كلمات لطميه راح الولد مرتضى حرب مكتوبة كاملة
قصيده : راح الولد
الرادود : مرتضى حرب
الشاعر : عباس كريم
~
راح الولد ياليله ادنيلي خل نبچيله
تمددت فوگه و گتله انه حسين
بوية شيردني للصواوين
وصحت لعمامه تشيله
~~~~
ياليلة ما چنه علي مو عادته ميگوم الي
فوگ وگفت وأندهته بهداي .. بوية
فز گتله تچيلي ارد ارد درب الخيم صار شبعد
حيلي چليل و جرحك هواي .. بوية
ويا عالتراب تمددت و يالمني كل رايك چنت
هسه انه منك رايد الراي .. بوية
ياعلي يمدلل هلك يبني جبت عيني الك
يالگتلي توك رايد الماي .. بوية
المن يطلع تنگبينه ما ريدج تشوفينه
وليدج علي مچسوم نصين
بويه شيردني للصواوين
و صحت لعمامه تشيله
~~~~
من اوصلت يمه اگعدت ياليله ما ادري شگلت
هوه التفرهد ابنه شيصيح .. بوية
يم راسه خلصت الحچي و ما خلصت عيني البچي
حگه الدمع عالمثلك يطيح .. بوية
كلشي بشبابك ماشفت يا وليدي يالتوة أكبرت
يالحته حچيك جان تسبيح .. بوية
يمه أصفگت جف الندم وگتله اليضدك ما فهم
بحوبة شبابك تعثر الريح .. بوية
الگابلك ماشافك .. ماركز باوصافك
شبيه ماسأل عن نورك منين
بوية شيردني للصواوين
و صحت لعمامه تشيله
~~~~
ماادري چم مره عثر لا صدر عنده و لا ضهر
عالگاع مدري شلون مطروح .. بوية
من گتله حضن امك برد ياليله فك عينه الولد
حسيته گلي مشينه خنروح .. بوية
چا جبته بس مابيه يرد لا ينهض و لا ينسند
و لا ينحضن جسمه من الجروح .. بوية
ياليله من سد الچفن ما جربت هذا الحزن
فگد العزيز يعذب الروح .. بوية
ياليلة يهضم حاله .. شمسوي بيه چتاله
لاحيل عندي ولابقت حيل
بوية شيردني للصواوي
و صحت لعمامه تشيله
~~~~
شحجيلج وكلشي أنهدم و من حيلي طاح اول علم
و بگلبي ضلت تسعر النار .. بوية
ياليلة بالحيرة صرت و بالگوه من عنده أرجعت
أمشي وأرد صوب أبني أندار .. بوية
شما أبتعد أرجع اله و يگلي بوية أتخيله
فگد الولد خلاني محتار .. بوية
بالوسفة خلصت الدرب فراگ الولد كلش صعب
وأول جرح بجروحي الكبار .. بوية
بعد الدرب هد حيلي .. و لا واحد يتچيلي
وين ألگه مثلك للتعب وين ؟
بوية شيردني للصواوين
و صحت لعمامه تشيله
~~~~
بجفوفهم جابوا وأجو و عليه عمامه شگد بجو
صاحبهم و حگ لاجله يبجون .. بوية
من كل كتر بيه ينلجم لا ينحضن لاينلزم
خاطر يشيلونه على المتون .. بوية
ياليلة جابوه مختلف ما ينعرف من النزف
ذاك أبنج الي جان مزيون .. بوية
يم الخيم خلوه هله ياليلة خل انروح اله
و نبچيله حد ماتعمه العيون .. بوية
ونگعد نعد جروحه .. رد ابنج بلا روحه
ويم راسه نذكر تعب السنين
بوية شيردني للصواوين
و صحت لعمامه تشيله