قصائد مكتوبة كاملة لأئمة البقيع عليهم السلام
مو احنه اللي نسكت
مو احنه اللي نسكت .. وحق عدنه انغصب
عـدنــه اقـبــور ائـمـه .. مـا بـيـهن قُـبـــب
مـانـهـدى الا نـنـضـر .. مـبـنـيـه بــذهـــب
نبنـيها .. ونـرد نحييها .. ونهوس بيها
وبالغيره نهد
حگ عدنه .. ونرجع حگنه .. لغينه الهدنه
غصباً عل يضد
لازم تــرد اربـــع قُــبـــــاب
نبني اضرحه انزيح التراب
وندخل دخولية وعزاء
ونكسر قيود الاغتراب
هذا حگنه ومايضيع
يالثارات البقيع
........................
كافي لحدها وصلت .. مانسكت بعد
هــالمره حجـــينه .. ونــطينه وعد
واحــــدنه تحزم .. وبـــالدنيه زهد
اتحزمنه .. بسم قائدنه ..علي والدنه
و انعم من ابو
ويانه ..التشد مگفانه .. ام گمر عدنانه
مولاتي وكفو
انداعي نضل لا ما نهيد
وضل اسعى سعيك يايزيد
صرختنه يا ثار البقيع
بسم ام گمر هاشم نعيد
هذا حگنه ومايضيع
يالثارات البقيع
..................
مو صعبه القضيه .. بس شغلة زمن
وتشوف المواكب .. يم باب الحسن
ونعلن عدنه باجر .. مجلس بالصحن
غايتنه ..نصر سادتنه .. وندگ رايتنه
يم باب الصحن
ملتمه .. الخدم متحزمه .. وابو هالنعمه
مولانه الحسن
حڰ عدنه ابد لا مايضيع
خلو الخبر هذا يذيع
االشيعه باكملها تگول
ماننسه ثارات البقيع
هذا حگنه ومايضيع
يالثارات البقيع
....................
جمره وبينه شبت .. شيطفي الجمر
للسجاد امامي .. هم بينه اشكثر
بغربه گضه عمره .. وغربه بالگبر
ياويلي .. بنهاري وليلي .. اليهدم حيلي
امن اذكر غربته
بالخيمه .. وحجاها بضيمه .. ركض للهيمه
طلعت عمته
بينه الجرح كلش جبير
الگلبك يمن گلبك كسير
هم مسبي هم مالك ضريح
وتالي الوكت گبرك هجير
هذا حگنه ومايضيع
يالثارات البقيع
...............
للباقر دمعتي .. بمظلوميته احس
العاش الغاضريه .. وجويات الشمس
وگبره من تهدم .. بجفوف الرجس
بونيني .. اگضي سنيني .. واهل من عيني
دمعي الدمعته
ياوسفه .. الحبال بجفه .. ونذل يتشفه
وهو بحسرته
اااخ السبي شمسوي بي
و ذاك الحبل ماكل ادي
مافضت الغربه واجوو
هدمو سگف گبره علي
هذا حگنه ومايضيع
يالثارات البقيع
...................
بسم الله دعينه .. وصوت الحگ هتف
يابو الكاظم اشهد .. مابينه الرجف
يالصادق اجينه .. ومالينه الشغف
نادينه .. بسم والينه .. الشجاعه البينه
امن الصادق اجت
نوفيله .. وعهد منطيله .. گبر نبليله
مو جلمة انحجت
بسم الزجيه نستعين
وللصادق انسولف حنين
رايه عله گبتك نحط
ومكتوب بيها ياحُسين
ابو حميدة الشويلي
لازم نوگـــــــف ونخط عالرايه
نبني البقيع ونطيهــــا آحچايه
أم عباس أنعليها°°والزهره تفرح بيها
ونتعنه كل عـــــام أحنه مشايه
•••
هـاي ثوره وخــلي عندك مبدئك شايل رسائل•
وزامط بحگك وطـالب يوگف أوياك أبوفاضل•
لا..تمل حتى الله يرضه عنك وبالـــــك تماطل•
خلي أعلـــه بالك لاترد…
وبحچاية الحگ تنعگد…
روحك وميجيسك برد…
ومطلبك تحصيل حاصل•
ورتل باللحـگ وحفظها الآيه
نبني البقيع ونطيها آحچايه
أم عباس أنعليها°°والزهره تفرح بيها
ونتعنه كل عام أحنه مشايه
•••
طلع الروحك مواقف خـاف توگف غادي باچــر•
البقيــع أتريد وگفــه واليطـــالب بيهـــــــــا ثائر•
بصوتك الشارب قصائد هاي وحده آمن الشعائر•
خلــــــــي المنابر تنتفض…
وبالغرقـد اتصلي الفرض…
چن ماي گصه وينحفض…
وسلح أحساسك أبشاعر
وشدأحــزامك وكتب حمايه
نبني البقيـع ونطيها آحچايه
أم عباس أنعليها°°والزهره تفرح بيها
ونتعنه كل عام أحنه مشايه
•••
وهالمثل معروف عدنه الهل المثل خليك كاتب•
مايضيع الحگ نعرفه لأن بالحــگ اكـو أيطالب•
بالحـــــــرب نصرك أكتبه ولازم أتذل النواصب•
إگبور عــــــــــدنه أمـهدمه…
موزحمه من حـامي الحمه…
لاوين تبقـــــــــى المضلمه…
احجاره ياگبر الحبايب•
وحرگ دمـــك وبينها الغايه
نبني البقيع ونطيها احچايه
أم عباس أنعليها°°والزهره تفرح بيها
ونتعنه كل عام أحنه مشايه
•••
ويبقى مــطـلبنا البقيـــع ولازم أنشيـــد گببهـــا•
وللمراقد ننطي كلشي ونسحـــــگ السدو دربها•
ولازم أنخلي احنه حـــد ولازم اتكف كل حربها•
هاي الرساله آمن الشعب…
تهــــديد مــوشغلة عتب…
لازم نرد حــــگنه أنسلب…
السلبته أسعود وشعبهــــا•
ودمنه ننـذره وأنـذره الهايه
نبني البقيع ونطيها آحچايه
أم عباس أنعليها°°والزهره تفرح بيها
ونتعنه كل عام أحنه مشايه
•••
وراح أسئل لليشكك وانه أرايد أجــواب منه•
منهو يقبل گبر أبو أمــــــــــهدم وممنوع عنه•
وكبره بس صخره يشوفه والشمر يمه يتدنه•
رايد جــواب ومو ممل…
مــــا سائله ليش القتل…
ياوسفه عالحگ ينهمل…
والزمان ألنه ولهلنه•
وللموت باچـر نعتني أعنايه
نبني البقيع ونطيها آحچايه
وأم عباس أنعليها°°والزهره تفرح بيها
ونتعنه كل عام أحنه مشايه
•••
زحمه من صاحب الغيبه شلون باچر من نشوفه•
عله هل التقصير يعرگ كل خجل هـوه وحروفه•
نگله خفنه آمــن النواصب والحقد جرد اسيوفه•
خلونه نشحنهه الهمم
وندز رسايلنــه بسهم
نبنيها غصبن عالهدم
والشيعه مايبرد وعدها
•••
أبوحسين السرگودي
نعي
شكوى للأمام المهدي (عج)
ذكرى تهديم قبور البقيع
يـمـتـه ابــن الـحـسـن يـظـهــر عـلامـه
وتشوفه الـعيـن بـيـده ايـجـر حـسامـه
ويـشـيّـد اگـبـور اهـل بـيتـه وعـمـامـه
وعـن وجـه الـحـقــد يـكـشــف لـثـامـه
*------------------*
راعـي الـثـار بـيـده ايـحـل قـضـيـتـه
طــال الـثــار حــيــل ومــا خــذيـتــه
يـبـن حـيــدر عـلـي أوارث حـمـيـتــه
هــدم اگــبــورهــم خـو مـا نـسـيـتــه
*-------------------*
نـتـانـي الـيـوم كـلـنـه الـبـي تـجـيـنـه
يــرف ألـواك يــمـتــه وتـحـدي بـيـنـه
مــن طـف كــربـلــه الأرض الـمـديـنـه
مـشــي نـگـصــد يـبـو صـالـح ولـيـنـه
*-------------------*
✍خـادم اهل البيت ع
الشاعر رعد الجريخي
شبه ما بين ناريـــن...البقيع وطف الحسين
رسول الله يوصي بطيبة الجار
...................................................
شبه بين أرض البقيع ومذبــح الطف
بكل شبر يا ناس ألي مدفون مصحف
ألدمعة ما تشفي غليلي ولا هي تنشف
حيرة من أجبـــــــل عليهم وين أوكف
كلهم ريحة حسين...وأمي وكرة العين
الحسن عودي ومضيفه بلابا زوار
....................................................
رحت أمشي الكربله ودم دمعي هامل
زحمة من عباس أمشي بـــــلايا كافل
من على التلة أصيحن يا بــــو فاضل
خويه من الشام أجيت وطولـــي مايل
عباس أمشي وياي...لخونه حسين تجاي
نروح أرض البقيع الليه محتار
..............................................
من وصلنه أرض البقيع وشفنه الكبور
لا مناير لا صحن لا وادم أتــزور
واحد الواحد كعدنه شمعة وأبخــور
والدمع بعيوني يرسم عشرة عاشور
يا ناس ألتفت وين...عرش الله وقرآئين
مهجورة وعليها كل ألانضار
...................................................
أربعة أكبور ألأحبه وعندي أربع
أخوه من أم البنين وبيهم ألمع
أتذبحوا من كبل لا للشام أطلع
وأربعة ماتوا بجي من بيه تسمع
لو سم لو ذبح جان...زينب آنه عنوان
حزنهم جان للطف ليل وانهار
.....................................................
يم كبر أمي كعدنه كعدة أحباب
شفت كسر الضلع بعده الهسه ما طاب
بهيده جن أسمع ييمه حـركة الباب
أهون أمن أكبور ولدي الصارت أتراب
ضلوا بس نياشين...حتى وهمه ميتين
وحشة أكبورهم والشاهد أحجار
................................................
خادم خدمة الحسين
الشاعر
محمد الموالي
قصيدة عاشر البقيع
عاشــر هدم الگبـــور نــار بگلبك تفـــور
ابد مــا تبــــرد النــار يمته مــوعد الثــار
يغــايــــب
*
يـــا أبـــو صالــــــح
گلبــك الله يساعـــده
جـرحه محّــد ضمــده
اهـلـك أبيــن العــده
ضحــايـــا
يـــا أبـــو صالــــــح
الحقــد ذاك الأولـي
بعده ضد حيدر علي
شوكت همك ينجلي
النهــايــــه
يـــا أبـــو صالــــــح
بعــده طفك مــا گضه
من الجديد من المضه
يجــري دم الرافضــه
منـــايــــا
جيل يـورثه لجـيل دمنـه ودمكم يسيل
عندك ندري الإخبار يمته موعد الثـــار
*
أرد أســـألـــك
عن جرح ينزف تعـــب
شلـون تنظــر بالعجب
للبقيــــع ابـــلا گبــب
تشـوّفــــه
أرد أســـألـــك
يا جــرح ينزف دمـه
ضلــع أمـــك فاطمـه
الصدره خيل تهشمه
وتعــوّفـــه
أرد أســـألـــك
جـرح عمتك ما شفه
بالحِبّـــال مچتفــه
من وگع راعي الوفه
وچفــوفـــه
ينـزف گلبك أجروح بكل طف انته مذبوح
وخيـل أعليك تندار يمّـته موعـد الثار
*
يــدمي گلبــــك
من تصد گبـر الحسـن
ابـلا منايـــر لا صحن
ادري بعيونــك حچـن
مشــاعـــر
يــدمي گلبــــك
للبــقيـــع وللجــــره
لبنيِ الزهره الطاهره
أبــلا بنـاء المگبــره
ومنــايـــر
يــدمي گلبــــك
وجفنك يهــل مدمعه
مــن تصد للفاجعــه
شحــــال أم الاربعـه
البــواتـــر
أتصد أبجفن همّال مراقد عتــرة الإل
الهــم بقـــت اثــــأر يمته مــوعد الثــار
*
لـــو زرتهـم
بــالبقيــع وتــربتــه
نار تسعــر حسرتــه
تطفه ما اظن جمرته
مسعــره
لـــو زرتهـم
والمدامــع سايلـــه
ادري تذكــر حرمله
والجره ابطف كربله
تـــذكــره
لـــو زرتهـم
ترسم أبعينك صّــور
صدر فوگه شچم اثر
وسيف يگطع چم نحر
تنـظــره
تذكر ذيچ الأنحور وخيول أعلى النسه أتدور
تشاهد ذيچ الإخطار يمتــه مــوعد الثــار
*
فــي ظهــورك
تبني ذيـــچ الاضرحه
سرهم انته أتوضحه
والمعــانــد تفضــحه
بحســامــك
فــي ظهــورك
رايــة الحــق تعتلــي
ونسمع بأسم الولي
من البقيع انه وهلي
أبنظــامـــك
فــي ظهــورك
مشي تگصد هل الملا
للبقيــع و كـــربلــه
والخــدّم متــواصلـــه
بغــرامـــك
بس أأمرها وتشوف بيدك تصبــح أسيوف
غيــره وعزه وإصـرار يمته موعــد الثــــار
*
الشاعر
موسى البديري
فاجعة هدم قبور أئمة البقيع ع
………………
ما كـفاهـم لا رضـيع
لاجسد عاري وصريع
بحقد ال سعود رجعو
هِـدمو گـبور الـبقيع
.........................
الـجُبن يكره شـجاعـه و العهر يكره شـرف
طبعا ابن الذات رايه يضوج من شيخ السلف
هـند امكم و احنا امنه بيها دين الله انعرف
بحر بيه خسه و عداوه لولد فاطم مانشف
يسلّم يـزيد الابن تيـميه رايـه
يگله من گبورهم لتضل بقايه
هـدمو الهـم كـل گبر
حـتى مـا يبـقه ذكـر
حكم من سفيان صادر
على كـل هاشم جميع
هـدمو گـبور الـبقيع
……………
گـبه جانت لابو مـحمد ع السمه توزع كرم
و للـعليل اطـول مـناره تنـطـق بـكلمه نـعم
وصحن بأسم الباقر اسمه وبيه للصادق حرم
نفس چف الحرگ خيمه رجـع للـحضره هدم
عل البقيع وهجمو بخيل اعوجيه
داسـت اعل گـبور اولاد الـزجـيه
خـيل ابن هـند اركـبي
سـحـگي اولاد الـنبي
بغضن بـحيدر ابوهـم
سور دين الله المنيع
هدمو گـبور الـبقيع
……… ..
شـوفة گـبور الايـمه جـروح خـلت بالـگلب
ظـلمه و ابين الاعـادي انـدفنو بـديره غـرب
وسفه هيج گبور اهلنا حجاره نامت ع الترب
مـوش مـاي دمـوم لازم عـينه عـليهـم تصب
الحسن عزّب گاعـها وي السماوات
مالگه من الدنيا بس ذني الترابات
مـنه مـخلوقـه الارض
و السمه طـول بـعرض
شلون هيج يصير گبره
منظره دامـي و فجيع
هـدمـو گـبور الـبقيـع
…………
گالو اعل القبر بدعه شرك يا حاج و كفر
فقط مو بدعه الزياره لگبر ابوبكر وعمر
راح اسمعنك دليلي و بكتاب الله انذكر
على أهـل الكـهف گـالو ابنو عليهم كبر
هالتناقض عدكم و أصله السقيفه
من دعت بالارث زهرتنا الشـريفه
گلتو مالچ عدنه حك
بگـتو من عـدها فـدك
وهي مرضاة الله هي
وبالغضب الها سـريع
هدمـو گـبور الـبقيع
...................
ان شاءالله بأيدك يمهدي توصل الگبه السمه
زحـوف نزحـف للـمديـنه للـبقـيع انعـظمـه
و.ننصب اهناك المـواكب و بصدور اللاطمه
و الاهم تاخـذنه كلنه لـگبـر امـك فـاطمه
يگول ذاك الگبر و يأشر بصبعه
گبر بيه بسمار ظل نابت بضلعه
نطـالب و نفـزع فـزع
بـثار مـحسـن والضلع
نسحك بروس الاعادي
ثار فاطم ما يضيع
هـدمو گـبور الـبقيع
…………… ..
✍️ ( سيد خضر الزاملي )
أحنه الخدم
احنه الخدم •• نقسم قسم
برض النبي •• نرفع علم
چم موكب الشيّدناه •• نبني البقيع ابـ ساعه
………………
احنه الملينه العالم اعزوبيه
ارض العراق وللكرم مضويه
وبكل متر تطلعلك حسينيه
ابراحة عشگ موش ابتعب مبنيه
نوصل غداً •• يم الحسن
ازنود السمر •• تبني الصحن
وين ابن تيميه انصيح •• وين الاقزام اتباعه
…………………
عونة بناء و للبقيع انهاجر
ركضة طوريج بعزاء العاشر
اهل المواكب بالخدامه انفاخر
نبنيها ما نصبر تظل الباجر
عيب وفشل •• طال الامل
ابطبگة جفن •• ننهي العمل
انصيح احنه ولد الزهراء •• ضنوة علي واشياعه
…………
دمعة عشك تجري الاساس اتحفره
كل خادم ويشلع گلب من صدره
انجمعن و بيهن بناء انعمره
الحايط يظل ينبض ابحب الزهره
انصيغ الرگب •• فضه و ذهب
أگلادة عشگ •• لربع گبب
انمد الخدم زوليات •• انصير احنه فرشه الگاعه
………………
مثل الثريه انطب عليهم نرعد
جوگات ( ياثار البقيع ) انردد
شلة سعود امن المواكب تشرد
نلطم و جوانه البقيع ايورّد
صوته ايعلي •• انتم هلي
ميت هله •• ابشيعه علي
يااهل يثرب ما مات •• حسين وهذوله اسباعه
………………
وبكربلا ماي الحسين انقدمه
وهناك كهوه بحب كريم اليمه
وادعيه انوزع من عليل الامه
عالوادم الباقر نثوّب علمه
مثل البرق •• نلمع خُلق
جعفر رسم •• بينه الصدق
بالفعل مو بالكلمات •• جعفر نشيل اطباعه
………………
ام البنين و يمها ننصب منبر
ننعه اعل ابنها حسين جسمه توذر
بسحگ الحوافر عالتراب اطشّر
وزينب تشاگف من سياط العسكر
يم الوفه •• ابنج صفه
ابلا ناظره •• ومايه انچفه
وحضّروا لسكينه احبال •• من اگطعوها اذراعه
…………………
✍️ ( سيد خضر الزاملي )
وهمان وماعندك فكره
من هدّمت اكبور العتره
افتح بيدك گلب الشيعي
تلكه اربع بيبان وحضره
………………………
جدك امس كاسر ضلع . عالسيده ايوج ناره
بحسابه ينهي ام الحسن . يقصي الامير ابداره
صح ذبح محسن بس صبح . بيرغ نصر بسماره
ذوله الله رافعهم گمر . يخسه اليطفي انواره
جدك وينه الـ بالدم حاكم
مات وبس ما ماتت فاطم
اسأل هاي الشمس التضوي
اتگلك انا ابنيت الزهره
………………………
الحسن مو قصة گبر . الحسن عالم ثاني
بحروفه تضحك دنيتي . تطرد جميع احزاني
اصبي عيني خافن ينحسد.وعليه طبگت اجفاني
راسمله بخيالي الكبر . وعليه درت ذرعاني
صوت و بأسم الحب يتجدد
فدوه لاسمك يا ابو محمد
للقبله امن اوكف يوميه
اشتم كهوه اتهب من گبره
……………………
گومك اهل سوط وسبي . گوم اعوجيه و حافر
لاچن حجتها ام الخدر . المن الفوز اباجر
زين العباد ومرقده . ابكل الضماير حاضر
والگلب نصين انجسم . نص جعفر ونص باقر
وشريان الدم بيهم ناطق
يحيا الباقر يحيا الصادق
يحيا الخله الشام اتخورس
كال انا ابن الحزوا نحره
………………
هذا الفعل يعني الضعف . مهزوز خايف منهم
نهر ويغرّگ كل ظلم . والناس تشرب ميهم
ميتين بس ترجف زلم . لمن يمر طاريهم
وكبورهم طرة شمس .زمرة هند فضحتهم
حمره امك رفت رايتها
وامي من الجنه اعبايتها
انت ابن الذباها اهدومه
وانا ابن الماداير ظهره
………………
مشكلتك اتحس ابنقص . ما دگلك احد ثايه
ما نازل ابربعك خبر . لا حجت عنهم ايه
لا مرجع ولا مجتهد . عندك تسير ابرايه
بيد اليلطمن موقفك .تروح وتجي بحجايه
الله يزيده الجابه الأيده
عاف حسين وحب ايزيده
تندم و اتعض اصبع باجر
من اتشوف النار الكبره
…………………..
باجر نهد هدة اسد . باجر نجيكم فزعه
جيش و يقوده المنتظر .سيف الفقار ايرفعه
وين ابن تيميه القذر . وين ابن باز و ربعه
تشردون وتظل العگل . حفاي كلها امفرعه
جيبو العايل والمتعدي
يركع حدر اجدام المهدي
صفره ولا من دم بيها
تغدي وجوه اسعود القذره
……………………
✍️ ( سيد خضر الزاملي )
تنـتـظر طلـعـتك .. ارض البقـيـع بأمـل
من تـرف رايتـك .. تنـبـني گـبور الأهل
گبور من الترايب .. تنـتظرك يغايب .. يامهدي
………………………
ارض البقيع الطلعـتك
متلـهفه حيل الجيتك
وانته املها
اسنين صارت تنتظر
تبنيها من فجرك يطر
وترجع لاصلها
ترد ذيج الگبب يالمهدي تبنيها .. وتعـلي المناره
ومن كل الارض هالناس تلفيها .. وتأدي الزياره
تعـتنيها البشر .. تقره مجالس حزن
سيدي والگلب .. ينعه المصيبه ويون
ينعها المصايب .. تنـتظرك يغايب .. يامهدي
………………………
مهدومه تبقه اليازمن
ماكو على كبر الحسن
يالمهدي گـبه
السجــاد مـهـدوم الگـبر
يالمهدي ترضه لهل عصر
يم گبره غربه
والباقر لهسه مهدمه گبته .. يالمهدي مصيبه
والصادق بقت من گبره تربته .. يامحنه العجيبه
سيدي بياذنب .. گـبور الاهل تنهدم
وتنبني ياوكت .. عشنه يمهدي بحلم
ظلت بس تعاتب .. تنـتظرك يغايب .. يامهدي
………………………
وگبر الوفيه الطاهره
ام البنين الصابره
هم هدموها
للغالي ضحت اربعه
وشرفها ربها باربعه
من جاوروها
هاي ام البنين الطاهره الحره .. الضحت للحسين
يمهدي القدمت قربان للزهره .. ولدها قرت العين
وضلت ابـلا گـبـر .. ياغـربـة ام الگـمر
سيدي ومن بعـُـد .. تقره الزياره البشر
هاي ام الاطايب .. تنـتظرك يغايب .. يامهدي
………………………
بگلبك يمهدي شچم جرح
للسم گضه والمنذبح
الله اليعينك
النوب ردو عالگبر
لوينهدم لو ينفجر
وتشوفه عينك
جدامك شفت مهدومه كل دارك .. وسامره دوت نار
چـا يمـته تسـل يالمهدي فقـارك .. يمـته تاخـذ الثار
دارك من انفجر .. ينمحي رادو اثـر
ظنو بهل فعل .. يخوفونه يالمنتظر
من تطلع تحاسب .. تنـتظرك يغايب .. يامهدي
………………………
اظهر يمهدي للمله
الثار تصرخ كربله
سل ذو الفقارك
شو لسه جدك كبته
حمره يمهدي رايته
چا يمته ثارك
لــسه حسين جدك رايته حمره .. تاخذ يمته ثاره
يصب لسه يمهدي دمه من نحره .. ومن جسمه يتجاره
ندعيلك بالعجل .. يبن الحـسن والفـرج
ماضل ابغيبتك .. يالمهدي روح ومهـج
شيعتك تطالب .. تنـتظرك يغايب .. يامهدي
الشاعر عقيل الحسناوي..
چن ابو صالح ابن فارس مضر
اتعنه للغرقد لچن محني الظهر
لجداده يبني اگبور
يجري الدمع ويزور
☆☆☆☆
صوره من عالم خيالي انرسمت بجفني
وجّرت گلبي وجراحه واعتله ونّي
انظر المهدي تعنه والظهر محني
للبقيع ابهيده يمشي وحاله الّمني
وغورگت عينه وجره منها الدمع
وبيده شايل ياس وورود وشمع
ويشيد الهم سور
يجري الدمع ويزور
☆☆☆☆
المنتظر محزن اشوفه وذابل اخضاره
يشوغ كالساعه انظره ودمعه يتجاره
وگلبه من ثگل المصايب بين اوجاره
ايگول اهلنه ابلا مناره وحضره وازياره
وسرفن اردانه وتحزم واعتنه
وللحسن شيد منارات وبنه
وينهي الظلم والجور
يجري الدمع ويزور
☆☆☆☆
ويبني للصادق ضريح ايطيب الخاطر
والعلي السجاد يبني ويبني للباقر
من ذهب اصفر الگبه تسحر الناظر
ويوگف يصلي جماعه وكل محب حاظر
وسمع اينادي وخبر چنه يذيع
خلي نتعنه نزور اهل البقيع
يامحله ذاك النور
يجري الدمع ويزور
☆☆☆☆
وانظر يدور على امه فاطمه الزهره
ينعه وينوح الكسرها وخنگته العبره
لو ذكر كسر الزچيه شنهي اليصبره
شلون لم حسين يقره ما تصح حضره
والله لبنليچ منارات وصحن
صاح انه اغلامها ام الحسن
وگلبه بلهب مجمور
يجري الدمع ويزور
☆☆☆☆
دمعته خاوت عيونه وناره لهابه
والحزن كلنه نعرفه ونعرف اسبابه
ندري من نار المخيم حزنه وصوابه
وگلبه للمسلوب هدمه منكسر بابه
يندب حسينه صباحاً ومساء
عاشت بروحه مصيبة كربلاء
وبگلبه چم عاشور
يجري الدمع ويزور
☆☆☆☆
الضامي ماينسه مصابه وينسمع نوحه
يقره يحسين ومصابه ويلچم بروحه
ينادي ترضه يا إلهي جثته مطروحه
ينعه جده بكل مسيه بونه مجروحه
وبو صالح واضح بوجهه الحزن
والدمع جرّح خدوده والجِفن
وينادي يالمنحور
يجري الدمع ويزور
☆☆☆☆☆
حيدر بشار الدراجي
نريد منك ثارها
اطلع بفقارها
يلا عجل عالبقيع بصولتك
وعالمناير كون رفرف رايتك
هذا ثارك كوم يلا بغيرتك
نريد تحجيه يمهدي حجايتك
باجر عالگبب علك رايه
وللبقيع نروح هم مشايه
كوم وجر نارها
نريد منك ثارها اطلع بفقارها
______
ابو صالح باجر يذل كومهه
ويطلع عالثار هو بيومهه
وبالبقيع يصيح وين علومهه
مثل حيدر هم ينزع هدومهه
بسيفه يطلع والكفر يكضيه
وكله تركع خوف يم مهديه
خل تموت اشرارها
نريد منك ثارها اطلع بفقارها
_____
الثار يم المهدي باجر مايضيع
وبيده يبنيه الكبور البالبقيع
والضوه الفوك المناير هم يشيع
وعالكبب تلكه الروايه للجميع
باجر الزوار كله خل تزور
كله مبنيه المراقد مو قبور
كوم طش اسرارها
نريد منك ثارها اطلع بفقارها
____
دولة القائم تضل هيه الفخر
ومايخلي الثار يبطي المنتظر
سيفه ذو الفقار بيده لو ظهر
وباجر الجفين ترجع للكمر
ومايخلي الروس باجر عاالجسد
ويوكف العباس ماهمه العدد
وماتضل كبارها
نريد منك ثارها اطلع بفقارها
_____
باجر قرايه تصير بكل صحن
وبالبقيع يصير مجلس للحسن
تحضر الزهره وتون عالضعن
ويوكف المهدي بعزائه والمحن
كله باجر توكف بنص العزاء
والبقيع يصير نفسج كربلاء
وخل تزور مزارها
نريد منك ثارها اطلع بفقارها
___
وداد البخاتري
#السلام_على_سادات_البقيع
حق سادتي صلوات الله عليهم
ذكرى هدم قبور سادتي ائمة البقيع 8شوال
استنكار وحلم
~~~~
قـضـيـة كـل غـيـور اگـبـور ساداته
الـشـهـم بالفزعة مـن نقيس وگفاته
الـمـا يستنكر اهـواي الوكت فـاتـه
العين عن الحلم لا ماهي بعيده
تبني لأم عـبـاس والگبة وطيده
واربع اصحون بأسم ولد الشهيده
مايضيع الحق على كلمن يريده
يرجع الحق الانسلب
نبني گـبـة من ذهـب
لسيدة شـرع الـوفـه
المزجت الحب والادب
السلام على سادات البقيع
~~~~
شيطان السكت عن حق غصب رايح
ليش لـيـا وكـت گبر الحسن طايح
رَد احسانه ليش بكل قُـبـح واضـح
نبني گـبـة لسيد الحب والامامه
وعله شباجه رسم خبزة وحمامه
وادلال سوده إتفور مـنـا لـلـقيـامه
هـذن كلهن شالهن غيرة وشهامه
نكتب بباب الصحن
لا كريم الا الحسن
گهوّته التـصـنع زلـم
اشما مشه هذا الزمن
السلام على سادات البقيع
~~~~
لساداتنه عـلـي السجاد والـبـاقـر
نشيد اگبور تكسر تـجـبـر الـنـاظـر
بحق ساداته كلمن داعى ماخاسر
نحط شعار الجامعه الكلش ثگيله
وصور نوك امسدره امبينه هزيله
ناگه نرسم شرط والهودج تشيله
حـتـه مـا تنشاف عمتهم عقيله
نكتب بخط منكسر
إنـنـا طـول العمر
نطالب بهاي الگبب
بلا ثواب ولا اجر
السلام على سادات البقيع
~~~~
دخيل الصادق الهاشمي و علميته
البي مـذهـب الشيعة ما نزل صيته
نبنيله ضـريـح بـعُـظـم قـدسـيـتـه
نكتب اهنانه صحن شيخ الروافض
رغم انف وراس كل واحد يعارض
واضحة كل الحقيقة وماكو غامض
عله حق سيدي وصحنه ما أفاوض
مابقى شي للأمل
گربت ايام العجّل
تنبني لهاشم غصب
عالقبل والما قبل
السلام على سادات البقيع
~~~~
خادم الحسين محمد منير المياحي
امــنـيـات
#لقبور_ساداتنا_آل_محمد_ساكني_البقيع
#عليهم_السلام_اجمع
يجي يوم ونلگه قباب
وكل واحد عد گبره باب
ونأدي طقوس الزياره
واجب مو لجل الثواب
يسادتنا مته نلتم حدر فَي اضرحتكم
ونْوخر الترب عنكم ونّبين منزلتكم
اكو وادم بزر عثمان تَجاسر هدمتكم
وبزر حيدر روايه نهد بدخوليات يمكم
نبني البقيع = ونشيد مزاراته
نبني البقيع = ونِرَتّل عشگ اياته
نبني البقيع = وندعي لعجل قائمنه
نبني البقيع = بدعاء الفرج وابياته
معشرنه حبه بفطره وعقيده
يمهم قريباً نقره القصيده
هاذي قبور البقيع الجديده
============
يجي يوم انقيم العزاء
بنص البقيع ونص كربلاء
وننذر كل دمعه لمصيبه
للسم ولركض النساء
يسادتنا العمر يمشي شوكت رزق الزياره
ويعود الگبر المهدم الى سابق جِداره
قياس بتلت التربه اشصغر قصر الاماره
ولكن عن قريب الكم قبب والكم مناره
نبني البقيع = ونلتم بين بيبانه
نبني البقيع = ونعيش مصابه واحزانه
نبني البقيع = ونطب عد ملتقى الرحمه
نبني البقيع = وانادي جعفري أنه
اول نداء بأول زياره
يصير البقيع بأيد الغياره
ويلتم شملنه بگبه ومناره
=============
يجي يوم ونلتم شُمُوع
ونحرگ أنفسنه بخشوع
بكل بقعه نقيم العزاء
ونسگي الغرقد بالدموع
يسادتنا اما آن الاوان الكله ملگه
وترد روحه لعوايدهه انسان اليلگه عشگه
ما نرضاها عدنه احنه الشيخ يضيع حگه
وحقكم كل امانينه مراقد كون نلگه
نبني البقيع = ونرد الحسن لحسينه
نبني البقيع = وألهم كل بواچينه
نبني البقيع = ونلتم زلمه يم زلمه
نبني البقيع = وحرورة الطف بينه
اگبور اللي بيهه اسرار الامامه
متهدمه وسفه وتبقى بظلامه
حچيي الحقيقه يجرح كلامه
============
يجي يوم ويعله الصياح
ونتعب بي ما نستراح
عبدكم حريته الجروح
ولبقيع الحق كلشي صاح
يسادتنا الظلم جائر انتظار الحق ظهوره
شوكت طلاب ثاراته يجي يحلهه بحضوره
الظلامه امخيمه ع النعمه وبنه الظالم قصوره
وبناء الغرقد المطلب ونشوفه بأبهه صوره
نبني البقيع = بخادم خادم ويعله
نبني البقيع = وگبه انحول التله
نبني البقيع = ومواكبنه اعله بيبانه
نبني البقيع = ومشي حفاي نوصله
سر الوجود برحمتهم ايقن
كلّي عقيده وما لازم امعن
الصعبه بفضلهم تتسمه ممكن
===========
علي مهدي المالكي ..
ثار البقيع المهدوم .… مهدينه بيده ايجيبة
____
ثار البقيع ايجيبه بس طلّابَة
من يسحب الفقّار من اگرابة
آه يالبقيع و آه يذاك امصابة
خلّه اعله راس الاسلام .. من هدمته اشچم شيبة
ثار البقيع المهدوم ..… مهدينه بيده ايجيبة
__
باچر يجي المهدي ونجي كلنه اوياه
يبـني الـبقـيع و نوگـف ابسـد مگفاه
يـكــتب بعــد يــا عالـم انقــيم اهنـاه
لمّن يجي ابعون الله ..… مامش بعد اي غَيبة
ثار البقـيع المهـدوم ..… مهدينه بيده ايجيبة
___
راية محمد تلمع اعله اچفوفة
يـبني المراقد والبـقيع انطوفة
نگعد حدر فَيْ الگبب و نشوفة
باچر يرفعه و محروس .. بيده و تعود الهيبة
ثــار البقــيع المــهدوم .. مهدينه بيدة ايجيبة
_
اتصير الگبب عالدنيا مثل الخيمة
باچر خُضَار اتصـير ذيچ الهيمة
وگبر الحسن يعبر بياض الغيمة
يرجع هذاك الترتيب .. يسوه الذهب ترتيبة
ثار البقيع المهدوم .. مهدينه بيده ايجيبة
____
يسوه التراث الــعالمـي والحاظر
يضوي البقيع و يعمي عين الناظر
ويشبـگ علـه السجـاد گبر البـاقر
وگبر ام الابْنين ايصير .. يم النجم تقريبة
ثار البقيع المهدوم .. مهدينه بيده ايجيبة
__
بس الصبر للطللعة يبقة الفارق
كلهم سكوت وسيفة هوّه الناطق
ديرة ذهب يرجع ضريح الصادق
و بإيدة وبحيلة ايصير .. ذاك الگبر تنصيبة
ثار البقيع المهدوم .. مهدينه بيده ايجيبة
____
من يطلع امحزّم حبيبي لثارة
اربـع گبـب تلمـع مثـل فـقّارة
يحيي البقيع و يمتلي بزوّارة
ترجع هذيچ الاضواء .. يسهَلْ أمر تصعيبة
ثار البقيع المهدوم… مهدينه بيده ايجيبة
ماي الكرة الارضية ما يطفـي النار
ذيچ التـشـب ابگلبة حـد يوم الثــار
يا محلى هاي الكلمة للمهدي انصار
يحمينه هوه ونحميه .. نسمة هوه متصيبة
ثار البقيع المهدوم .. مهدينه بيده ايجيبة
___
الشاعر علي هادي الخزعلي
زلـم ابوفاضــل شالــو الــرايــه
وأرض الـبقـيع انـطبـهـا مشـايـه
من كربله ايصـــير المشي نلـتـم سوه كلـنـه
ومثل الانصار عــله الخيـم نوگف تـحـظـرنه
رايـتـنـه شـايـلـــها الـگـمـر محلاها رايـتـنـه
يم قبر أمـه الـرايـتـه أتـرفـرف شـــواربـنـه
مـشـتاگ گلـبـه وصابر اهوايه
وأرض البقيع انطبـهـا مـــشايه
------
كـــل الـمـواكـب تـنـتـشر طـول الـدرب كـلـه
بگلـوب التـهـــدم الـقـبـر حطـينه الـف عـلــه
انـــطـب البـقيـع وكــل كـتر بدموعنـه انـبلـه
وبــالــباب نـكـتـب لافــته هـــيــهات لــلـذلـه
قبـر الـحسـن ماينچـفي مايه
وأرض البقيع انطبـهـا مـــشايه
------
نبـنـيـهـا حـضـره بكل فخر والـگـبـه ماتـنـصه
والطينه مو بالخد بـعد نـنـطـيـها بالــــگــصـه
الچـف التماده عله القبر من چـتـفـه انگــصـه
بكل شيعي قـبر ام الگمر ضلت ألــه غــــصـه
أم الـبنـيـن أمـربـيـه وفايـه
وأرض الـبقـيع انـطبـهـا مشـايـه
------
الـمــاراضـي نـبـنـيـه الـقـبـر وتــجــرء بكـلـمـه
خل يـمـنـع الرايه التـجـي لو مـنـحسب زلـمـه
وخل يوگـف يــكـض الـدرب لو حتـه أبحـلـمه
نخلــي العــشيره الــــجـابــته تـتـبره من دمـه
يندل مچـانـه وخل يضم رايه
أرض الـبقـيع انـطبـهـا مشـايـه
-------
مشايـه نـوصـل كربـله ومـن عـــــدهـا نـتـعـنـه
لـ أم الـبنين من الصــحــن بالرايـــه كـل احنـه
محلاها لو يـم الـقــــبر مـثـل الـدمــــع طحـنـه
محلاهـا لو مـوكـب لـطـم مـن كل كتـر رحـنـه
موكـب محـنـه ونــاسـه وفـايه
أرض الـبقـيع انـطبـهـا مشـايـه
-------
لـ #حيدر العماري
زاير بشوك وهيام.. اعتني الأرض البقيع
بسجل سادات الوجود.. الخطوه والله ماتضيع
لغله الاحباب.. والاطياب.. اروح زياره
گلبي مشتاك.. والفراك.. حركني بناره
......................
انه الگلبه تجوه
بحزن بيت النبوه
ويضل صوتي.. لحد موتي
الحياتي همه سلوه
عشت عمري بذكرهم
ولا اعصي أمرهم
ولانادم.. انه الخادم
دمعتي وخيري منهم
من اروح زياره يمهم يختلف حته الهوه
من عطرهم انه اشمن والله تربة نينوى
هذا الاحساس العجيب.. بروحي عايش من زمان
اكبر ويكبر معاي..وياهم أشعر بالأمان
هذا الاحساس.. يهل ناس.. اسمعوا اخباره
گلبي مشتاك.. والفراك.. حركني بناره
.......................
رسمت أبالي صوه
ضريح الهم وازوه
اطوفنه.. واشوفنه
يشع بالدنيه نوره
احبهم والله احبهم
ولازل عن دربهم
انه جروحي.. وكثر نوحي
الفكدهم والغربهم
الدمعه اجريهه عليهم من قريب ومن بعيد
دين عدهم هذا دمعي بغربتي باجر يفيد
ما اضل غادي وحيد.. اني متأكد اكول
بالگبر عيني تشوف.. تحضر الزهره البتول
وروحي هيهات.. بل آهات.. تضل محتاره
گلبي مشتاك.. والفراك.. حركني بناره
.........................
انه شما احجي بيهم
يرف گلبي عليهم
عشت عمري.. بفخر ودري
حياتي أبين اديهم
اجي بنية زياره
حلم عمري الغياره
كحل عيني.. ومُنه سنيني
اشوفلهم مناره
وبالصحن اوكف واسلم.. والدمع مني يصب
وادخل الحضره بلهفتي وشوكي ذاك البلگلب
واندب بصوتي واصيح.. شكراً الرب السماء
وعيني تنضر علجمال.. في ضريح الأولياء
حزني للدوم.. والهموم.. عليي مطاره
گلبي مشتاك.. والفراك.. حركني بناره
......................
حزن خيم عليه
بقيع وغاضريه
اصب دمعي.. واضل انعي
عله اولاد الزجيه
مصايبهم جبيره
ولد شيخ العشيره
نحر دامي.. وجبد ضامي
وحرم الهم اسيره
والحسن ماانسه يومه ونعشه بسهام انرمه
وفوك هذا الصار كله وهسه گبته مهدمه
لجمه واهات وجروح.. وكلهن بوسط الدليل
واكبر اجروح ومصاب.. زينب ونوك الهزيل
شنهو الأسباب.. وابو ترب.. غريبه دياره
گلبي مشتاك.. والفراك.. حركني بناره
.......................
علي السجاد اشوفه
وتصد عيني الطفوفه
شكثر ينحب.. على زينب
والحبال بجفوفه
وعله الباقر رزايه
مشه بدرب السبايه
انجرح گلبه.. بدرب غربه
عذابه امن البدايه
وصادق العتره الشريفه بالمحن كضه العمر
وبيته مثل اخيام زينب هم لهب نار وجمر
شافوا انوع العذاب.. وياجرح منهم يطيب
صبوا ادموع العيون.. للبقه بالطف سليب
المهدي موجود.. تره يعود.. يجيب بشاره
گلبي مشتاك.. والفراك.. حركني بناره
محمد هادي العقابي
شكد شايل اجروح... ياعاشك النوح
لهل البقيع اليوم... روح بگلب ملجوم
يابو صالح.. يابو صالح
...................
انته بالدنيه الوحيد الدمعه سجاب
عايش بغربه يمهدي ومالك احباب
ابد ما مرتاحه روحك من المصاب
اعزاز گلبك كلهه نامت جوه التراب
يالتبجي لحسين... بكل دمعه بالعين
حيلك صبح مهدوم... روح بگلب ملجوم
يابو صالح.. يابو صالح
..................
هدموا كل المعالم ناس ضلام
الياوكت نعش الحسن ينصاب بسهام
انته يوميه بجرح من هاي الايام
تشهك انفاسك يمهدي شهكت آلام
جفنك فلا نام... كدامك اخيام
ماطفت تسعر دوم... روح بگلب ملجوم
يابو صالح.. يابو صالح
....................
شاب راسك والمصايب سيدي هواي
والكسر گلبك يمهدي الضل بله فياي
بيا حزن لرض البقيع الليله عناي
وتدري بالسجاد يخبط دمعه بالماي
بيا حسره يا آه... تتلاكه وياه
الجدك علي المسموم... روح بگلب ملجوم
يابو صالح.. يابو صالح
.....................
انته من دون البشر يالمهدي محتار
مثل دار الصادق بگلبك تشب نار
شي اكيد بعينك انته شايف الدار
وصارت كبالك رقيه ويه الزغار
وتعرف بالزغار...تخوفهم النار
والكل طفل مهضوم ... روح بگلب ملجوم
يابو صالح.. يابو صالح
.....................
عايش ايامك حزن هم واذيه
وجرحه شيطيبه المشت عمته سبيه
حاضر الباقر وشاف الغاضريه
وما نسه درب السبي الحد المنيه
وضل اعله هل حال... من ذيج الحبال
للكلبه كله اهموم... روح بگلب ملجوم
يابو صالح.. يابو صالح
.....................
حكهه والله بهل مصايب تدمع العين
هدموا كبر الوفيه ام البنين
يابو صالح ماتت ومشتاكه لحسين
ابد ما لحضه استراحت من الونين
ياابن الاطهار... نتنطر الثار
للسلبوه الكوم ... روح بگلب ملجوم
يابو صالح.. يابو صالح
محمد هادي العقابي
اكتبهه بدمع عيني.. رساله وبلگلب جمره
بحزني وشوكي والامي.. اواسي فاطمه الزهره
فلا تخلص مآسيهه
بقيع الغربه ياذيهه
.....................
ليش المصايب والهضم يم الزجيه التمن
مخفي كبرهه وبالكبر مامستراحه امن الون
شعدهه الدنيه ويه الزهره كل يوم ايمر تلجم بيهه
ماخلتهه تشوف الراحه تهضمهه وحيل تبجيهه
ماخلت ولّد عدهه وگلبهه اعليهم اتفطر
بس المهدي بالغربه.. ويصب الدمع احمر
تحب الي يواسيهه
بقيع الغربه ياذيهه
.......................
فتشة عيون أمه الحسن ماخلص هدموا كبره
اليشتاكله جان النبي ويبوسه إله بثغره
تتعناله وتنحب أمه ترش كبره بدمع الحنيه
ماطابت كسرتهه الهسه توصل يمه بس محنيه
مكسورت ضلع يصعب... عليهه الهوه التشتمه
من تشهك نفس بالاه... ضلعهه تسنده وتلزمه
المصايب صبت اعليهه
بقيع الغربه ياذيهه
.......................
يم علي السجاد بدمع توكف تصد الناضر
تدريه ملوع بالحزن من ذاك يوم العاشر
جمره وتسعر لاماتطفه هذا ابن حسين ودفانه
فوك همومه وكَسرة گلبه هدموا فوكاه كل بنيانه
بهاي الحاله وتشاهد.. وتنعى بحسره وتنادي
ولدي ذوله ياهل ناس.. واني بضعة الهادي
منو اليسمع نواعيهه
بقيع الغربه ياذيهه
.......................
تخلي اديهه اعله الكبر للباقر تضل تنحب
حاضر هناك بكربله وبعيونه شايف زينب
تدري جروحه لاميطيبن من شاهد زينب يسبوهه
بسوك الكوفه أبين الوادم اخت العباس ايمشوهه
لاهوه البرد حزنه... ولاهيه الكطع ونهه
وسهام الزمن كل يوم... بگلب الزهره لاحنهه
الحزن مالحضه ناسيهه
بقيع الغربه ياذيهه
..................
تشعل شمع يم الكبر للصادق ومحتاره
وتشوف ركضت عيلته ساعت الحركوا داره
ايطفي ويبجي ويذكر عمته من حركوا فوكاهه الخيمه
وعلوياته ابيته ايركضن وزينب تركض وسط الهيمه
مايبجي عله عياله ضل يبجي البواجيهم
زينب واليتامه هناك جوه الجمر رجليهم
تجر النفس مابيهه
بقيع الغربه ياذيهه
.....................
بعكازه تتوجه وتجي لم البنين الحره
ودكلهه عباسج وفه وقدم عيونه ونحره
هذا الغالي ونور عيوني بالمحشر ارفع جفينه
الشالن جوده ودافع بيهن عن خيامه وعن حسينه
تجيهه بدمعة الفاكد... مشتاگه ويه مشتاگه
وبارض البقيع ايصير... نوح ودمعه الملاگه
مهضومه وتحاجيهه
بقيع الغربه ياذيهه
محمد هادي العقابي
قصيدة لذكرى تهديم قبور البقيع في الثامن من شوال
بالبقيـــع أربـــع گبب
تنبنـــي باچـر ذهــب
واالمواكب تنصّبْ يم الضريح
يمنه يالزاير تفضـل وأستريح
*
بينه جمره جمرة الفارگ حبيبه وعنه غايب
بينه جمره جمرة العطشان طفله وگلبه ذايب
بينه جمره للبقيع ولوعته وفعـل النواصب
بينه جمره جمره تسعر بالگلب لجل الحبايب
تطفــه جمــرات الدهر
مــن يجينــه المنتظــر
بعالي صوته أهناك بالدمعه يصيح
يمنــه يالزايــر تفضــل وأستريــح
*
تعله رايه باچـر بعـون الله وترف عالمناير
تعله رايه بالبقيع المهدي همْ ويانـه حاضر
تعله رايه مطرزه ابلون الدمه ونزف المناحر
تعله رايه وتنصب بأرض البقيع اعظم شعائر
ونقـــره مقتل بالدمــع
والخــلايـــق تنفجـــــع
ابصوت عبد الزهره نصرخ يالذبيح يمــنه يالزايــر تفضــل وأستــريــح
*
للغوالي نبني مرقد من ذهب يسحرها العيون
للغوالي نعتني أنـزور بـرغم كل اليضدون
للغوالي للبقيع من الطفوف أحبابه يمشون
للغوالي تدخل أصحاب المواكب من يعزون
أبصوت ياسين أو وطن
نلطم أبوســط الصحـن
وموكب الخدمه ينصبونه المسيح
يمنــه يالزايــر تفضــل وأستريـــح
*
من نجيكم نگصد لصحن الحسن احنه ابطلبنه
من نجيكم ندري ابو محمد كـريم وما يردنه
من نجيكم آوياكــم أبدم النحـر نكتب عهدنه
من نجيكم نگطع اچفوف اليضدكم واليضدنه
نلبس أثيــاب المجــد
والله عنكم مــا نـــرد
نجيبه خادم يمكم الطايح جريح
يمـنه يالزايــر تفضــل وأستريــح
****
بالمناره نـــرفــع أذان التشهــد بالـــولايه
بالمناره عالمباشــر تستمــع كــل البرايــا
بالمناره نقــره أسماء الايمه أهل الهدايه
بالمناره علم مــرفــوع وعليه مكتوب ايه
اية النصــر المبين
تنظر الها العالمين
قد جاء نصر الله للكون الفسيح
يمنه يالزايــر تفضل واستريـــح
****
الشاعر
موسى البديري