كلمات قصيدة من شفتك دم كلبي كال موت المشيب كاظم الطليباوي مكتوبه كامله
لطمية من شفتك دم كلبي كال موت المشيب الرادود كاظم الطليباوي
أهلاً يا موت المشيب
يا حُب الماله حَبيب
كلما طوّلت المغيب... عمري يگصَر
___
مِن بَعَد إذنك ... أحچي وي گلبك
أكثر امْن الهَم ... والله أنَه امتعبك
نادرًا أبــچـي ... ودائمًا أضـحـك
وأنتَ يوميّــة... واحِد ايذبحك
لا آنه فازعلك فِده ولا آنه حارگ دمّي
بالي اويَ ناس امهاجره وناسيك بالك يمّي
مِـنْ شِفتك دَم گلبي گال
بس هذا الحُبّــه حَــلال
ما أنطي الروحي مجال... تِعشگ أكثر
___
الكون بعيونك ... أقِل مِن ذرّه
والمِثِل حالي ... يمّك شزغره؟
چا شجاه گلبي... ما عرَف قدره؟!
والعجَب ينْسى... وأنتَ الإتذكره!!
مِن عمْيه عين الما ترى أنت الرقيب اعليها
وتبّـًا لِـ هالدنيا إذا ما حِس وجودك بيها
دنيا ابلا مهدي تصير
دين ابلا يوم الغدير
بالظاهر چنها حرير... وبيها أعثَر
_
أُمنيتي أندلّك... وأعبر أغيابك
وأكشِف أوهامي... برؤية أصحابك
حتى إذا اتعدني... مو مِن أحبابك
بس أريد أگضي... عُمري يم بابك
أرد أبچي يمّك عالسبي الما ينحمِل طاريّــه
ايذبحك إذا ناعي نعه ( زينب مشت مسبية)
كل خطوة طفلة تطيح
وكل مِيلة حُرْمة تصيح
واحسين برمحه ذبيح... وجسمه بالبَر
____
غفلتي وذنبي... عني بِعدنّــك
وبس الإيعرفك... يگدر ايثمنك
ملتهي بغيرك... وأنتَ وي حزنك
چا تلاگينه... لــو أحبــنّــك
الوادم قصايد مو إلك ما اسمع اليقراها
بس القصيدة التِذْكرَك روحي تروح اوياها
بابك ما عندي سواه
لو نار ايضمني وراه
مِنّ أبرد رزقي هواه... ابزوده أسعَر
_
حچوا عن ظعنك... ما وراه رجعة
سيدي أسأل مَن؟...ووادمي امضيعه
واگف الجيتك... عالرمِش دمعة
كون أيّامـي... كلهن الجمعة
فضلك عَلَي ما ينحچي واهبني راي وثاية
ومنطيني مِن عمرك عُمُر حتى أدرِك المشاية
صايرلك ظهري هلال
يكمل لو گتلي تعال
هذا أوّل وآخر سؤال... يمتى تظهَر؟