كلمات قصيدة راح الولد سيد فاقد الموسوي مكتوبة كاملة
قصيدة راح الولد سيد فاقد الموسوي مكتوبة
راح الـولـد راح .. من بين اديه
ماي برمل طاح .. شـيـرده اليه
تعب العمر ضاع..
نام بحضن گـاع..
شـيـرده الـيـه؟
چنت مرتاحة بحياتي وبالسلف عندي ولد
من يگوم تگوم روحي وگلبي يگعد لو گعد
الگاع باگت تعب عمري وشوف العيون نفگد
الراح من عدها ولدها شعدها بالدنيا بعد
ريع گلبي تراب ضمه
دنيتي من بعده ظلمة
المات ابنها تموت امه ..وينك ييمة
عين وضوه العين .. ماتن سوية
اسأل عليه وين .. كل مغربية
رايـح بـلا وداع..
نام بحضن گاع..
شـيـرده الـيـه؟
من تمر زفة شباب تموت روحي من الحزن
الناس فرحانة بولدها وانه اگضّي الليل أون
الليل اخلصنّه بواچي وماطبگ لمك جفن
شيبت من وكت يمة ومو سهل فگد الابن
يالطولك بعيني شحلاته
ياهيبتي وهيبة خواته
بچيتني گبال الشماته ..آخ الشماته
موت الخذه الموت .. ماخذ شبابك
سكتة وبلا صوت .. ابچي لغيابك
والحلـو الاطبـاع..
نـام بحضن گـاع..
شـيـرده الـيـه؟
ياحلم عمري لذخرته لشيبتي وتالي العمر
سنينك الحلوات ذني يمة مو مالت گبر
تلثطعش عام وعفتني وبين بروحي الكبر
ياگلب صبرك تبده منين اجيبنلك صبر
ياگلب غالي وفارگيته
عريس والدم واهليته
وبزفته صارت منيته ..وميت لگيته
نام الولد نام .. نوم العوافي
گلبي بگبر نام .. مو انتَ غافي
حگي ابچي كلساع..
نـام بـحـضـن گـاع..
شـيـرده الـيـه؟
ــــــــــــــــــــــــــــــــــــــــــــــــــــ