اكثر من قصيدة نسائية مكتوبة للمشاية زيارة اربعين الامام الحسين عليه السلام
نزله للأربعين نفس طور يبو فاضل مدد
*
ياحيدر ياحيدر ياحيدر مدد
**
ياأبو الحسنين زاير احسبني لذبيحك ياأبو الحسنين
ياأبو الحسنين روحي توصل للضريح وتسبق الرجلين
ياأبو الحسنين بجاهك اتسجلني خادم فاطمه لحسين
إتسجلني بالدفتر خادم للخدم
وحسينك ماعوفه أقسم هالقسم
كل عام اتعناله ولراعي العلم
ياحيدر ياحيدر ياحيدر مدد
**
لكربله مشاي بأربعين حسين امشي لكربله مشاي
لكربله مشاي بيدي اشيل الرايه واذكر يمنة الوفاي
لكربله مشاي اذكر المذبوح ضامي لو شربت الماي
قويني وشد حيلي ياحيدر علي
لو تعبت اجدامي ازحف يالولي
لأولادك افديهم بأولادي وهلي
ياحيدر ياحيدر ياحيدر مدد
**
يالدحيت الباب معجزات هوايه عندك يالدحيت الباب
يالدحيت الباب ياحسين بلهفه اصرخ والدمع سجاب
يالدحيت الباب وادري تسمعني الزجيه ويه هالأحباب
احبابك وانصارك وليوم الوعد
وبدمنه انوقعهه للبيعه بعهد
ونصرخ يابو سكينه منعوفك ابد
ياحيدر ياحيدر ياحيدر مدد
**
لزينبك انصار شيعتك يابو اليتامه لزينبك انصار
لزينبك انصار عدنه بيعه للمنيه ويه راعي الثار
لزينبك انصار والله ماننسه السبوهه يالحميت الجار
نتلاكه نواسيهه نوصل كربله
من ردت لأخوتهه الظلو عالفله
واسم الله انكللهه ياميت هله
ياحيدر ياحيدر ياحيدر مدد
**
برفجة الجتال عالهزل مسبيه تمشي برفجة الجتال
برفجة الجتال ويه زين العابدين امجتفه بحبال
برفجة الجتال جابت الروس لأهلهه والدمع همال
تعتب عالعافوهه وتنوح بحزن
وتنادي يخواني مشتاكه واحن
ترضوهه يضربوني ورمولي المتن
ياحيدر ياحيدر ياحيدر مدد
**
شده للاربعين
جيت مشاي لزيارة الاربعين
امشي وي زينب وزين العابدين
******************
يمشي بيه الشوك يحدي لكربلاء
مايهمني الخوف لاهمني الوباء
للحسين نروح كل احنه فداء
نصيح عشاك ويذوبنه الحنين
*****************
سجل اسمي ياحبيب بدفترك
مثلك آنه عاشك وحك منحرك
عالعشك والشوك كلبي عاذرك
هوه مو سهله ابد حب الحسين
*****************
جيت اواسي اليوم زينب بالدمع
يلهج لساني بأسمهه وتستمع
اليوم لبيت النداء بهالجمع
ابد لا والله ماننسه الحسين
*****************
جيت اواسي اليوم سكنه والرباب
هلت الدمعات من هول المصاب
للطفل عبد الله كلب المحب ذاب
وهالمصيبه يشيب من عدهه الجنين
********************
للحسين النار بيه موجره
واذكر الاكبر مطبر عالثره
وجاسم العريس ذبحو منحره
امشي واقره الفاتحه لأم البنين
********************
شايل الرايه عله متوني ومشيت
يابو فاضل اعتنيلك واشتكيت
والله تعبني زماني شكد نخيت
ماتخليني بمحنتي والونين
********************
#من_قصائد_ديوان_قصه_الحوراء_في_كربلاء_.
فزاعيه لمشايه الأربعين لأهل بغداد( لرض الطف مساعيها )
أهل الغيره من بغداد
لرض الطف مساعيها
======================
متعنين من بغداد
وأنزورك يبو السجاد
من العاصمه كصاد
والزهره نعازيها
======================
هاي آهل المدينه هاي
كلمن شد علم مشاي
من بغداد أجه عناي
والحره يواسيها
======================
بالموكب الطبينه
وباأرضك يبو سكينه
بالخدمه أستمرينه
ورايتنه نعليها
======================
من بغداد مشايه
ومعلين الف رايه
كلنه اليوم وفايه
والخطوات نخطيها
======================
يامحلاتهه الخطوات
وآهل الطيب بالملكات
عدهم بالخيام أنبات
والهمه شفت بيها
======================
من بغداد أجو زوار
للبيده الفلك يندار
تقبل ياأبو الأحرار
الكصدت وبنواعيها
======================
بالغيره أوعزم رحنه
ودربك بابهه الجنه
يالمظلوم تشفعنه
والزوار تحميها
======================
*تـــــمت والـــــ🤲ـــــحمد الله تعالى*
*بقلم✍خادمه آهل البيت عليهم السلام*
*الشاعره العلويه أيه البياتيه*
*( الملقبه ببضعه الزهراء عليها السلام )*
حصريا الناشر عباس التميمي
فزاعيه للمشايه (ياشفيع المذنبين)
جيت مشاي الحضرتك
ياشفيع المذنبين
ياشفيع اذنوبي
وسيدي ومحبوبي
جيت كلفه ادروبي
وابچي بدموع وانين
غرگت عيني الدموع
انتحب جيتك والوع
ها يمكسور الضلوع
وياقطيع الوتدين
ياقطيع النحر ضامي
جيتك بشوگي وغرامي
انته مولاي وامامي
وانته ضخري ياحسين
سيدي وضحري ونجاتي
ابحياتي وبمماتي
شيعي معروفه صفاتي
مااهاب الظالمين
انته عالعز علمتني
جيت والرايه اعله متني
ادري زينب سجلتني
ورحبت بالزائرين
اتصيح زينب ياهله
بالگصدنا الكربله
جيت عيني هامله
امشي والطم عالجبين
امشي واصرخ ياغريب
انت حبي والحبيب
انت بس انت الطبيب
ياملاذ الحائرين
-------
الشاعره المله
ام هجران العمارچيه
ولقرب ذكرى استشهاده عليه السلام
...
مشاي متعني
مشاي متعني .. مشاي متعني
أمشي وعلى طول الدرب
يجري الدمع مني
...
شوغاتي ودموعي التصب
ونيران شبت بالگلب
سابع امام وبالسجن
مسموم يا روحي صعب
مولاي وانته ابن النبي
والما يودك ناصبي
وآنه اقسم بجدك علي
حبك يقيني ومذهبي
انته شمس كل البشر
وانته الليالينه گمر
يا موت يمنعني اجي
وجدامي ما تعرف خطر
كل موت ما همني.. كل موت ما همني
امشيلك وفدوه العمر
كل موت ما همني
...
يا روحي انته و منيتي
حبك وسيله وغايتي
يابو الرضا يمك ردت
آخرتي مو بس دنيتي
جيتك وعالخد دمعتي
تشرح ابفگدك حالتي
مو حاجه جابتني الك
يالكاظم انت حاجتي
ما خيبت ظني .. ما خيبت ظني
يالوصلتني الحضرتك
ما خيبت ظني
...
الغدروك شيمتهم غدر
احفاد أميه والشمر
واللا رشيد بكل حقد
يرمي الجنازه عالجسر
جثمان أمام الرافضه
مسموم والسم بي مضه
حزنت عليه كل شيعته
والارض حزنت والفضه
هاك استمع وني .. هاك استمع وني
يالمرمي جثه اعله الجسر
هاك استمع وني
...
بمصابك صوابي كلف
احضر أشيع لو زحف
شما حاربوا هذا الگلب
ما لحظه ابد رمشه يرف
اتمنه اعيش بحضرتك
هيچ وافوز بخدمتك
باب الحوائج ما ترد
مولاي وآنه بعازتك
مولاي سجلني .. ارجوك تقبلني
خادم واخدمك سيدي
ارجوك تقبلني ... ارجوك
/ نسيم*كربلاء