كلمات قصيدة فرسان الحرب سيد فاقد الموسوي مكتوبه كامله
لطمية فرسان الحرب سيد فاقد الموسوي
قصيدة : فرسان الحرب
الرادود :سيد فاقد الموسوي
الشاعر :سيد محمد الموسوي
ـــــــــــــــــــــــــــــــــــــــــــــ
حسين صاح ضهورهن يزلامه
اليوم يوم حساب موش عمامه
حيهم العباس ذب الثامه
الحار وابن الحار شد حزامه
مثل علي قتاله
منو الگدر نزاله
كضا الزلم بخياله
هلا بعباس
نزل فته القبيله
خذه النهر دخيله
زلم علي ثگيله
يرفعت راس
يخيام صيحي وهلهلي
عباس يملوحة علي
العركه صارت بس اله
منين تشرد كربله
حيهم فرسان الحرب
حيهم گلبوهه گلب
اليوم يوم المرجله
منين تشرد كربله
ــــــــــــــــــــــــــــــــــــــــــــــــــــ
نزلو السوح الحرب وفايه
والچفافي نشدت اعله الرايه
ابجربته العباس سوه سوايه
يترس ويچفي اعله المسنايه
زلم ترس جربته
مثل علي بوگفته
صگر هلا بخزرته
شبل كرار
ابن علي المحارب
سحگ على الشوارب
هجم على الكتائب
بيده الفقار
عباس شال الگنطره
والجيش ضل يرجع وره
طبهم والمردم حله
منين تشرد كربله
حيهم فرسان الحرب
حيهم گلبوهه گلب
اليوم يوم المرجله
منين تشرد كربله
ــــــــــــــــــــــــــــــــــــــــــــــــــ
حسين يم الخيمه لم انصاره
حتى كل قائد يعرف ادواره
بعده ماكمل واجته ابشاره
خله عباس الجثث طشاره
علي وشهر حسامه
نزل بده القيامه
علم يرف شهامه
خذه الميدان
هلا بكفو العشيره
ضهر علي شيديره
يبو الوفه يغيره
گمر عدنان
تاريخ حماي الحمه
واليوم ثارچ يفاطمه
الله ثاره مسجله
منين تشرد كربله
حيهم فرسان الحرب
حيهم گلبوهه گلب
اليوم يوم المرجله
منين تشرد كربله
ــــــــــــــــــــــــــــــــــــــــــــــــــــ
طبت انصار العشگ للحومه
والتعطله هدومه ذب هدومه
اليوم مو كلمن يموت بيومه
المايموت اليوم روحه تلومه
يابو الهله الحنينه
الك رگب فدينه
الك عهد علينه
نموت وياك
يبن علي الشهاده
اذا الك عباده
گلب اعلن جهاده
ولا عفناك
يحسين رخصنه الرگب
والماي لونه احمر گلب
اليوم حلت زلزله
منين تشرد كربله
حيهم فرسان الحرب
حيهم گلبوهه گلب
اليوم يوم المرجله
منين تشرد كربله
ــــــــــــــــــــــــــــــــــــــــــــــــــــ
صاحت اجيوش العده من الخوفه
بكل جهه العباس گمنه انشوفه
حسين چان نرد من نشوفه
يشيل بيده ويشمر اعله الكوفه
نحير اذا اجانه
بوجهنه لو ورانه
ابن علي گضانه
دخيل حسين
بده يقل عددنه
نموت اذا شردنه
يبن علي لبدنه
ورا الميتين
عباس كضنه الدرب
وانريد شرده من الحرب
لامفر صوت اعتله
منين تشرد كربله
حيهم فرسان الحرب
حيهم گلبوهه گلب
اليوم يوم المرجله
منين تشرد كربله