كلمات قصيدة معجزة كونية محمد الجنامي مكتوبه كامله
لطمية معجزة كونية محمد الجنامي
قصيدة :- معجزة كونية .
كلمات :- الشاعر كرار حسين الكربلائي .
أداء :- الرادود محمد الجنامي .
-----------
مــعجزه كونيه .. عـالـكـره الارضــيه
الله خالــق بسـم الحســين گمــر
رايه شايل رايه .. و يمي گال احجايه
راح اصــير اباب الــخــيام نـهــر
كلمة شرف ينسـاها حاشه
ابا الفضل ساقي العطاشه
يـعبـاس ... يـعبـاس
------------
عندي ابن ما فهمته عقول الناس
جفـينه كل جف ابمـجره يـنقـاس
الوادم يصيحولي سمه واعرف ليش
بس السمه تگدر تشيل العباس
گمر وابهيئه انسان گمر بس يضوي غيره
الخلق بالدنيه عـباس بـس ما خلق غيـره
اله و الوحـده ايلوگ لقـب بـدر العـشيـره
الكون و الطف شاهد .. ابو فاضل واحد
لـو تبســم يتــرس الـكــون ضــوه
الغيـره كلـها ابراسـه .. طيب الله انفاسه
وكاشـخ بجـف ابنــي عبـاس لــوه
حـتى الجبــل يمه تــلاشه
ابا الفضل ساقي العطاشه
يـعبـاس ... يـعبـاس
------------
وصيته من ضمن الحجي ابوصيتين
حط الحسين ابعينك و غمض العين
بالك تگله خويه گله مولاي
واتوضه لمن توكف اگبال احسين
يهـنيالك يعــباس عــشگنه ابلا مقابل
گبل ما تحجي وياه توضه يابو فاضل
اليجن ابحب الحسين تگله الناس عاقل
ونعم من عباسي .. ابني رفعة راسي
ســاعة من اسنينــه تنقاس سنـه
ولدي يا محلاهم .. و الگــمر وياهــم
گلــت منـهو ينطـي جـف گال انه
غيره وزعل بالدم تمـاشــه
ابا الفضل ساقي العطاشه
يـعبـاس ... يـعبـاس
-----------
يوم المشه قائد مشه بضعونه
گتله المخيم اشر اعله اعيونه
بس گتله زينب طگ عرگ بالعباس
گال انه يمها بت علي مامونه
گمر زينب يسموه هله ابشيخ الكفاله
اثر ناگتها عالگاع يـغطـيه ابخــياله
الخدر ممنوع ينشاف كتب اجمل مقاله
السمع خل يتأدب .. انه كافل زينب
من حجاها كلشي بالكون خنس
گالها ويتبختر .. بت علي خط احمر
و انه بالذر الها مخـلوق حــرس
حارس خدر كل عمري عاشه
ابا الفضـل سـاقي العطــاشه
يـعبـاس ... يـعبـاس
-------------
گتله اسمعت موسم عطش بالطف جاي
شــفته ابتســملي وگال لي بشري ابهاي
اوداعة علــي بالـــطف انزلج غــيم
ســابع مجــره بجــودي تغــرگ بالمــاي
انه الأيهم انه الموت انه الفارس الاهيب
لخــلي ابكربله الماي يبوس اجدام زينب
لخــلي العلگمــي اهـناك جهنـم بيه تلهب
العــلگمـي گـلوله .. خل يلملم طوله
ماكو يم جربه العباس عطش
بيده شايل سيفه .. الدنيه كلها ابكيفه
ماكو گدامه جفن عين رمش
وكت الحرب يصعب نقاشه
ابا الفضل ســاقي العطاشه
يـعبـاس ... يـعبـاس
-------------
وفاني ابنــي ابكربله وگر الـــعين
صوته وصلني يرتجز بسم حسين
والله أن قطــعــتمــوها الانــفـاس
ديني الحسين وما اعوفن هالدين
صحت شكراً يعباس زدت فوگ الوصيه
ولا ضاع التعـب بـيك يبــو روح الوفـيه
متـت لعيون الحــسين جــزاتك عالزچيه
شكراً لمعروفك .. شكراً اعله چفوفك
الك يـبنــي بـگد الخيــام شــكر
بالحــشر گدامه .. راح اشــيل الهامــه
انه ام الضحــه لحــســين عمــر
عندي گلب حـس بانتعاشه
ابا الفضل ســاقي العطاشه
يـعبـاس ... يـعبـاس