قصائد الشاعر محمد الجماسي اكثر من قصيدة مكتوبة
باب الحاجات
معروفه هالكلمات
لو كثرت الشدات
لا تطلب الحاجات
الا أمن اهلهه
ــــــــــــــــــــــــــــــــــــــ
ربك ابمنهاجه
ورحمته الوهاجه
ام ابو فاظل جعلهه
النه تگضي الحاجه
بالكرم موصوفه
وبالشدد معروفه
عدهه ابن اربع ائمه
قبلوله اچفوفه
واليروح الغـيرهه ايفشلونه
ماي وجه الوادم ايطيحونه
الحاجه يم ام الگمر مضمونه
لـّمن تدگ الباب
حلفـهه بالغياب
رأسن يجيك اجواب
آنه الاحلهه
ــــــــــــــــــــــــــــــــــــــ
الفـاتحه اقراهه
بالحسين انخاهه
گبل ماتختم الصوره
حاجتك تلگاهه
امجربه اووفايه
واخذ مني احچايه
والله تنطيك البشاره
لو عگدت الرايه
اچفوفنه الليله ازدحام ابابهه
حرمه بدويه وعظيمه انسابهه
طبع بيهه مـاترد احبابهه
معروفه بالوگفات
واتسهل الصعبات
گضايه للحاجات
ربك جعلهه
ــــــــــــــــــــــــــــــــــــــ
اشگد قصص مرويه
نستمع يوميه
الخلفه ماعنده ونخاهه
رزقته الذريّه
بأذن الله اترزقه
وبحياته اتوفقه
الأخرس اول كلمه هيه
بياحسين اتنطقه
مشّت اليمشي عله العكازه
روح واطلب منهه لو تتوازه
من كرمهه والله ماتتجازه
عدهه الرزق مبذول
واتشافي كل معلول
واتطيّب المشلول
بس يگصد الهه
ــــــــــــــــــــــــــــــــــــــ
تضحيات العدهه
هيه الاتخلدهه
الضحت بأربع كواكب
لازم انمجدهه
للحسين انطتهم
وبالظعن وصتهم
وزينب الاخت الچبيره
تنحسب شيختهم
بالوداع اتگله يا ياعباسي
كون اريدك يااعز كل ناسي
بالحشر يوليدي ترفع راسي
لتعوف اخوك احسين
ضحيله چف وعين
وكربله مخلوقين
احنه أمن اجلهه
ــــــــــــــــــــــــــــــــــــــ
دوم وي الزهره
كل عزاء اتحضره
ومن علامات الحضور
المجلس ايهب عطره
خا نرحب بيهه
نقره وانبچيهه
عله احسين اتحب لطمنه
الدمعه تفرح بيهه
لوتضيگ الدنيه بيك انخاهه
فاتحه البيبان الك تلگاهه
ماتقصر بالكرم حاشاهه
لا لا تظل حيران
حلفهه بالعطشان
تنطيك بالمجّان
طيب اصلهه
ام البنين (عليها السلام)
هذا يوم البي تلم احبابهه
والقضاء الحاجه تفتح بابهه
هذا يوم الاسمه توزيع الفخر
يختلف عن باقي ايام الدهر
من ضوه الشمعه لحد نور القمر
مستعده اتقدم الطَلّابهه
ــــــــــــــــــــــــــــــــــــــ
هذا يوم ام البنين المخلصه
العالي اسمهه بالنجوم ومانصه
للأمور الهامه متخصصه
وحاسبه الكل القضايه احسابهه
ــــــــــــــــــــــــــــــــــــــ
مجلس أم الضحت بأربع زلم
المجلس الروحاني والكلش مهم
بالكرم فايض بحر هذا الاسم
ذهب عندالله يناس اترابهه
ــــــــــــــــــــــــــــــــــــــ
جرب وانخه الوفيه الطاهره
فوراً اتحقق لك امنيتك تره
مو خرافه والكلام انسطره
أقره شتگول السيَر كتّابهه
ــــــــــــــــــــــــــــــــــــــ
طائعه ابدرب الامامه وصالحه
اوياهه تاجر بالتجاره الرابحه
بس مجرد لو قريت الفاتحه
اتيسر الشدّه وتحل اسبابهه
ــــــــــــــــــــــــــــــــــــــ
الحَبّت آل البيت طبعاً تعتلي
ومايموت الشايل بگلبه علي
اتصيح غير احسين بالدنيه شلي
والزمن طوّل سفر غيّابهه
ــــــــــــــــــــــــــــــــــــــ
بالحشر باچر يناس بكل يقين
فاطمه الزهره تجازي ام البنين
عن مدامعهه وألم ذيج السنين
جائزه اتقدملهه عن اتعابهه
ــــــــــــــــــــــــــــــــــــــ
واحنه من ام البنين الفاظله
انريد اسمنه بالشفاعه اتسجله
وكون ترزقنه زيارة كربله
بكل خميس انشم نسيم اطيابهه
محمد الجماسي
#اللهم_عجل_لوليك_الفرج
مولاتي العليلة روحي فداها
اجوني .. وانه گلتلهم هله
اجوني .. بس نقص بالقافله
اجوني .. ودرت وجهي الكربله
ــــــــــــــــــــــــــــــــــــــ
شفت بيهم صوره من كسر الخواطر
واشم بيهه ريحة ارماد وحوافر
چنهم اجنايز يدورون الـمگابر
موته بس عدلين يارب شنهو صاير
اهلنه .. شو مدامعهم تصب
اهلنه .. وابملامحهم غرب
اهلنه .. حمد وابلا بسمله
ــــــــــــــــــــــــــــــــــــــ
العلّه الابگلبي والابجسمي سويّه
اثنينهن لـمن اجو هـاجن عليه
آنه گلت ابشوفة اهلي أصبح جويه
ثاري اجوني وچملو ضيمي عليه
شفتهم .. بس شفت بيهم سبي
شفتهم .. والتراب اعله العبي
شفتهم .. ويامصاب اتخيله
ــــــــــــــــــــــــــــــــــــــ
ناذره ابچيتهم البس احلى الاثياب
وافرش اعيوني طريق اتدوسه الاحباب
ازغيره آنه وكبروني من الاغياب
وهسه اجوني بس اجوني بدمعه وامصاب
رقيه .. مالگيت الهه اثر
رقيه .. أظن ماتت عالنحر
رقيه .. ورده بس امسلسله
ــــــــــــــــــــــــــــــــــــــ
شفت بأول ناگه اخوي الـمثلي حاله
هم عليل وصاير أضعف من خياله
بي اثر موته ودفن مدري اشجراله
چنه واحد محّد أمن اهله بقاله
شبگته .. بس شبگته أمن المتن
شبگته .. وگلي آخ وظل يون
شبگته .. والـمدامع سايله
ــــــــــــــــــــــــــــــــــــــ
وشفت ثاني النوگ بيهه امريه تنعه
اسمعلهه اتنوح بس گلبي تگطعه
الهسه يمكن حافر اليسحگ تسمعه
وچفهه من السوط ماتگدر ترفعه
حنينه .. لاچن امضيعه زلم
حنينه .. وگامت بدمعي تشم
حنينه .. ابرايه خضره امشيله
ــــــــــــــــــــــــــــــــــــــ
مارجعلي الاكبر وبن عمي جاسم
ولا ابوي احسين لامن گمر هاشم
حتى عبدالله الطفل ماردلي سالم
يعني كل دنياي بس دمعه ومئاتم
عليله .. ومن بعد ذاكه الصبر
عليله .. ذابح احلامي الشمر
عليله .. وبيرغ أحزاني اعتله
محمد الجماسي
#اللهم_عجل_لوليك_الفرج
شكراً
شكراً ابكبر السمه
للحسين وفاطمه
خادم صرت واتسجّلت
للحسين وفاطمه
ــــــــــــــــــــــــــــــــــــــ
انتظر شهر المجالس ٠٠ كل سنه واحسب إله
هالشهر ضيف اعله روحي ٠٠ وبالدموع أستقبله
هله بالخدمه الاحبهه ٠٠ وبالذبح لا مو هله
هله بعبدالله وضحكته ٠٠ وألف لعنه لحرمله
ياهله إبشهر اللطم
سَوه للدنيه طعُم
وبكــل سنه عاشگ أنه
للحسين وفاطمه
ــــــــــــــــــــــــــــــــــــــ
ياهله بشهر الكرامه ٠٠ إو مو هله بطاري السحگ
آنه أريد الخيمه حضره ٠٠ مو تطيح وتحترگ
زينب اسمعهه تنادي ٠٠ صارن امتوني زرگ
الدنيه چذابه ابطبعهه ٠٠ وبس الاحسين الصدگ
وآنه جاهل بالمهد
باقـي ثابت عالعهد
حد الگبر لطم الصدر
للحسين وفاطمه
ــــــــــــــــــــــــــــــــــــــ
احسين افضاله چبيره .. وتارسه اعيوني ترس
احسين ساترني بعباته ٠٠ وهوه نايم بالشمس
ثوب الاحسين العقيده ٠٠ مو سواد وينلبس
احسين ياناس اعله مودي ٠٠ بالحوافر ينرفس
إشتراني إبمنحره
وصعداني الـمنبره
واقرايتي وكل خدمتي
للحسين وفاطمه
ــــــــــــــــــــــــــــــــــــــ
امنيتي اشوف احسين عايش ٠٠ مو اشوفه ابلا نحر
كل سنه وهاي المصيبه ٠٠ واسمع بهاي الصور
رمح الامثلث يشيعه ٠٠ واصل الحد الظهر
الحافر ايجر بقميصه ٠٠ وصدره بالخيل انكسر
وزينب اتصيح انتظر
لا تذبحه يالشمر
وآنه استمع وأجري الدمع
للحسين وفاطمه
ــــــــــــــــــــــــــــــــــــــ
والزغيروني خواته ٠٠ ايلاعبنه ويبتسم
ماشفت جاهل يشيعه ٠٠ رايح ابعركة زلم
إشودّه عبدالله المنيته ٠٠ هذا الابگد الحلم
والسهم ذابح رگبته ٠٠ واُمه بثيابه تشم
يادللول الولد
تعّب امتوني المهد
يالسافرت يبني إو رحت
للحسين وفاطمه
ــــــــــــــــــــــــــــــــــــــ
بهاي الاجواء العجيبه ٠٠ آنه ياعالم عشت
اوي الحسين امن الطفوله ٠٠ وهسه كلش شيّبت
شيِّبت راسي رقيه ٠٠ الماتت بحضن الطشت
ولو عفت هاي المجالس ٠٠ يعني إحسبوني مِتت
ما أريد المنقبه
أرجو حسن العاقبه
ناذر نذر كل العمر
للحسين وفاطمه
محمد الجماسي
#اللهم_عجل_لوليك_الفرج
ياحبيب الزهره وحبيبي
ــــــــــــــــــــــــــــــــــــــ
ماريد دنيه إبلا عشگ
يالحبك بگلبي يدگ
أنته ابوي وصاحبي الحلوه عشرته
أنته الحنين الـموصعب
ماكو مثل گلبك گلب
ممنوع احب غيرك لان حبيتك أنته
يمك واشتاگ ماريد افراگ مثل العشاگ ماخذني السهر
مابين قوسين مجنون احسين وادموع العين يم بابك نهر
ياحبيب الزهره وحبيبي
ــــــــــــــــــــــــــــــــــــــ
گلبي اقفلت بابه ابحذر
مفتاحه ذبّيته ابحر
اتبره من عنده اذا حب ثاني غيرك
كاتب عله اعيوني وقف
ماترسم الغيرك وصف
مالك حواسي الخمسه مجنونك اسيرك
خلّيني اوياك ماشي بمسراك واشلون انساك وانه اتنفسك
وانه من اصباي عبدك مولاي عمري ودنياي بس بمجلسك
ياحبيب الزهره وحبيبي
ــــــــــــــــــــــــــــــــــــــ
يحسين طفّك دنيتي
وگعدت ضريحك جنتي
الله يانسماتك الكلهن محنه
من اوگف اباب الصحن
حاجاتي كلهن ينگضن
يالعطر شباچك يغار الورد منه
سبحان الله گبرك علّاه ملجأ سوّاه للماله وطن
يمك عباس سيد الاحساس ايسمونه الناس كفّال الظعن
ياحبيب الزهره وحبيبي
محمد الجماسي
#اللهم_عجل_لوليك_الفرج
اباعبدالله اباعبدالله
يامالك اسنيني تسري بشراييني
ياقبلتي وديني وابگلبي تصويرك
متعلّق بحبك ثابت على دربك
رايد عطف گلبك ارزقني من خيرك
اباعبدالله اباعبدالله
ــــــــــــــــــــــــــــــــــــــ
من زغري حبيتك رابي بحسينيتك
محبوبي سميتك سيد على ايامي
خادم أنه ابابك اتنفس اترابك
وابچي عله امصابك يالمنذبح ضامي
اباعبدالله اباعبدالله
ــــــــــــــــــــــــــــــــــــــ
عمري تملكته دربك ولا عفته
اول سطر انته والباقي بالهامش
بكل مجلس اقرالك واذكر سبي اعيالك
يحسيني و بجالك عيشة ملك عايش
اباعبدالله اباعبدالله
ــــــــــــــــــــــــــــــــــــــ
ماعوفن الخدمه وبلساني بس كلمه
مجنون ابو اليمه كلهم يعرفوني
والدمعه الاجريهه للزهره انويهه
والخيمه اطفيهه من دمعة اعيوني
اباعبدالله اباعبدالله
ــــــــــــــــــــــــــــــــــــــ
يالداسك الحافر جسمك وذر صاير
واشچم رمح عابر من جبدك الظهرك
فوگ الرمل خدك وانته النبي جدك
بالطف تظل وحدك وماواحد اينصرك
اباعبدالله اباعبدالله
ــــــــــــــــــــــــــــــــــــــ
يا لچمة اجروحي يحسين أخذ روحي
يمك يمذبوحي بالحضره خليهه
واترسهه حنيه وامليهه قدسيهه
كلهه حسينيه ايامي سويهه
اباعبدالله اباعبدالله
ــــــــــــــــــــــــــــــــــــــ
اوياك التعب يسوه عمري الك فدوه
لو هوّه لو هوّه حبك فلا اعوفه
يالساكن أبالي وامزكّي اعمالي
بعيوني يالغالي غيرك ولا شوفه
اباعبدالله اباعبدالله
محمد الجماسي
#اللهم_عجل_لوليك_الفرج
سيدي ابا عبد الله
امن الشباچ اكلمك
كون بعيني اضمّك
وايغار أمن اشمّك
يحسين الهوه
ــــــــــــــــــــــــــــــــــــــ
چاليش احب اني السهر
غير أنته عايش بالنظر
خايف اذا جفني انطبگ
ألچم تفاصيل النحر
مو اله اطب ابحظرتك واجريهه دمعاتي
متغيب عني صورتك متكوّنه بذاتي
مثل الشمس تطلعلي من كل اتجاهاتي
ياشمس المنيره
اشوفك بالبصيره
بأنفـاسي الاخيره
أنته الـمحتوه
ــــــــــــــــــــــــــــــــــــــ
مأتم عزائك مأتمي
عالم غرامك عالمي
اعلنهه گدام البشر
إنّي الى الطف انتمي
ماريد دنيه إبلا بچي والمابچه امقصر
الغيم اليزاعلّه نهر يحسين مايمطر
وابچيلك آنه أمن الظلع مولاي للخنصر
بيك اعيوني ذابت
الدعواك استجابت
ولو شمس الله غابت
الگاك الضوه
ــــــــــــــــــــــــــــــــــــــ
چنت آنه ماعرف الصدگ
بس من ضگت مر السحگ
گمت ابثوابك سيدي
الطم لطم أهل العشگ
لمن سمعت ابمقتلك شيب اشتعل راسي
بس أنته ناسي الباقي لا اهلي ولا ناسي
من اذكر الخيمه تشب دخانه بأنفاسي
علمودك حبيبي
آهاتي ونحيبي
ياجرحي وطبيبي
يالذكرك دوه
ــــــــــــــــــــــــــــــــــــــ
الحمدُ لله خدمتي
صارت مناره بدنيتي
مادام اكون ابمجلسك
محد يلوث فطرتي
أنته شمس عمري التشع وانته ضوه احلامي
لو ماحنانك چا ضعت بذنوبي واوهامي
من مجلسك لزيارتك گاضيهن ايامي
امن امشي للزياره
اصفن عالمناره
واناجيك ابحراره
كون انظل سوه
ــــــــــــــــــــــــــــــــــــــ
لو موتي اجه البابي يدگ
ابوسط النعش من اختنگ
يمكن اشگ بيدي الچفن
واركض اشمّك ياعشگ
آنه ادري ربعي وكل هلي لـمّن يشيعوني
گبل النجف يابو علي يمّك يجيبوني
وانته والزهره فاطمه يحسين طمنوني
احسين اعطف عليه
مثل بنتك رقيه
بتابوت المنيه
لوعمري انطوه
محمد الجماسي
#اللهم_عجل_لوليك_الفرج
مُحّرمٌ جاء
مُحّرمٌ جاء واللهُ قد شاء
نُحيّي شعائر الحُسين
نّحيّي تراث العاشقين
ــــــــــــــــــــــــــــــــــــــ
الله اجتبانه ابرحمته شعليهه بينه الوادم
خالق ادينه للّطم رازقنه بالـمآتم
جبريل هز مهده وهتف ياايها العوالم
مَن مثلي وآنه أصبحت لابن الزجيه خادم
لَـمّا وَعيّناه حُزناًبكيناه
بالحُبٌ صٌرنا مؤمنين
نُحيّي تراث العاشقين
ــــــــــــــــــــــــــــــــــــــ
احسين الهوه النتنفسه موبس مجرد حضره
وهو السفينه الناجيه ابيوم العسر نعتبره
گال الرسول المصطفه ابيوم انولد للزهره
سيخلق الله لهُ شيعه تجدّد ذكره
لَهُ ينوحون عليهٌ يبكون
بُكائّنا حِصنٌ حَصين
نّحيّي تراث العاشقين
ــــــــــــــــــــــــــــــــــــــ
اخذو العشر تشهر سوه وانطوني بس هالشهرين
انطونه محرم أو صفر بيهن نعيش اوي احسين
مثل الرزق هوه الدمع واحنه صدگ مرزوقين
يشتغل رادار الگلب وايعاز ينطي للعين
فظل من الله نبكي حّسيناه
إنّا تَبٌعنا السابقين
نّحيّي تراث العاشقين
ــــــــــــــــــــــــــــــــــــــ
باول محرم من يهل عدنه تصير اقرايه
عاشور واندگ القطع والرايه يم الرايه
من بيت للثاني تظل تتنقل الـُملّايه
حتى الاطفال بهالشهر خيمتهم امعلايه
مواكبّ النور في شَهرِ عاشور
على الصُدور لاطمين
نُحيّي تراث العاشقين
ــــــــــــــــــــــــــــــــــــــ
اباب الحسينيه نشم ريحة حزن والدته
وام البنين الطاهره طول العمر خادمته
هذا الغريب العالهزل مسبيه راحت أخته
جوّه الحوافر جثته ويم العرش منزلته
ورأسهّ كان بالرمحِ قرآن
يراهّ قلبَ العارفين
نّحيّي تراث العاشقين
ــــــــــــــــــــــــــــــــــــــ
باچر نموت وهم تجي الأجيال وايذكرونه
واحنه اشكتبنه من نعي بعاشور هم يقرونه
تاريخنه ابكل الكتب اولادنه ايأرخونه
الخادم اليخدم من صدگ آل النبي ايحبونه
دينٌ ومٌنهاج كَهيبةِ التاج
يَرفعّ رأسَ الـمُخلصين
نّحيّي تراث العاشقين
محمد الجماسي
#اللهم_عجل_لوليك_الفرج