين صوتك وين چفك يمسح اعله اجفوني
_
أيست منك تجيني امن اسمعت عدوانك
اتباشرو ويـلي بذبحتك ياعميد اخوانك
امن العجاج انفض يخويه شاهدت جثمانك
مـرمـي وعيونك عليه تبچي غبرة لوني
_
جيتك ابلا رايه فـوگي ولا كفيل او والي
وهـاي اول مـره اطـلع دون اخـو يبرالي
جيت اودعنك واروحـن لليسر بااحبالي
وردت يم جسمك اضلن والعده منعوني
_
خطوه خطوه عنك ابعد والّي بيني وبينك
خوّه چاتگضي بهزيله ؟! وافترگ عن عينك
رحت مني ورحت عنك ويّ المسلّبينك
عنك وعن ابو فاضل باليسر بعدوني
_
يلي راسك فوگ رمحه بسكته انوح ولوعه
خاف ماتسمع بواچي امن اختك المفجوعه
اعليك يبن امي النواعي بالسبي ممنوعه
وبزجر من انعه فگدك واندب يسكتوني
_
عـسه لا طالت حياتي من بعد عينك عسه
وانا اشوف بأيد ( بجدل ) محبس ايدك لابسه
گوه اكابر واخفي نوحي ودمع عيني احبسه
خويه وبسجن بالخرايب يلشهم سجنوني