كلمات قصيدة تميل الكاع سيد فاقد الموسوي مكتوبة كاملة
هاي الكاع تتراجف بأهاليها
حيدر طاب نيزك حول عليها
الخيل اسروجها التفت برجليها
تركض خيل بس فرسان مابيها
الناس تصيح على الناس
حيدر طب لو عباس
وعزرائيل حضر ليها دفترها
تميل الكاع خلاها بعساكرها
***
شد وشهاب ترجم بالوغى علومه
اصفوف الكوم جانها بيوت مهجومه
حيدر من يطب تتراكض الحومه
ثاري الجيش شارد ذاب هدومه
اليشرد من الكرار
يتلاكه بذو الفقار
سيوف اثنين والخياله طشرها
تميل الكاع خلاها بعساكرها
***
مطشرين خوف وترسوا البيده
ما يدرون ما يخطى الصكر صيده
العدها طبول ما تدري الحرب عيده
صم تراب طشرها الزلم بيده
سيفه مأشر اثنين
بيه عباس وحسين
حسين يصول والعباس يخزرها
تميل الكاع خلاها بعساكرها
***
غار ودار طوك المعركه ارحاها
وعزرائيل ظل يحوم فوكاها
اجيوش مرتبه وخربط سراياها
هاشم هاي لا تتكابل وياها
ذوله الساده الشجعان
ما يطون الميدان
الشلعوا باب والشلعوا كناطرها
تميل الكاع خلاها بعساكرها
***
طشوا روسها وتاه العدد شوفه
وادم صاحيه اموتتهم الخوفه
او وادم شارده ووجوه مخطوفه
كضوا كربله وشمروها على الكوفه
طكة سيف ابو حسين
تسبك رمشة العين
روس الخيل نزلت يم حوافرها
تميل الكاع خلاها بعساكرها