كلمات قصيدة مرسال موتك | مسلم الوائلي مكتوبه كامله
لطمية مرسال موتك | مسلم الوائلي
القصيدة: مرسال موتك
أداء: مسلم الوائلي
كلمات: حسين كريم الشبلاوي
~
مرسال موتك من اجاني
لو ما حميدة ميت اني
بعدني اقره واجت بتك عليه
اضن عرفتني من رجفة اديه
ميت اني .. ميت اني
~
من اقره وارجف شافتني جتني وظلت تبجي بكتري
ضميت دموعي وعرفتني لمن شافت ايدي بظهري
بنيتك ما تدري ودمعتها جانت مالت واحد يدري
سألتني بدموع الثكاله
احجيلي شنو البهالرساله
جاوبني عمي بمسلم شصار
محلفتك بجود الكفاله
گالتلي مسلم عمي وينه
گتلها مذبوح وبجينه
صرنه اثنينه نحجي بهظيمه
وگتلها انتي من هسه يتيمه
ميت اني .. ميت اني
~~~~
هاي اول مره تبجيني وأول واحد يگطع بيه
منگد ما مهظوم وحاير زينب گامت تبجي عليه
جنك عباس وعايفني انت افراگك موش شويه
مو زين حيل الخبر مو زين
يكسر الخاطر صار الحسين
گطعت الخوه وگطعت الماي
صارن سوه وياي الأثنين
عالأقل لو مذبوح يمي
فوگاك اطيحن واشگ هدمي
گالوا بالذبح وصيت بيه
واخر سالفه امسلم عليه
ميت اني .. ميت اني
~~~
يا عباس اتلاحگ ظهري ظهر حسينك كلش حدب
حسين اليخجل يبجي الوحده ظل گدام الوادم ينحب
يكسر زلمه افراگ الزلمه جا يا خويه شلون بزينب
كسرت الگصبه بريح عالي
مكسور گلبي وگلبي غالي
مو من غربتي گلبي مهظوم
من مرت ام عون اعله بالي
انه الهظمني مو حميده
بس كون زينب مو وحيده
اخر نظره طلعت من العيون
وصيت الهوه يسلم عله ام عون
ميت اني .. ميت اني
~~~~
مو ابن عم ومات افراگك مو بس بنتك هم يتمني
گمت اتخيل واگف وحدي وشگد سيوف يريدني
واحد يطعن بيه وواحد يتربع فوگي ويذبحني
تكثر جروحي ويعله الصياح
لحد يخلي حسين يرتاح
اهل السيوف تعوف الحسين
تلتم عله حسين اهل الرماح
يا ابو حميدة والله حيره
يلمون أخيك بالحصيره
انه وياك نتشارك سويه
الخيل السحگتك داست عليه
ميت اني .. ميت اني
~~~~
يا مسلم باجر زينبنه من يذبحوني يجتفوها
والمحد شاف اخيال الها بنص سوگ الكوفه يوگفوها
باجر مو زينب مو علويه الناس المسبيه يسموها
اثگل مصيبه من المصايب
واكبر جرح عد آل طالب
هند بقصرها وتامر الناس
وزينب تنام بنص خرايب
انت غربتك غربتي اني
يا ابني يا واحد اخواني
البجي موش اعله گدرك يا اخو الحيل
راح الطم عليك بحافر الخيل
ميت اني .. ميت اني