كلمات قصيدة رجع عاشور محمد الجنامي مكتوبة كاملة
القصيدة: عَاشُور رِجع
الرادود: مُحَمَّد الجنَّامِيْ
الشّاعر: كرار حسين الكربلائي
~~~~~~~~~~~~~~~~~
يَا حُسَيْن حُسَيْن حُسَيٌن
يَا حُسَيْن حُسَيْن حُسَيٌن
~~~~~~~~~~~~~~~~~
رِجع عَاشُور المحنه وصاحت ادموعي هله
هله ابأيام المجالس هله ابريحة كربله
يَا حُسَيْن حُسَيْن حُسَيٌن
يَا حُسَيْن حُسَيْن حُسَيٌن
~~~~~~~~~~~~~~~~
ياحُسين وهَل مُحرم يا حزن كل الزمن
الدنيه بعيوني متاهه ومجلسك هوّه الوطن
اقرايه عدنه راحنه صحنه تفضّلي يمّ الحَسن
فَاطِمْة ويّانه تبچي وعُمُّر مجلسنه وحِله
يَا حُسَيْن حُسَيْن حُسَيٌن
~~~~~~~~~~~~~
انته عُمري وهَلي كِلهم يا بعد عُمري وهلي
يا ولي النِعمه الچبيره ما ردت غيرك ولي
عشت مل اسنيني دمعه الخاطرك يا بو عَلي
اليبچي صاحب بخت عدنه بخدمتك شانه عِله
يَا حُسَيْن حُسَيْن حُسَيٌن
~~~~~~~~~~~~~
الليل ما ينحب واحبه چي الك اسود لبس
الهوه المابي عطر منك مو إليّ هذا النِفس
يبس كل العِشگ بيه وعود عِشگك ما يبس
الما شرب من نهر حبك روحه صَبخه و ذابله
يَا حُسَيْن حُسَيْن حُسَيٌن
~~~~~~~~~~~~~
انسه كِلشي إلا انته عندي نسيانك صعب
حسين والله الما يحبّك هذا ما عنده گلب
يا ضوه عيون الخدم والعافك ايتيه الدرب
يوم اگضيه بخدمتك بالعمر ما بَدلّه
يَا حُسَيْن حُسَيْن حُسَيٌن
~~~~~~~~~~~~~~~~~~
ايا تعب بس كل راحه وراحتي بهذا التعب
قِسمتي بالدنيه حُبك واحله مَقسوم انكتب
تراب بابك عندي جنه يروحله فدوه الذهب
تريدني انسه حَبِيبي والله بطرانه المَله
يَا حُسَيْن حُسَيْن حُسَيٌن
~~~~~~~~~~~~~~~~
من بده امحرم قميصك نِشرته اهل السِمه
خاف اقصّر بالبواچي الشِيبك الكلّه دِمه
امرُوّتك بَيّضلي وجهي اگبال امُك فَاطِمْة
ياَ حُسَيْن اشكبر حضّه الدفتر امُك سجّله
الشّمس من تِطلع اشوفك جسد عاري بالشّمس
من اشوف الماي اذكر گلت عطشان ابهمس
واذكر الليل التمنّت زِينب ايردّلها امس
صار اسم زِينب سِبيه شلون دنيه ما يله
يَا حُسَيْن حُسَيْن حُسَيٌن
~~~~~~~~~~~~~