كلمات قصيدة دفن الأجساد الطاهرة محمد باقر الخاقاني مكتوبه كامله
لطمية دفن الأجساد الطاهرة محمد باقر الخاقاني
عمه يا علي السجاد
صاحت زينب الكبرى
إبن أمي حصل دفان
لو لا ظل على الغبره؟!
ــــــــــــــــــــــــــــــــــــ
عمه يا علي السجاد
لخويه ما حصل دفان؟
يدفن جثة ابن أمي
للزهره يسوّي احسان
ما شفنه يظل ميت
ثلث أيام على التربان
ما واحد تدّناله
وعن حر الشمس شاله
عفت الولي بهالحاله
اخته ولاج گلبي عليه
وگلب الأخت شيصبره
ـــــــــــــــــــــــــــــــــــــــــــــــــــــ
يعمه عادة المچتول
يدفنوا ما يظل مرمي
وخوي على الثرى عفته
مطروح و كثر همي
مهو ابن أمي وچنت بحماه
عمت عيني على ابن أمي
رحت ميسره وعفته
وبگت فوگ الثره جثته
ما يدري اشجرى على اخته
فگد وليانها وعزها
وشماته ومبعد المسره
ـــــــــــــــــــــــــــــــــــــــــــــــــــــ
يعمه من الظهر للساع
گلي چنت غايب وين
سمعها وهاجت احزانه
ودِمه سالت دموع العين
ناداها غبت عنچ
رحت يم جسم ابوي حسين
رحت الوالدي شفته
ثلث أيام فارگته
يعمه ودفنت جثته
ورضيع البالسهم مفطوم
وسدته على صدره
ـــــــــــــــــــــــــــــــــــــــــــــــــــــ
واخبرچ بعد يا عمه
دفنت انصار ابوي حسين
كلها وكل اهل بيته
وعساچ ان شاء الله تأمنين
وزينب سمعته وصاحت
علي الأكبر دفنته وين !!؟
تدري بوالده يحبه
شباب وفرگته صعبه
يگلها ونمرد گلب
علي الأكبر يعمه صار
يم حسين أبو گبره
ـــــــــــــــــــــــــــــــــــــــــــــــــــــ
وزينب سمعته و صاحت
انشدك يا علي نِشده
يعمه عادة الميت
يصير على الترب خده
شلون ادفنت ابوك حسين
يعمه وراس ما عنده ..
سمع عمته وهِمل دمعه
وثگل عزمه ولزم ضلعه
ويگلها واختلف وضعه
يعمه بدال خد حسين
صار على الترب نحره
ـــــــــــــــــــــــــــــــــــــــــــــــــــــ
إلتوت وتحسرت زينب
وصاحت والدمع يجري
عمه يا علي السجاد
ضاج من الهظم صدري
انشدك عن ابو فاضل
اخوي اللي كفل خدري
شلعت السهم من عينه
دفنت وياه چفينه
يعمه الجود چاوينه
اجيت وما جبت وياك
جوده ورايته الخضره
ـــــــــــــــــــــــــــــــــــــــــــــــــــــ
عن راية بدر هاشم
وجوده لا تنشديني
يعمه بعلتي وصواب
حامي الظعن خليني
شفت عينه وچفينه
بعيني ولا عمت عيني
ومع ضعفي وعظم گيدي
ادفنت حامي الظعن بيدي
وصحت يا حسرتي زيدي
وزادت حسرتي لاچن
يعمه شتنفع الحسره
ـــــــــــــــــــــــــــــــــــــــــــــــــــــ
يعمه اشتنفع الحسرات
والـ وَن والدمع شيفيد
انتي ميسره وآنه
ابتليت ابجامعه وبگيد
يعمه وبعد ما ندري
من عدنه العدو شيريد
گولي انذبح والينا
ليش الگوم تسبينا
اشكثر وصى النبي بينا
احفظوا عترتي بعدي
وهذي حالة العتره
ـــــــــــــــــــــــــــــــــــــــــــــــــــــ
- دفن الأجساد الطاهرة
الرادود | محمد الباقر الخاقاني
الشاعر | المرحوم معين السباك
الكاتب | الميرزا محمد المياحي