كلمات قصيدة بين الخيول سيد سلام الحسيني مكتوبه كامله
لطمية بين الخيول سيد سلام الحسيني
قصيدة : بين الخيول
الشاعر : احمد اللامي
الرادود : سيد سلام الحسيني
-----------
بين الخيول وانا ادورك وينك
گالولي فاتح عينك .. تتنطر وداع
الماي ماي شلون كاسر خاطرك
ومن العطش ما جابرك .. وجروحك وساع
شايفه نار برمل ماشايفه
خايفه تغمض واعوفك خايفه
چان صوتك توه عالي واطمئن عندك حياة
هسه خافت يوصل النه وگلت خاف ابن امي مات
بين الخيل زينب انا
ماظل حيل زينب انا
عشت الويل زينب انا
وين حسين ياكربله
غمض عين ياكربله
طايح وين ياكربله
◾️◾️◾️◾️◾️◾️◾️◾️
عفت المخيم واركضتلك حافيه
والخيل عدهن عافيه .. اغلبهن شلون
يدفعني وادفعهن واگومن باچيه
وانسيت اجيتك شاچيه .. وابچيلك عيون
مايله يحسين اجيتك مايله
عايله عندك بنات وعايله
من وصلتك راح حيلي صانع وسادة تراب
هذا مو نومك يغالي فراگ وتچمله عذاب
باخر روح واتاملك
بس جروح واتاملك
گلبي ينوح واتاملك
وين حسين ياكربله
غمض عين ياكربله
طايح وين ياكربله
◾️◾️◾️◾️◾️◾️◾️◾️
تدنيت يمك ردت تحچي حچايه
وما طاوعتني بهايه .. وما تحچي الجروح
حلفتك بامنه ولبنها الراضعة
شايفني وحدي طالعة .. لو تطلع الروح
گاعده يحسين يمك گاعده
رايده الخوه منك رايده
ايدي حدرك مررتها تنام بالرمله حرام
ماگدرت بحضني احطك ثگيل جسمك بالسهام
فوگ رماد وتحيرت
ماتنشال وتحيرت
جروحي ثگال وتحيرت
وين حسين ياكربله
غمض عين ياكربله
طايح وين ياكربله
◾️◾️◾️◾️◾️◾️◾️◾️
بحضني گوه وسيدته راسك
وبأخير انفاسك .. تحچيلي چلمات
عيالي امانه واشرتلي الغارة .. وبلا شرف غدارة .. تحرگلي خيمات
روحي لاطفالي لحگي روحي
جروحي لا ماتطيب جروحي
بين هالچلمة وغطاها انطفت كل السنين
انا اعوف حسين ميت وانطي وجهي لمدري وين
ابقى وياه مافارگه
اترجاه ما فارگه
حسين الجاه ما فارگه
وين حسين ياكربله
غمض عين ياكربله
طايح وين ياكربله
◾️◾️◾️◾️◾️◾️◾️◾️
راح امشي عنك من گلتلك رايحه
حسيت چني جارحة .. دلالي بيدي
انداريت عنك والدموع المالحه
بالگاع رخصت طايحه .. بطيحة عضيدي
راجعه للنار زينب راجعه
فاجعه اتانيها عگبك فاجعه
خويه ماگتلك ترى احنه تشردينه من الخيام
اطلعنه من عدها بعبينه وكلشي ماظل والسلام
وين نروح وي الغرب
ضعن جروح وي الغرب
نخفي النوح وي الغرب
وين حسين ياكربله
غمض عين ياكربله
طايح وين ياكربله