كلمات قصيدة يا يوم اشوف اعتابك باسم الكربلائي مكتوبة كاملة
قصيدة : يا يوم اشوف اعتابك
للشاعر : جابر الكاظمي
***
يايوم اشوف اعتابك
واوقف حزين ببابك
وارجع ازورك يا حيدر .. وارجع ازورك
طوّل علية غيابك
مشتاق اشم ترابك
وارجع ازورك يا حيدر .. وارجع ازورك
آنة الهويتك لا تظن نسيتك
🍂🍂🍂🍂🍂
علي وهذا الاسم يسري بشرايين
نبع يالماتمل شوقك رياحيني
عتب وياك عندي يراوح بعيني
يمن فرقاك كدر صفوة سنيني
اريد احجي بصراحة وياك خليني
اخاف مقدرات اجو تنسيني
يابا الحسن ماتدري
صرت اشتريها بعمري
شوفة ضريحك ياحيدر شوفة ضريحك
من الفرقة نافذ صبري
وضلت تعيش بفكري
شوفت ضريحك ياحيدر شوفت ضريحك
بروحي اشتريتك لا تظن نسيتك
🍂🍂🍂🍂🍂
عشت اعوام يـمك يا ربيع الحي
ماعوفك جنت مثل الجرف والمي
لو صرت بهجير اقصد الك يا في
ولو ليلي الوكت دلهم اشوفك ضي
غصب من جنتك طلعوني اهل الغي
وخلوني اظل لا ميت ولا حي
من جنتك حرموني
برجوة امل خلوني
كل فكري يمك ياحيدر كل فكري يمك
عنك غصب بعدوني
امشي وادير عيوني
كل فكري يمك يا حيدر كل فكري يمك
عشت بثنيتك لا تظن نسيتك
🍂🍂🍂🍂🍂
مو بيدي غصب عفتك يابو الحسنين
وعنك رحت اتلفت وادير العين
كلت هل الفركة بالميت شهر شهرين
طالت يا علي لا سنة ولا سنتين
اناشد عالصبر ما ادري دربة منين
خذن ثلثين حيلي مخلفات البين
دنيانة نفرت عني
وحتى الصبر مل مني
مشتاق اشوفك ياحيدر مشتاق اشوفك
اغفى بوسادة ظني
واصحى على دمعي ووني
مشتاق اشوفك ياحيدر مشتاق اشوفك
ياما نخيتك لا تظن نسيتك
🍂🍂🍂🍂🍂
البعد شيبني يامن فرقتك كلفه
جرح شوقي غميج وما وقف نزفه
ليالي الضيم باكت بسمة الشفة
وسنيني انكضت بالحسرة واللهفه
لجن بعدة الامل بالروح مايخفه
وحس روحي بعد هلهل وكت ترفه
من عيني ينزف موحي
وانا بترافة روحي
ارسم خيالك ياحيدر ارسم خيالك
هالحبر دم جروحي
وصرت بصحيفة نوحي
ارسم خيالك ياحيدر ارسم خيالك
بروحي لقيتك لا تظن نسيتك
🍂🍂🍂🍂🍂
بـخيالك عايش من سنين واتـحسر
ولا ادري مصيري شلون ياحيدر
صرت ما اشعر بطعم البرد والحر
واذا نسمة هوة تزاحمني اتكدر
جمر ضيمي بصميم حشاي يتوجر
وبعيني غدة عبراتي تتكسر
ماعندي غفوة بنومي
ولاصحوه تجلي همومي
حيرني بعدك ياحيدر حيرني بعدك
مامش سعد بنجومي
ولافرحه تسعد يومي
حيرني بعدك ياحيدر حيرني بعدك
ترحمني ريتك لا تظن نسيتك
🍂🍂🍂🍂🍂
ياوهجة عشق ناغت خلايا الدم
خلافك عمري ذروة وضايعه بمنجم
بغيرك شمل روحي ما بعد يلتم
يابو الحسنين انت الجرح والبلسم
يايوم اوصلك واكشف سحاب الهم
وانفض يـم ضريـحك كل غبار الهم
يايوم اصل يـم قبرك
وانصب مناحة بكترك
وابجي لمصابك ياحيدر وابجي لمصابك
يالماصفالك دهرك
اذكر مرارة صبرك
وابجي لمصابك ياحيدر وابـجي لمصابك
واذكر رزيتك لاتظن نسيتك
🍂🍂🍂🍂🍂
اتـمنى مثل هل اليوم جنت هناك
واجدد يم ضريحك هل العهد وياك
وانصب مأتم على مصابك وانعاك
وون ون الثكالة لفكدك و فركك
لجن ما نسيتك عايش بذكراك
ضميري من البعد يابة الحسن ناداك
بين الدمع والحسرة
اذرك لهيب الطبرة
يصعب مغيبك ياحيدر يصعب مغيبك
من عيني تجري العبرة
وبين الجوانح جمرة
يصعب مغيبك ياحيدر يصعب مغيبك
بالهم بجيتك لا تظن نسيتك
🍂🍂🍂🍂🍂