كلمات قصيدة عالمشرعة العباس .. صاب السهم عينه مكتوبه كامله
لطمية عالمشرعة العباس .. صاب السهم عينه
عالمشرعة العباس .. صاب السهم عينه
أحا يا سهم العین .. وانكسر ظهر حسین
(وأحنه انگطع بينا)
ــــــــــــــــــــــــــــــــــــــ
گابلت شاطي العلگمي و فجر دمعها
(وأحنت ضلعها)
صرخت وديعة فاطمة بصرخة فزعها
(وأحنت ضلعها)
یاگمر هاشم مصرعك لأختك فجعها
(وأحنت ضلعها)
جتال اخوك حسين .. فرهد صواوينه
و السهم والعامود .. گطع جفوف الجود
(واحنه انگطع بينا)
ــــــــــــــــــــــــــــــــــــــ
عباس تذكر ساعة اللي طلعتني
(وانته اكفلتني)
ماحرمة مثلي تدللت يالدللتني
(وانته اكفلتني)
مكتوبلي سوط العده يطگني على متني
(وانته اكفلتني)
شوف الزمان شلون .. صابت نياشينه
يالمنفگد شوفك .. وانگطعت أچفوفك
(واحنه انگطع بينا)
ــــــــــــــــــــــــــــــــــــــ
عباس تذكر ناگتي من جهزتها
(بيدك گدتها)
فوگ الحرير برايتك من برگعتها
(بيدك گدتها)
و عالناگة تذكر يا عقيلة الركبتها
(بيدك گدتها)
ولكربله بحماك .. ياخوية طبّينا
ماچنت اظن عالماي.. ينهدم سور حماي
(واحنه انگطع بينا)
ــــــــــــــــــــــــــــــــــــــ
عباس فاتني و مشن بيض الليالي
(كل چاره مالي)
وإنطوى بطيحة رايتك عزي و دلالي
(كل چاره مالي)
زينب انه و ما شافت الوادم خيالي
(كل چاره مالي)
أصفن وأحاجي الروح .. وين الخدر وين
نادتني خدرچ راح .. طاح الِموَزّم طاح
(واحنه انگطع بينا)
ــــــــــــــــــــــــــــــــــــــ
چنه بطريج العلگمي جسمه يتگلب
(صاح اعله زينب)
عتبچ ضهدني ولا تكثرين المعاتب
(صاح اعله زينب)
سبیچ و نيران الخيم بالگلب تلهب
(صاح اعله زينب)
تدرين اخوچ شحال .. ما بينچ و بینه
وآنه ادري بيك اشصار .. مخك غده طشار
(واحنه انگطع بينا)
ــــــــــــــــــــــــــــــــــــــ
عتبي يابو فاضل تره و النَحِب والنوح
(من لوجة الروح)
حگ المعتاب عالعدل مو على المذبوح
(من لوجة الروح)
وآنه ادري بيك امگطع اعالشاطي مطروح
(من لوجة الروح)
أعتب وأريد عتاب .. گلبي يسليني
وأنت الأجل وافاك .. و اتغسلت بدماك
(واحنه انگطع بينا)
ــــــــــــــــــــــــــــــــــــــ
چم نايبه الما تنحمل شفت بزماني
(زينب تراني)
لاويت دهري ولا تضن دهري لواني
(زينب تراني)
وسهم الشماته فگس اعيوني وعماني
(زينب تراني)
والشامت بهل يوم .. عمرت دواوينه
واشلون اطب ديوان .. وانتم عله التراب
(واحنه انگطع بينا)
---------------
الشاعر المرحوم
الحاج كاظم المنظور الكربلائي