كلمات قصيدة مو عليله الرادود باسم الكربلائي مكتوبة كاملة
مو عليلة
للشاعر : علي السقاي
-------------
رحمه بالتشتم هواك...انظر التركض وراك
مو عليله و بيه حيل...عالسفر أگدر معاك
***
يالنويت اعله الرحيل و آنا أركض لك و أنوح
من خذت كل الخوات بويه خاوتني الجروح
تدري مو سهل الوداع بعدك أبقه ابلايه روح
حسين ثاني لو يصير گلي وينه و خل أروح
يا هي عدها ابهالأنام...أبو معصوم و إمام
وينه ألاگي لك بديل...و انت واحد لا سواك
***
صحت بويه بعالي صوت لو عليلة اشلون أصيح
و آنا لو ما بيه حيل ما ركضت و جني ريح
كلشي ما بيه و تشوف لا يغرك من أطيح
عثرت جدمي العباة گمت بس جفي جريح
مو مهم جرحي اليسيل...فكر بجرح الدليل
الهذا لو يحصل ضماد...گلي شيضمد هذاك
***
حته أثبت بالدليل علتي و المرض طاب
خذني أخدم بين ايديك بويه و أمرك مستجاب
أحمل بجتفي الرضيع خلها ترتاح الرباب
لو يفز امن المنام أقره آيات الكتاب
أسهر ابليك هدوء...و آنا أجهز لك وضوء
و بصلاة الليل أگول...و أندعي و أطلب رضاك
***
أقسم بإسمي عليك و اليذكرك بالبتول
.لا تخليني بعذاب بويه و اغيابك يطول
خذني راح أتشافه بيك لو عليله اعلي تكول
الوردة لو ما تلگه ماي بيها شيسوي الذبول
شنهو أتنفس تريد...و الهوه خذته بعيد
دنيتي من هالنهار...ابعيني ظلمه ابلا ضواك
***
علم عندك خل يصير تره أول ما تغيب
علتي اترد من جديد تبدي أعراض النحيب
و الوضع يصبح خطير سكتتي و موتي قريب
تعرف العله و دواي و اللي ميعرفه الطبيب
اسم هالعله حنين...و الدوه اسمه حسين
شوگي ميجامل حياة...اشگد سهل عنده الهلاك
***
خاطرك أدري كسير لا أزيدك انكسار
شوف التحتم عليك إلك راجع هالقرار
أمري لله من تروح اشبيدي غير الإنتظار
و المدينة الجنة بيك أستغفر الله جنها نار
لون ما گبر الحبيب...بهالوطن يصبح غريب
ضيگت صدري السماء...و الأرض تبجي بخطاك
***
گلبي ما أدري شجاه ايگلي هذا آخر لقاء
بس يردد ست حروف وحده اسمها كربلاء
اعلينه لو ويانه هاي ليش احس كلها دماء
تذبح من أهلي رجال بالسبي تبعث نساء
احساسي أتمنه يخيب...ما كو مسبية و خضيب
عمتي اترد بوقار...عمي بيده ايرف لواك
***
اوداعة الله يالمشيت بعد ما أظنك تعود
الوعد أتوقع يصير بويه بجنان الخلود
يا هو يسبق بالممات تنحفر لجله اللحود
اليوصل أول للجنان يهدي للثاني ورود
عگب أحلامي و طيوف...تالي تجمعنه الحتوف
نلتقي و اهناك أگول...عالسفر أگدر معاك
***