كلمات قصيدة عشتك بالصور محمد الحلفي مكتوبه كامله
لطمية عشتك بالصور محمد الحلفي
أول ما صرت بيك أتعلقت
بعيونك همت حبيبي يا حسين
يا أجمل بشر عشگتك بالصور
يالحبك كُبر حبيبي يا حسين
يالعيشتني من الزغر بأيامك و خيرك
مثل الحمام البالصحن أرد أنحسب طيرك
أنت أجمل أحلام العمر و أتمنى تفسيرك
وچفوفي بس لحضرتك ما أمدهن لغيرك
يا أجمل وطن القبه و الصحن
خيراتك جزن حبيبي يا حسين ..(٢)
ـــــــــــــــــــــــــــــــــــــــــــــــــــــــــــــــــ
ها يا إبن علي غيرك ما ألي
ياديني وهلي حبيبي يا حسين
أرسم صورتك وألمح نظرتك
وتدري بضحكتك حبيبي يا حسين
يحسين أحسنّك أبو و تكلي يوليدي
كلما تحس جدمك يزل خلي ايدك بأيدي
كلما يضيعني الوكت و أخلف مواعيدي
بشبابك الزم سيدي و تصغر مواليدي
يا صاحب و أخو يا خيمه وأبو
يا المثلك منو حبيبي يا حسين
ـــــــــــــــــــــــــــــــــــــــــــــــــــــــــــــــــ
مصدر للعشگ و بباك ندك
يا حبنا الصدك حبيبي يا حسين
ونحرك يا صبح مو مالت ذبح
يا عشرة ربح حبيبي يا حسين
مو بس أحبك لا گمت أهوى اليحبونك
تتبده من نحرك شمس كلما يذبحونك
انت أربعين لوحدك وين اليشبهونك
رغم العطش ، رغم الذبح و تخبل عيونك
نحرك بسمله يا أول هلا
ضامي بكربلا حبيبي يا حسين
ـــــــــــــــــــــــــــــــــــــــــــــــــــــــــــــــــ
شكراً عالنِعم يا فياي الخدم
يمعزب السهم حبيبي يا حسين
شريان الگلب تسبيح الدرب
أتمنى اقترب حبيبي يا حسين
أسمك أمان و بي حرز من تنقره حروفه
حبيت الحسين شكثر من دون ماشوفه
ظلمه نجي و نطلع ضوه لو گبره نطوفه
جيش و شجاعة منحرك ما همته سيوفه
يا الدمك حبر وصوتك منتصر
بس ليك الشعر حبيبي يا حسين
ـــــــــــــــــــــــــــــــــــــــــــــــــــــــــــــــــ
يالحبك ذهب أحسبني وهب
لو اسمي أنكتب حبيبي يا حسين
ديني و دنيتي أهلي و فطرتي
حبك غايتي حبيبي يا حسين
ماباوع لغيرك أبد لو تنگضي سنيني
فضلك چبير و صورتك ترست نظر عيني
خليني بس لخدمتك يحسين خليني
واليسأل على أسمي الصدك آنه اخدم حسيني
حطني بخدمتك طير بحضرتك
حسين و صورتك حبيبي يا حسين
ـــــــــــــــــــــــــــــــــــــــــــــــــــــــــــــــــ
- عشگتك بالصور
الرادود | محمد الحلفي
الشاعر | السيد محمود الموسوي
الكاتب | الميرزا محمد المياحي