كلمات قصيدة ياعمي سامحني مجتبى الكعبي مكتوبه كامله
لطمية ياعمي سامحني مجتبى الكعبي
قصيدة:(ياعمي سامحني)
الرادود: ملا مچتبى الكعبي
الشاعر: حيدر سامي السعدي
ــــــــــــــــــــــــــــــــــــــــ
حيهم ياخو زينب حيك يصيح
خيامك مايله وطرتهن الريح
طب الخيمتك مكسور الحسين
يجر عاموده بس هو اليطيح
يا عمي سامحني وتعال انه السبب انه
ياريتني ميته عطش وما گلت عطشانه
فدوه ... رد لبوي وعينه
فدوه ... الشيب حتى بعينه
فدوه ... انكسر على فراگك
فدوه ... وعلى الخطوه نعينه
عـمـااه عـمـااه
ـــــــــــــــــــــــــــــــــــــــ
ياعمي الخيم ضجن بالصياح
وابونه يصيح اخوي وصاحبي راح
ما طاحلنه نشرب منك الماي
كالو جودك وچف رحمتك طاح
حاچينه هم بيه امل ترجعلك چفوفك
ما عدنه بالخيمه گلب يتحمل يعوفك
وينك ... ما تجي تدللنه
وينك ... نبچي وتسكتنه
وينك ... كلشي جاي يكلك
وينك ... يا ستر عمتنه
عـمـااه عـمـااه
ــــــــــــــــــــــــــــــــــــــــ
يا تچوة ابونه وكسرة كفاه
وراك حسين ما واحد تچاه
لغربة كربله يراد خوان
الما عده اخو يسحگون فوگاه
چم شامت تحامه وحچه من طاحت الرايه
والي اجاك بشيبته رد سامع حچايه
حچايه ... من الشماته إتعله
حچايه ... طاح اخوك تگله
حچايه ... راد منك تحچي
حچايه ... وبيه ضهرت تعدله
عـمـااه عـمـااه
ـــــــــــــــــــــــــــــــــــــــــ
ساعه وخيلهم تلگاه عنوان
تطب لخيامنه بحافره نيشان
وتعله النار بيه ونطلع اركاض
وابونه اعله الترايب صدره ميدان
انه انولي وعمتي اعله تل تحشم اهاليها
ياخوتي اذا بيكم لحگو اعله سكينه
نركض ... والجمر بعبينه
نركض ... ياهو اليحس بينه
نركض ... وبضهرنه الغربه
نركض ... وغربه التلاگينه
عـمـااه عـمـااه