كلمات قصيدة امنية ام البنين كون افتح عيوني الصبح محمد الفاطمي
قصيدة : امنية ام البنين
الرادود : محمد الفاطمي
الشاعر : محمد النواس
~
انا الغريبة بلا وطن
ولا عندي گبة ولا صحن
ولا زاير عيونة بجن.. يم ام البنين
لمن وفة عيون الأجل
مو صخرة جن حطو جبل
كلش ثكيلة وعندي امل.. اوصل للحسين
امنيتي طبت كربلا
ويم ولدة اخلص عمري
كل باب حاجة انة شعجب
ما عندي باب بگبري
المدينة وكل اهلهة وياي تقصير
الحمام يحط علية يبجي ويطير
حرام ان جان عيني ضاگت النوم
وعلي ما نايمة من حسين لليوم
~~~
انا بگبر ما بي ضوة
ولا ينجرع حتى الهوة
اخذوني فدوة لنينوه.. مشتاگة يا ناس
بالغربة صار هواي الي
المن اضل هنا شلي
ودوني يم ريحة هلي.. لوليدي عباس
مدفونة يم وادم غرب
لا يمي رفعوا راية
لا موكب گبالي نصب
لا جية للمشاية
ياهو يشيل گبري لليحبني
مشتاگة ارد اشمن ريحة ابني
غريبة ومن بعيد تزورني الناس
وربك ما گطع عوضني عباس
~
كون افتح عيوني الصبح
والگة الحسين بلا ذبح
ولا راسة فوك اعله الرمح.. امنيتي بس هاي
ترجع بسمته ليم هلة
وافتح ادية ثنين اله
ونسولف بلا كربلا.. ولا طاري للماي
وين الله يطلع هالحلم
كلة صدك وين الله
وطب رباب بلا دمع
وتحط بدية عبدالله
وگعد افتح گماطة الامس جان
واختم يم جمال عيونة قرآن
بس ما بيدي شي كلشي انتهى وصار
بگبر ضليت مبني تراب وحجار
~~~~
ليلي اشوفن بالگبر
شلون اجة الناعي بْشْر
بحسين عظمني الاجر.. وشسوة بية
تنعاد بعيوني الصور
ساعتهة من جاني الخبر
حتى الفضل ابن الگمر.. طاح من ادية
اتذكر سوالف بشر
لمن اجة يحاجينة
سولفلي من التل لحد
ما جمد دمي بعينة
يكلي الطف ركض بس نار
مچوية بضعن الصغار
حسين كربلا وانا بمدينة
رغم كل المسافة اسمع ونينة
~~~
وديني فَي لونك امس
كتلتني يوليدي الشمس
روحي گضت مو مثل امس.. يايمة ياحسين
ما ادري وادم يا طبع
يم گبري ما شالوا شمع
يومية افك ريجي بدمع.. واتحزم ونين
اتحسر انا على الضعن
لمن مشة وخذاهم
لو ما عليلتنة رحت
يوليدي هسة وياكم
انا تمنيت موتي بكربلا هناك
منارة بصف منارة اتكابل وياك
ما شفتك يا يمة صارلي هواي
منهد ما حملتلك بالضعن ماي