كلمات قصيدة اسمعني ارجوك مسلم الوائلي مكتوبه كامله
لطمية اسمعني ارجوك مسلم الوائلي
قصيدة: اسمعني ارجوك
أداء: مسلم الوائلي
كلمات: حمزة السماوي
~
بجيتني ...
من احجي وياك ودرت ظهرك
بجيتني ...
ما ردت عمرك ساعه من عمرك
امبينه تره ما راح ترجع
احضني بلكت روحي تطلع
بجيتني .. بجيتني
~~~
اعرفك ما تجيني
بوجهك عفت عيني
بكثر ما باوعتلك من اودعك
اعله گد حبي اخذني
واسمع مره مني
تضم السالفه شيضمه دمعك
مو هذا حسين
من دار العين .. وما طلع صوت
مستعجل ليش
بس ساعه انعيش .. وبعدين انموت
بالظلمه ...
ادري شتفكر من طلعت انته
بالظلمه ...
رايدني انام وتطلع بسكته
ما تدري انه بگلبي اسمع
احضني بلكت روحي تطلع
بجيتني .. بجيتني
~~~~
هدومي حضرتهن
بسكته صعدتهن
وين تروح امشي بويه خلفك
ردت اتگلي صعدي
تالي اتگلي ردي
ولا هديته هو الهدني جفك
اسمعني ارجوك
غير انت حسين .. مو سهله اتغيب
عليك الزهراء
اصبر يومين .. تانيني اطيب
حاجيني ...
يلما ترد الوادم الغربه
حاجيني ...
طيبني وامسح وجهي بالتربه
مو مال عني حسين تگطع
احضني بلكت روحي تطلع
بجيتني .. بجيتني
~
يساكت من احاجيك
اذا زعلان اراضيك
اندعيلي امشي يالواصل دعائه
اخذني شلون ما جان
اخذني خيط قرآن
اذكرك وين واصل بالقرائه
السبحه من اتراب
وانه من اتراب .. خلني بيمناك
خليني مصلاه
وشتگول يصير .. بس كون وياك
بخيامك ...
بويه اذا ما حاسب احسابي
بخيامك ...
بالبر انام اتغطه بثيابي
وما اريد ناگه امشي اسرع
احضني بلكت روحي تطلع
بجيتني .. بجيتني
~~
صدرك من حضنته
بي أثار شفته
ليش تعوف حضني تروح للخيل
خذت سيف وعفتني
عندك حرب يعني
ابوسك بالنحر دم يطلع ايسيل
ادري المكتوب
بس گلي شلون .. والعاشر نار
انت بصحراء
صاير أشلاء .. وانه بنص دار
وعيونك ...
لو انه يمك اركض لجسمك
وعيونك ...
ما اگوم إلا انذبح يمك
انه وخواتي بحرگه نفزع
احضني بلكت روحي تطلع
بجيتني .. بجيتني
~~~~
هظيمه يسمعوني
الوحيده الما سبوني
شنو فرقي اريدن وي خواتي
برمح انظر دمائك
بهزل ننصب عزائك
ويصيح الراس سكتن يا بناتي
للكوفه انروح
بيدينه احبال .. والكل أيتام
وبينه يشتمون
اطبول يدگون .. ومعيده الشام
امنيتي ...
ارجعلك من اليسر محنيه
امنيتي ...
محرومه من الأربعينيه
كل هالحجي وتگلي ترجع
احضني بلكت روحي تطلع
بجيتني .. بجيتني